¹ Kango ya Hompa ayiya kwande mumwaka wauntane, mukwedi kaumurongo, muliyuva lyaumurongo mukwedi, nakughamba shi, ² ''Monande, kutjangere naumoye lidina lya liyuva lino, ndyolino liyuva, paliyuva lino lyanamuntji hompa wa Babiloni anahomokere Jerusalemu. ³ Mpo ngoli shi ghamba shishewe kuvyuka kundjugho ya kupira kulimburukwa, mushifanikito. Ghamba kwavo, 'Hompa Karunga anakughambo vino: Ghupenu kanyungu muturemo mema. ⁴ Pongayikenu vitaghu vya ndya odo dinakaromo , kehe shitaghu shashiwa - litungu na lipepe - nakuyiyuda navifupa vya viwa. ⁵ Ghupenu vya viwa mughutanga wa ndjwi nakuvipongayika kuntji ya vifupa. Vibwakatitenu ntani nakutereka vifupa ovyo vinakaromo. ⁶ Mpo ngoli Hompa Karunga anakughamba vino: Maudito kushitata sha honde, poto yakutereka yakukara na shitembwe natni osho shitembwe kapi angashitundako. Kughupangamo shimwe shimwe. ⁷ Honde yendi kunakara mukatjikenu. Kwayitura paliwe lyaliwa; kapi ayitetera palivhu na kuyifika na mbundu, ⁸ mpo ngoli nayimono oyo honde ntani kuna kushana kuvyuta rughoko. Nayitura honde yendi paliwe lyaliwa mposhi vapire kuyifika. ⁹ Mpo ngoli shi, Hompa Karunga anakughamba vino: Shinkenda kushitata sha honde. Nganinenepita nka ndambo yavikuni. ¹⁰ Kupongayika vikuni na kuvankeda mundiro. Yiterekenu nyama nawa ntani vongenumo vitovalita ntani vevekenu vifupa. ¹¹ Makura muyitire poto pamakara yamuporongwa, mukuyenyeka na kugeha ge, mposhi nyata yiyengumuke, shitembwe shako shitundeko. ¹² Nampili yidire kudongonokerera shitembwe nashintje mumundiro. ¹³ Ghukaro wenu wakufitaa ntjoni kunakara mukupira ukenu wenu. Nashetekerako kumukenita ene ngoli kapi mwavhulire kukena kunyata yenu, kapi ngamukara nka dogoro nganitikitemo ugara wande pa penu. ¹⁴ Ame, Hompa, navingambipara, ntani nganiviruwana. Kapi nganikuronga ndi nampiri nipwiyumuke. Momo dakalire ndjira denu, ntani momo vyakalire viruwana vyenu, ngavikamupangura - ouno ngo umbangi wa Hompa wakuyulilira. ¹⁵ Makura ayiya nkango ya Hompa kwande, yinakughambo, ¹⁶ ''Monande! Kenga, kuna kughupa mantjo ghoye kuvininke ovyo wahora na mahepeko, ene ngoli washa guva, ntani maruntjodi ghoye ghasha teka. ¹⁷ Unahepa kulira mushipore-pore. Kapishi ngamuturepo litamu lya vafe. Kumange shituku shoye ntani udwate capa doye, ene ngoli washa fika huki da shipara ndi ulye mboroto ya mukafumu ogho aguvo mukonda ya kukombaita mukadendi. ¹⁸ Mpo ngoli naghambire kuvantu vamuliguvo, ntani mukamali wande adohoroka ngurova. Ngurangura makura aniruwana mbyovyo vantantilire niruwane. ¹⁹ Vantu avampura, ''Kapi ghututantera ashi vinke vinakutanta ovyo vininke, vininke ovyo una kuruwana?'' ²⁰ Mbyo naghambire kukwavo, ''Nkango ya Hompa yayiro kwande nakughamba shi, ²¹ 'Ghamba kundjugho ya Israeli, Hompa Karunga kuna kughamba vino: Kengenu! Ame nganidjonaura livango lyaupongoki - mfumwa ya nkondo denu, uwa wa mantjo ghenu, ntani nalinyeneno lya maparu ghenu, ntani vanavenu va vakadona nava vavamati ovo mwashuva kuruku ngavafa kurufuro. ²² Makura ngamuruwane yira momo tupu naviruwana: kapi ngamufika huki denu da kushipara, ndi kulya mboroto ya mukafumu waliguvo! ²³ Mulivango olyo, vituku vyenu ngavikara kumutwe, ntani capa denu dikare kumpadi; kapi ngamuguva ndipo kulira, mpo ngoli shi ngamuyengumuka mumaudona ghenu, ntani kehe mukafumu ngakalilira mukurwendi. ²⁴ Mpo ngoli ashi Ezekiel ngakara shineghedito kwenu, panavintje ovyo anaruwa ngamuviruwana opo ngaviya vino. Makura ngamuyiva ashi ame Hompa Karunga. ²⁵ ''Ene ngoli ove, monande, muliyuva olyo nganighupa ntembeli davo, oro rwakaro shi ndo ruhafo rwavo, mfumwa yavo, ntani novyo vamonanga nakuhora - ntani opo nganighupa vana vavo va vamati nava va vakadona - ²⁶ muliyuva linya, mupopeli ngaya kwenu mukumupa mbudi! ²⁷ Muliyuva lya kanwa koye ngakapaturuka kogho mupopeli nakughamba - kapi ngaukara nkashiporepore. Ngaukara shineghedito kwavo mposhi ngavayivhe ashi ame Hompa.''