¹ Karunga atantere Mosesa. Aghamba, ² ''Tantera mbunga yaIsraeli nakuwako mpango kukwavo, yimwe kwa kehe rudi rwavakughona, mpango murongo nambiri. Kehe uno mukafumu atjange lidina lyendi kumpango yendi. ³ Ghuna hepa kutjanga lidina lyaArona kumpango yavaLevi. Kuna hepa kukara mpanga yimwe kwakehe ghuno mpititi warudi rwavakughona vavo. ⁴ Ghuna hepa kaditura mpango do mutende yavigongi kumeho yadimuragho daghumbangi, oko nagwanekeranga nove. ⁵ Ngavishoroka ashi mpango yamuntu ogho natoghorora ngayishiroka. Ngani renkita marushivano gha mbunga yaIsraeli mukushayeka, ogho vana kukughambera vakuvyuke.'' ⁶ Makura Mosesa atantere mbunga yaIsraeli. Vampititi vamumarudi naghantje avamupa mpango, mpango yimwe kwa kehe mpititi, ogho vatoghorora mwakehe rudi rwavakughona, mpango murongo mbiri nadintje. Mpango yaArona yimwe mwado. ⁷ Makura Mosesa akaditura mpango kumeho yaKarunga mutende yadimuragho daghumbangi. ⁸ Liyuva lyakukwamako Mosesa ayendi mutende yadimuragho daghumbangi, kumwe nakumona, mpango yaArona yarudi rwavaLevi yina shokere. Yina shoko nakuyima dimucuko nakuwaperera kunyanga nyango! ⁹ Mosesa aka rupwita mpango ditunde kumeho yaKarunga mukudiyita kumunga nayintje yaIsraeli, nakehe mukafumu aghupu mpango yendi. ¹⁰ Karunga atantere Mosesa, ''Tura mpango yaArona kumeho yadimuragho daghumbangi. Yiture yikare shiyivito sha ndjo yambunga oyo yina kukulimbo mposhi vavhure kushayeka marushivano ghamvyuka, ndi ngavafa. ¹¹ Mosesa aruwana yira momo amu rawilire Karunga. ¹² Mbunga yaIsraeli ayi mutantere Mosesa nakughamba, ''Atwe kuvhura kufera omo. Atwe kuvhura kufa natuvantje! ¹³ Kehe uno ogho ana kuyo, nakushwenena kunkongorondjugho yakupongoka yaKarunga, nga fa. Natuvantje tuna hepa kufa ndi?