¹ Makura Kora mona-rume waIzara mona-rume Kohati mona-rume waLevi, navanwe vaDatani naAbiramu vana-rume vaEliyabu, Ono mona-rume waPeleti, vana vaRubeni, ava kupakerere navakafumu vamwe. ² Ava shapuka vadimuvyuke Mosesa, mushiyenda shavo navakafumu vamwe vamumbunga yaIsraeli, vampititi 250 vamumbunga ovo vayivire nawa-nawa mughuhameni wambunga. ³ Ava kupongeke navantje pamwe tupu mukudivyuka vaMosesa naArona. Ava vatantere, ''Amwe kuna kukutwara mo unene! mbunga nayintje vayipongwera, kehe uno mumwavo, naKarunga kwakara mumwavo. Nakonda munke mukuyerwira naghumwenu kupitakana vantu navantje mumbunga yaKarunga?'' ⁴ Ano Mosesa tupu aviyuvhire, atu shipara shendi mulivhu. ⁵ Atantere Kara na navantje ovo akalire navo, ''Ngurangura Karunga ngaviyivita ovo vamuhameno na ovo vapongwera kukwendi. Ghuye ngayita muntu ogho pepi naye. Ogho atoghorora ngamuyita pepi naye. ⁶ Viruwane vino, Kora na muhoko naghuntje. Ngamughupe vipana ⁷ yona nakuturapo mundiro namanganganga kumeho yaKarunga. Ghumwe ogho toghorora Karunga, ogho mukafumu ngavamupongwera kwaKarunga. Muna yendi ghure, nove navarangweka vaLevi.'' ⁸ Shimpe, Mosesa atantere Kora, ''Teghererenu weno, anwe vana vaLevi: ⁹ shininke shashididi kukwenu ovyo amughupa Karunga waIsraeli mukatji kambunga yaIsraeli, mukumuyita mukare pepi naye, mukuruwana viruwana vya munkongorondjugho yakupongoka yaKarunga, nakuyimana kumeho yambunga muvaruwanene? ¹⁰ Amuyita pepi, na vakaliro lyenu nalintje, vana vaLevi, kumwe nanwe, shimpe amushana ghuruti nanwe! ¹¹ Ngoweyo nove na mbunga yoye nayintje munayapongero kumwe muvyuke Karunga. Are ghuno Arona muna tangulita mudimuvyuke?'' ¹² Makura Mosesa nko kuyita Datani na Abiramu, vana-rume va Eliyabu, ngoli vavo ava ghamba, '''Kapi tuyako. ¹³ Kapi vinagwaneke nani vyakutughupa mushirongo shakupupa mashini na ghushi, mukuyatudipagha mumburundu? makura mbyo una kushana kukutura naghumoye mupangeli wetu! ¹⁴ Navimwe nka, ove kapi ghuna tuyita mushirongo shakupupa mashini naghushi, ndipo ghutupe mafuva navikunino vyamandjembere ashi vikare ghupingwa. Ngoli ghuna shana kutufika pamantjo nalitwenyidiro lyamaghoko-ghoko? Kapi tuyako koye.'' ¹⁵ Mosesa agarapa unene nakughamba kwaKarunga, ''Washa fumadeka ndjambo davo. Kapi naghupu shidongi shimwe kwaghumwe, ntani kapi nareme umwe mumwavo.'' ¹⁶ Makura Mosesa atantere Kora, ''Yona nove navankwami voye navantje muna hepa kuyenda kumeho yaKarunga- ove navo, naArona. ¹⁷ Kehe ghuno ana hepa kughupa shipana shendi kumwe nakuturapo manganganga. Makura kehe mukafumu ana hepa kuyita shipana shendi kumeho yaKarunga, vipana 250. Nove naArona, ano nka waro, muna hepa kuyita kehe ghuno shipana shendi.'' ¹⁸ Makura kehe ghuno mukafumu aghupu shipana shendi, kuturapo mundiro, kurangekapo manganganga, nakukayimana pamangeneno gha tende yavigongi kumwe naMosesa naArona. ¹⁹ Kora ava kupongeke nambunga nayintje vadivavyuke vaMosesa naArona pamangeneno gha tende yavigongi, ano ngoli ghuyerere waKarunga aghumoneke kumbunga nayintje. ²⁰ Makura Karunga atantere Mosesa naArona: ²¹ ''Kupangurenumo muno mukatji kambunga yino mbyevishi kuvhura nividjonaure weno.'' ²² Mosesa naArona avatu vipara vyavo mulivhu nakughamba, ''Karunga, Karunga wapapempo wavantu navantje, ntjeneshi muntu ghumwe ana djono, hepero kugarapera mbunga nayintje ndi?'' ²³ Karunga alimburura Mosesa. Aghamba, ²⁴ ''Katantere mbunga. Kaghambe ashi, 'Tundenuko kutende yaKora, Datani, naAbiramu.'' ²⁵ Makura Mosesa ashupuka nakuyenda kwaDatani naAbiramu, matimbi gha Israeli ava mukwama. Atantere mbunga nakughamba, ²⁶ ''Ngoweyo tundenuko kutende davantu vano va vadona ntani mwasha kwata kehe shino shavo, ndi kuvhura vamudjonaure kumwe nandjo davo nadintje.'' ²⁷ Makura vantu ovo vakaliro kutende davaKora, Datani, naAbiramu avatunduko. Datani naAiramu ava rupuka nakuyimana pamangeneno ghatende davo, navakamali vavo, vana, na vasheshughona vavo. ²⁸ Makura Mosesa aghamba, ''Kutunda pano kumuviyiva ashi Karunga ndje antumo mukaruwane viruwana navintje vino, ano nka kapi naviruwananga mulikuyuvho lya naumwande. ²⁹ Ntjeneshi vano vantu vafe mfa odo dakaro yira ndodo dashoraukango kehe pa, nkwandi Karunga kapi antuma. ³⁰ Ngoli ntjeneshi Karunga arughane shininke shashipe, livhu liyashame nakanwa kalyo nakuvamina, naviweka vyavo navintje, nakuyenda mushirongo shavafe ghuyumi, makura muna hepa kuyuvhako ashi avano vantu mbo vashweno Karunga.'' ³¹ Tupu amana Mosesa nkango nadintje do, livhu ali yashama kuntji yavo. ³² Livhu ali mwakuka liyashame kanwa kalyo nakuvamina, mapata ghavo, navantu navantje ovo vahamenino kwaKaro, kuturako na navintje ovyo vawekire. ³³ Makura vana vavo naviweka vyavo avi yendi ghuyumi kushirongo shavafe. Livhu ali kumbandere, nakudongonoka kukatji mbunga. ³⁴ VaIsraeli navantje ovo vakundurukida ava tjira kudimutaku davo. Ava yiyiri, ''Livhu kuvhura litumine natwe nka!'' ³⁵ Makura mundiro waKarunga aghutwere wangu-wanga nakuyaveveka vakafumu 250 ovo vadjambiliro manganganga. ³⁶ Shimpe nka Karunga atantere Mosesa nakughamba, ³⁷ ''Tantera Eliyazara mona-rume waArona wamuruti nakumurenka akashimbe vipana mumundiro wakuvhenkuma, mukondashi vipana vavipongwera kukwande. Makura ghukatetere makara ghamundiro ure. ³⁸ Kaghupe vipana vyovanya vana kombanito monyo davo mukonda yandjo davo. Kavighupe mukavishambure nakuviruwana marupasha vikare vyakufikita kushidjambero. Ovo vakafumu vana kudjambere kukwande, mbyo vana vimpongwere. Vyavyo ngavi kara shineghedo shalikaropo lyande kumbunga yaIsraeli.'' ³⁹ Eliyazara wamumati aghupu vipana vya ngorodo ovyo varuwanite vakafumu ovo vasholire, nakuvishambura vikare marufiko gha kushidjambero, ⁴⁰ mukukara shivhurukito kumbunga yaIsraeli, mukondashi kapi pakare wapandje ogho akaroshi kapishi wakutunda mwaArona wakuvhura kuya shwakerera manganganga kumeho yaKarunga, mukondashi kapi ngavakare yira Kora navakwami vendi- yira momo avi rawilire Karunga vipitire mwaMosesa. ⁴¹ Ngoli ngurangura yakukwamako vantu navantje vambunga yaIsraeli ava shivanene Mosesa naArona. Ava ghamba, ''Kamudipagha vantu vaKarunga.'' ⁴² Makura avi shoroka, tupu yaponga mbunga yivyuke Mosesa naArona, tupu vakenga kumeho yatende yavigongi kumwe, nakumona, liremo lina fikiko. Ghuyerere waKarunga aghumoneke, ⁴³ Ano Mosesa naArona avaya kumeho yatende yavigongi. ⁴⁴ Ano Karunga atantere Mosesa, aghamba, ⁴⁵ ''Tundenuko kumeho yavantu mposhi nivhure kuvadjonaura weno.'' Makura Mosesa naArona ava munyongamene vipara vyavo mulivhu. ⁴⁶ Mosesa atantere Arona, ''Ghupa shipana, ghuturepo mundiro wakutunda pashidjambero, turapo manganganga, ghushitware wangu mumbunga, nakuruwana likushururo lyavo, mukondashi ugara ghuna kutundo kwaKarunga. Lihepeko lina vareke.'' ⁴⁷ Ano Arona nko kuviruwana yira momo amurawlire Mosesa. Adukiri mukatji kambunga. Lihepeko lyalyo ali vareke kuhanene mukatji kavantu wangu-wangu, makura aturapo manganganga nakuruwana likushururo mumbunga. ⁴⁸ Arona ayimana pakatji kava vakufa nava va vayumi, murupe oro lihepeko ali shagha. ⁴⁹ Ovo vafiro kulihepeko kwakalire 14,700 mushivaro, kughupako ovo vafiro kundjorongani yaKora. ⁵⁰ Arona avyuka kwa Mosesa pamangeneno gha tende yavigongi, nalihepeko ali shagha.