¹ Makura Karunga atantere Mosesa. Aghamba, ² ''Tuma vakafumu vamwe vakakone-kone shirobgo sha Kanani, osho napa mbunga yaIsraeli. Tuma mukafumu umwe mwakehe rudi rwavakughona vavo. Kehe mukafumu ogho ana hepa kukara mpititi mukatji kavo. ³ Mosesa ava tumu kutundilira mumburundu yaPerani, mukonda yakulimburukwa kulirawiro lyaKarunga. Navantje kwakalire vampititi vamumbunga yaIsraeli. ⁴ Aghano ngo madina ghavo: kutundilira kurudi rwaRubeni, Shamuya mona-rume waZakuri, ⁵ Murudi rwa Simiyoni, Shafati mona-rume waHori, ⁶ murudi rwa Juda, Kalebu mona-rume waJefune, ⁷ murdi rwa Isasikari, Igali mona-rume waJosefa, ⁸ murudi rwaEfurayimu, Hosheya mona-rume waNunu, ⁹ murudi rwaBenyameni, Paliti mona-rume waRafu, ¹⁰ murudi rwaZebuluni, Gadiyeli mona-rume waSodi, ¹¹ murudi rwaJosefa (mukutanta, murudi rwaManase), Gadi mona-rume waSusi, ¹² murudi rwaDana, Amiyeli mona-rume waGemali, ¹³ Murudi rwaAsheri, Setura mona-rume waMikayeli, ¹⁴ murudi rwaNafitali, Nahabi mona-rume waVofasi, ¹⁵ murudi rwaGada, Geweli mona-rume waMaki. ¹⁶ Oghano ngo madina ghakaliro gha vakafumu ovo Mosesa atumine vakakona-kone shirongo. Mosesa aruku Hoseya mona-rume waNunu kulidina lyaJoshuwa. ¹⁷ Mosesa ava tumu mukakona-kona shirongo shaKanana. Ava tantere, ''Katikenu dogoro kuNegeva makura mukakanduke kushirongo sha ndundu. ¹⁸ Kakona-konenu shirongo mukukenga ashi weni shafana. Kanongononenu vantu ovo vatungomo, vakareshi vaupampi ndi vaudwa, ndipo vasheshu mo mushirongo ndi vangi. ¹⁹ Kakengenu ashi weni omo shafana shirongo osho vashungira. Shiwa ndi shidona? muvitata munke vakara? vyafana yira ntanda, ndi vitata vyakukundurukida makuma? ²⁰ Mukukenga omoshafana shirongo, ntjeneshi shiwa mukukuna mbuto ndi hawe, ndi mwakara vitondo ndi hawe. Kwatennu mutjima nakukapiturako vimwe vya nyango yashirongo.'' Shirugho shino ntjo sha kuyangura mandjembere ghakuhova. ²¹ Makura vakafumu ava kanduka nakukakona-kona shirongo kutundilira kumburundu yaZini dogoro Rehobu, pepi naLebo Hamati. ²² Ava kanduka kutundilira Negeva nakuyatika paHeburoni. Ahimani, Sheshayi, naTalimayi, vana vaAnaki, opo vakalire. Yayo Heburoni oyo vadika papite mwaka ntano nambiri kumeho vakadike Zoyani yamuEgipute. ²³ Opo vakatikire mumuramba waEshikoli, avatete mutavi washishokombwa shamandjembere. Ava shishimbi mukushikupangeka vaviri vamumbunga yavo. Ava pituranka ndunga naghukuyu. ²⁴ Olyo livango ava liruku muramba waEshikoli, mukonda yashishokombwa sha mandjembere osho vatetire mo vaIsraeli. ²⁵ Kuruku yamayuva dimurongo ne, ava kavyuka kutundilira kukakona-kona shirongo. ²⁶ Ava kavyuka kwaMosesa, Arona, nakumuhoko naghuntje wambunga yaIsraeli mumburundu yaParani, paKadeshi. Ava yitiri mbudi kumuhoko naghuntje, nakuya vanegheda viyimwa vya shirongo sho. ²⁷ Ava tantare Mosesa, ''Tunakatika mushirgo osho watutuma. Shasho kupupa mashini naushi. Ovino mbyo viyimwa vyamo. ²⁸ Ano ngoli, vantu ovo vatungo mo vaupampi. Vitata kwavikundurukida namakuma vyavyo nka vinene. Shimpe nka twakamonine vana vaAnaki. ²⁹ VaAmaleki kwatunga muNegeva. VaHiti, vaJebusi, navaAmori mandi ghavo kwakarera kushirongo shandundu. VaKanani kwatungira kulifuta nakukwamita mukuro waJorodani. ³⁰ Makura Kalebu amwenikida vantu ovo vakaliro kumeho yaMosesa nakughamba, ''Tuna hepa kukanduka nakukaghupa viweka vyashirongo, morwa atwe ghureru mukashifunda.'' ³¹ Ngoli vakafumu ovo vayendiro naye ava ghamba, ''Atwe ghudito mukukahomona vantu vo mukondashi vanankondo kupitakana atwe.'' ³² Makura ava hanita nakuntje mbudi yalidompito mumbunga yavaIsraeli vyakuhamena kushirongo osho vakakona-konine. Ava ghamba, ''Shirongo osho tuna kakenga shasho shirongo shakulyapo vinamonyo vyasho. Navantje vantu ovo twakamonine vavo vantu vavare unene. ³³ Twakakengire ntungurume, vana vaAnaki, vantu ovo vatungo kuntungurume. Mulimoneko lyetu atwe kwakamonikire yira mpadimpadi mulishetekero navo, ovino mo nka waro vyakakalire mulimoneko lyavo.