¹ Matiku ogho mbunga nayintje ayiliri ghunene. ² Mbunga nayintje yaIsraeli ayitangulita Mosesa naArona. Mbunga nayintje ayivatantere, ''Shiwa ndi twafelilire mushirongo shaEgipute, nampiri momu mumburundu! ³ Konda munke atuyitira Karunga kushirongo shino tuyafe kurufuro? Vakamali vetu navasheshughona vetu ngava kakare ngoli naghudito. Kapi vina wapere tuvyuke kuEgipute ndi?'' ⁴ Ava kutantere vavene navavene, ''Renkenu tutoghororeko mpititi ghumwe naye peke, nakuvyuka kuEgipute.'' ⁵ Makura Mosesa naArona ava kunyongamene kumeho yalipongo lya mbunga nayintje yaIsraeli. ⁶ Joshuwa mona-rume waNunu naKalebu mona-rume waJefune, ovo vakaliro vamwe vavantumi mukukakona-kona shirongo, ava taghura vidwata vyavo. ⁷ Ava tantere mbunga nayintje yaIsraeli. Ava ghamba, ''Shirongo osho twayenda nakukashikona-kona shirongo shashiwa unene. ⁸ Ntjeneshi Karunga ana tuhafere, kuvhura ngoli ngatutware mushirongo shinya nakukatupa sho. Shirongo shakupupa mashimni naushi. ⁹ Ngoli mwasha muvyuka Karunga, ntani nka nakuvhurashi mutjire vantu vamushirongo, vavo mboroto kukwetu. Likandano lyavo ngatukalivaghupa, mukondashi Karunga naye tuna kara. Mwasha vatjira.'' ¹⁰ Makura mbunga nayntje ayi ghamba mukuvaponde namawe. Ngoli ghuyerere waKarunga aghumoneke patende yavigongi kumbunga nayintje yaIsraeli. ¹¹ Karunga atantere Mosesa, ''Shirugho shakutika kuni ngava nyenga? Shirugho shakutika kuni ngava dira kuhuguvara me, navinegheda navintje vyamunkondo dande ovyo navaruwanena mukatji kavo? ¹² Ngani vahomona namahepeko, ngani vashakana ghupingwa, ngani renka lira lyoye likare muhoko wanene naunankondo kuvapitakana.'' ¹³ Mosesa atantere Karunga, ''Ntjeneshi ghuruwana vyo, makura vaEgipute ngavaviyuve vyo, mukondashi ve wayoghoro mbunga mumwavo munkondo doye. ¹⁴ Ngava vitantera vantu vamushirongo. Vavo vayuvhashi, Karunga, ana kara navantu va, mukondashi vakukenga shipara nashipara. Liremo lyoye kuyimana pawiru yavantu vetu. Ove kuvapitira kumeho mungundi yaliremo ntjeneshi mwi ano ngundi yamundiro ntjeneshi matiku. ¹⁵ Ano ntjeneshi ghudipagha vantu vano mukonda yamuntu ghumwe, makura muhoko ogho ghuyuvho mukukumo ghoye ngava ghamba nakutanta ashi, ¹⁶ 'Mukondashi Karunga kapi ana kuvhura nka kutwara vantu ovo kushirongo osho ava twenyidira mukushivapa, mbyo ana vadipaghere mumburundu.' ¹⁷ weno, nakanderere, ruwanita unankondo ghoye waunene. Mukondashi ve kwatanta ashi, ¹⁸ 'Karunga wakukuranga kugarapa nakukarerera mushihoro shashingi. Wakudongononapo ndjo naghuhe yuvhu. Wakudira kuvhuramenena kulikenito ndjo ntjeneshi ayita lifutito lyandjo yavakughona kuvana, kumuhoko wautatu na waune.' ¹⁹ Lighupiropo, nakanderere, ndjo yavantu vano mukonda ya ghunene waulimburukwi ghoye wakukarererapo, yira momo wavaghupirangapo kehe pano vantu vano kundilira muruvede vakalire muEgipute dogoro ruvede runo.'' ²⁰ Karunga aghamba, ''Nava ghupiripo mukutwara ovyo ghuna rombo, ²¹ ngoli vyaushiri, ame shimpe nda nakarera, ano ngoli undjoni naghuntje ngaghuyura ghuyererebwande, ²² ovo vantu navantje vamono ghuyerere wande nalimoneko lya nkondo olyo naruwanine muEgipute namumburundu- vavo shimpe kuna kuntjetayika mwarukando rwa murongo nakundjuva kapi vana kuyuvha liywi lyande. ²³ Ngoli vavo kuna kughamba ashi narumweshi kapi ngava kenga shirongo osho natulire mughano kuvakughona vavo. Naghumweshi umwe mumwavo ogho ntjweno ngakavhuro kushikenga, ²⁴ nkwandi muntu Kalebu, mukondashi akara nampepo nayo peke nakunkwama namutjima wendi naghuntje. Ame nganimuyitira shirongo osho ayenda, navana vendi ngava kaghupe viweka vyamo. ²⁵ (Ruvede ro Amaleki navaKanani kwatungire mumuramba.) Ngurangura muvyuke nakuyenda mumburundu kuviha vyalifuta lyambu.'' ²⁶ Karunga atantere Mosesa naArona. Aghamba, ²⁷ ''Shirugho shakutika kuni nikengera ghuno muhoko waudona ogho ghuna kuntangulito? Kuna kuyuvha rushivano rwakumbyuka rwambunga yaIsraeli. ²⁸ Vatantere, 'Ame ogho nakarereropo- aghamba Karunga- momo muna ghamba muliyuvho lyande, ngani ruwana vino kukwenu: ²⁹ Vimpu vyenu ngavikuhanena muno mumburundu yino, navantje ovo vantjivaneno, ovo va varulire mulivaruro lyapaveta, shivaro nashintje sha vantu vakutameka namwaka dimurongo mbiri vikandwite. ³⁰ Kapi ngomuvhura kuyendamo mushirongo osho natwenyidira mukukaturamo mandi ghenu, nkwandi Kabelu mona-rume waJefune naJoshuwa mona-rume waNunu. ³¹ Ngoli vasheshu-ghona venu ovo mwatantire ashi ngavakara naghudito, ngani vatwara mushirongo sho. Ngava kashikurongera shirongo osho mwashwena! ³² Kukwenuko anwe, vimpu vyenu ngavi kuhanena muno mumburundu. ³³ Vana venu ngava kara vashita vavindjwi mumburundu mumwaka dimurongo ne. Vana hepa kushimba kashitiko kenu kaghupiki-piki nange vimpu vyenu ngavikumanitepo mumburundu. ³⁴ Kutwara mumuvaro ghamayuva ogho mwakakona-kona shirongo, mayuva dimurongo ne, ane ngamushimba mafutiro gha ndjo denu mwaka dimurongo ne, mwaka umwe wa kehe liyuva, ntani ngamuyivha likushuvo lyande. ³⁵ Ame, Karunga, navighambo. Ame kuvhura ngani viruwane vino kwanavantje kumuhoko ghuno waudona ngoweyo vakukupongayika mukumbyuka me. Nganimudipagha nu, nakufera momu.''' ³⁶ Anovakafumu ovo atumine Mosesa mukukanongonona shirongo, ovo vakavyukiro nakuyita ndjorongani kumuhoko naghuntje vavyuke Mosesa mukuhanita mbudi yayidona kuhamena shirongo- ³⁷ vakafumu vano ovo vayitiro mbudi yayidona kuhamena shirongo ava vatoghona, nakufa kumahepeko kumeho yaKarunga. ³⁸ Kuvakafumu ovo vayendiro vakanongonone shirongo, nkwandi Joshuwa mona-rume waNunu naKalebu mona-rume waJefune mbo vahupiropo namonyo. ³⁹ Opo aka tantire Mosesa nkango odo kumbunga yaIsraeli nayintje, ava liri unene. ⁴⁰ Ava rambuka ngurangura yayinene nakuyenda pawiru yandundu nakughamba, ''Kenga, atwe vano, kuvhura tuyende kulivango olyo atutantilire Karunga, atwe twadjona.'' ⁴¹ Ngoli Mosesa aghamba, ''Konda munke muna kudira kulimburukwa kulirawiro lyaKarunga? Kapi ngavi mutompoka. ⁴² Mwasha yenda, mukondashi Karunga kapishi nanwe ana kara mukumupopera vasha muketa kuvanankore venu. ⁴³ VaAmaleki navaKanani mpovali mo, kuvhura ngamukafe kurufuro mukonda mwatungwire mughongo mukumukwama. Ngoli kapi ngakara nanwe.'' ⁴⁴ Ngoli vavo ava tininiki mukukanduka kushirongo sha ndundu, ano ngoli, vikareshi Mosesa ndipo shikesha shamakugwanekero sha Karunga kapi vatundire muntanda. ⁴⁵ Makura vaAmaleki ava ghurumuka, navaKanani waro ovo vatungiro kundundu do. Ava homona vaIsraeli nakuvafunda navantje mukuvarapatita nange kuHorama.