¹ Makura Karunga atantere Mosesa. Aghamba, ² ''Ghambita mbunga yaIsraeli nakuvatantera asi, 'Ntjeneshi muna yendi mushirongo osho ngamukatunga, osho ana kumupa Karunga, ³ ngamukawapayike ndjambo yapamundiro kwa Karunga, nampindi ndjambo yakushwakerera ndipo ndjambo yalitikitomo mughano ndi ndjambo yashihoro sha muntu mwene, ndi ndjambo yapavipito vyenu, mukurenkita lidumba lyaliwa kwaKarunga lina kutundo kuvighunda vya ngombe na vindjwi. ⁴ Muna hepa kumudjambera Karunga ndjambo yakushwakerera momo vyashwa kundjambo ya mbuto yashighumurongo mushimetito shaghutura vana shuka nawa vavhonga mushiune sha maghadi mushimetito. ⁵ Muna hepa nka kundjambera nandjambo yakushwakerera, ndi ndjambo yashiune shimwe sha vinyu kundjambo yavinwa mwakehe yino ndjwi-ghona. ⁶ Ndjeneshi ndjambo yashindjwi shashirume, ghuna hepa kuyiwapayika momo vyashwa kundjambo yambuto yashighumurongo mbiri mushimetito shaghutura vashuka nawa vavhonga nashighutatu shamaghadi mushimetito. ⁷ Mundjambo yavinwa, ghuna hepa kudjambera shighutatu sha vhinyu mushimetito. Yayo kurenkita lidumba lyaliwa kwaKarunga. ⁸ Ntjeneshi kuna kuwapayika ntwedu momo vyashwa kundjambo yakushwakerera ndi momo vyshwa kundjambo yalitikitomo mughano, ndi momo vyashwa kundjambo yambili kwaKarunga, ⁹ makura ghuna hepa kundjambera natwedu kundjambo yambuto mushighumurongo sha utatu sha ghutura vashuka nawa mushimetito vavhonga naghukahe wamaghadi mushimetito. ¹⁰ Ghuna hepa kundjambera momo vyashwa kundjambo yavinwa ghukahe wavhinyu mushimetito, momo vyashwa kundjambo vana ruwana kumundiro, yakutapa lidumba lidumba lyaliwa kwaKarunga. ¹¹ Vana hepa kuviruwana ngoweyo kuwakehe yino ntwedu, kehe yino ndjwi yayirume, nakehe shino shindjwi ghona shashirume ndipo shimpendje ghona shashirume. ¹² Kehe yino ndjambo una kuwapayika nakuyindjambera ghuna hepa kuyiruwana momo vyashwa mulinangwiro lino. ¹³ Navantje vamvharerwa yino vana hepa kuruwana vino vininke mundjira yino, ntjeneshi umwe arughana ndjambo oyo vana ruwana kumundiro, mukurenkita lidumba lyaliwa lyakuhafita Karunga. ¹⁴ Njeneshi muntundwashirongo mwakara naye ndi ogho ngavhuro kutunga nanwe mukatji kamuhoko wenu, ana hepa kuruwana ndjambo yakuruwana kumundiro, mukurenkita lidumba lyaliwa kwaKarunga. Ana hepa kuruwana momo muna kuruwana. ¹⁵ Pana hepa kukara veta yimwe kumuhoko na muntundwashirongo ogho ana karo nanwe, veta yakukarererapo mukuyenda kwamuhoko. Momo mwakara, wara nka ana hepa kukara munaruyendo ogho mwakara naye. Ana hepa kuruwana momo mwaruwananga kwaKarunga. ¹⁶ Veta nalirawiro lina hepa kukufana kwenu na muntundwashirongo ogho mwakara naye.''' ¹⁷ Shimpe waro Karunga atantere Mosesa. Aghamba, ¹⁸ ''Ghambita mbunga yaIsraeli nakuvatantera ashi, 'Opo ngamuyendi mushirongo osho ngani mutwara, ¹⁹ pakulya ndya odo dayimango mushirongo, muna hepa kundjambera ndjambo nakuvitapa kwande. ²⁰ Kundombo denu dakuhova muna hepa ndjambera muntje wamboroto kumuyangu mukonda ndjambo yamuyangu wakutunda pashishwayero sha parupare. Muna hepa kuyangura ngoweno. ²¹ Muna hepa kutapa ndjambo yamuyangu kukwande mukuyenda kwamughongo wenu kundombo yenu yakuhoverera. ²² Maruvede ghamwe kuvhura kudjona ndjo yakudira kuyivira, ntjene kapi muna kulimburukwa kumarawiro naghantje ghano natantilire- ²³ Mosesa navintje ovyo namurawilire vipitire mwa Mosesa kutundilira muliyuva olyo navalikire kumupa marawiro nakumeho ko mukuyenda kwamuhoko wenu. ²⁴ Murupe ru rwandjo yakudira kuyivira mukonda mbunga kapi yakarako naghuyivi, makura mbunga nayintje yina hepa kundjambera ntwedu-ghona yimwe kundjambo yakushwakerera mukutapa lidumba lyaliwa kwaKarunga. Momo nka shimpe kuna hepa kuruwanako ndjambo yambuto na ndjambo yavinwa, mukutwara mulirawiro lyapaveta, na shimpendje shashirume shimwe momo vyashwa kundjambo yandjo. ²⁵ Muruti ana hepa kuruwana ngoli likushururo lyamuhoko naghuntje wa mbunga yaIsraeli. Vavo ngava va ghupirapo mukondashi ndjo oyo yalikupuko. Ngava yite ndjambo davo, ndjambo dakuruwana kumundiro kukwande. Ngavayite ndjambo davo dandjo kukwande damapuko ghavo. ²⁶ Makura muhoko naghuntje wambunga yaIsraeli kuvhura kuvaghupirapo, na vantundwavirongo nka waro ovo vakaro navo, mukondashi mbunga nayintje kwadjonine ndjo oyo vadilire kuyivira. ²⁷ Ntjeneshi muntu adjono mukudira kuyivira, ano ana hepa kundjambera shimpendje shashikadi shamwaka umwe momo vyashwa kundjambo yandjo. ²⁸ Muruti ana hepa kurughana likushururo kumeho yaKarunga kwa muntu ogho ana djono hana kuyivira. Ogho muntu ngavamughupirapo ntjeneshi likushururo linapu kuruwana. ²⁹ Ghuna hepa kutura veta yakukufana kwa kehe uno ogho ana kuruwano kehe shi shakudira kuyivira, yikare veta yakukufana kwa kehe uno wamvharerwa ogho ana karo mukatji kambunga yaIsraeli na muntundwashirongo ogho akaro mukatji kenu. ³⁰ Ngoli kehe uno muntu ana kuruwano kehe vino vyandjo yawina, akereshi ghuye munamvharerwa ndipo muntundwashirongo, kuntjwaghukita. Muntu ogho vana hepa kumughupamo mukatji kavantu vendi. ³¹ Mukondashi ashwena nkango dande kumwe nakutjora dimuragho dande, muntu wangoweyo kumughupako kuvantu vendi. Ndjo dendi ngadimukarerera. ³² Opo yakalire mbunga yaIsraeli mumburundu, ava kawana mukafumu ana kutjavo vikuni muliyuva lyaSabata. ³³ Ovo vakamuwanino ava muyita kwaMosesa, Arona, nakumbunga nayintje. ³⁴ Ava mutura mulikeverero mukondashi kapi vayivire ashi weni omo vamuruwana.. ³⁵ Makura Karunga atantere Mosesa, ''Mukafumu ogho vana hepa nawa-nawa kumudipagha. Mbunga nayintje yina hepa kumupondeka namawe pandje yantanda.'' ³⁶ Makura mbunga nayintje ayimuyita pandje yantanda kumwe nakumupondeka namawe yira momo avi rawilire Karunga Mosesa. ³⁷ Shimpe Karuga atantere Mosesa. Aghamba, ³⁸ ''Ghambita vana vaIsraeli nakurawira varuwane tunyerera naghumwavo vatukulike kughuhura wamukunkuro wavidwata vyavo, mukuvikulika kukehe ghuno ghuhura kungodi da shinaliwiru. Vana hepa kuvirughana ngoweyo kudimuhoko dakumeho. ³⁹ Ngavikare vyaviwa mulivhurukito lyenu, ntjeneshi amuvikenge, kudimuragho dande nadintje, mukudishima makura mudire kudikenga mudimushima denu namumantjo ghenu nakukara vakakushondera kukwavo. ⁴⁰ Muruwane vino makura ngavimuvhurukite nakulimburukwa kudimuragho dande nadintje, ano makura ngamukare vapongoki, hamenenu kukwande, Karunga wenu. ⁴¹ Ame Hompa Karunga wenu, ogho amughupo mutunde mushirongo sha Egipute, mukuyakara Karunga wenu. Ame Hompa Karunga wenu.