¹ Makura Miriyamu naArona ava ghamba vyakumuvyuka Mosesa mukonda yamukamali wamuEtiyopiya ogho akwalire. ² Ava ghamba, ''Nani Karunga mwaMosesa tupu aghamberanga? Nani omu mwetu kapi aghamberangamo?'' Weno Karunga aviyuvhu omo vaghambire. ³ Ngoli mukafumu Mosesa kwakalire wakukudidipita unene, wakukudidipita kupitakana vantu navantje vapalivhu. ⁴ Mpopo Karunga aghambita Mosesa, Arona, naMeriyamu: ''Rupukenu, muutatu wenu, muye kutende yavigongi.'' Ano ava yendi muutatu wavo. ⁵ Makura Karunga nko kusheghumuka mungundi yaliremo. Ayimana pamangeneno ghatende nakuyita Arona naMeriyamu. Navantje ava yendi kumeho. ⁶ Karunga aghamba, ''Weno teghererenu kunkango dande. Ntjeneshi mupumbi wande mukatji kenu ana kara, ame kumonekera kukwendi mumamoneko nakughambaghura naye mundjodi. ⁷ Mupika wande Mosesa kapishi ngoweyo. Ghuye mulimburukwi mundjugho yande nayintje. ⁸ Ame kughamba naMosesa ghuye kuna kumona, kapishi mumamoneko ndi muvishewe. Ghuye akenga shishwi shande. Makura vinke vyakudilira kutjira kumughamba vyakuvyuka muntu wande, muvyuke Mosesa?'' ⁹ Karunga agarapa unene ava vyuke, nakuvashuva. ¹⁰ Liremo ali yeruka pawiru yatende, ano Miriyamu kadidi tupu vingondwe avi muvavere, akara watoo yira materengendje. Ano Arona apa apirukire kwaMirayamu, akenge Miriyamu ana kara navingondwe. ¹¹ Arona atantere Mosesa, ''Muhona wande, tuna kanderer washa tushuvilira yituvyuke yino ndjo. Atwe katughamba ugova, kumwe nakudjona. ¹² Nakanderere washa mushuvilira akare yira shituntumika osho shadjonaukoghukahe warutu opo shatunda mushivharero sha nyokwasho.'' ^{13 14 15} Makura Mosesa akughu kwaKarunga. Aghamba, ''Nakanderere muverure, Karunga, nakanderere.'' Karunga atantere Mosesa, ''Ntjeneshi vashe vamufiyira mushipara, kuvhura afe ntjoni mumayuva matano namaviri. Muruku yavyo mukamuvyute shimpe.'' Makura Miriyamu ava kamugharerera pandje yantanda mumayuva matano namaviri. Mbunga kapi yayendire dogoro ava kamuvyutira muntanda. ¹⁶ Kutunda opo, mbunga ayi yendi kutunda Hazeroti nakukatulira mumburundu yaParani.