¹ Nkango ya Hompa ayiya kwande, nakughamba, ² ''Monande, mpoavali vakadi vaviri, vana va nykwa umwe. ³ Kavarughana viruwana vya ghukumbu mu Egipute muruvede rwa udinkantu. Varuwanine viruwana vya ghukumbu. Mashwe ghavo vaghagama gamine na ndungu ya ghukadona wavo vayidanita kare. ⁴ Madina ghavo Ohola - mukurwavo wa mukondi wa mukadona - na Oholiba - muunyavo wa mukadona. Madina ghavo atamba vino: Ohola kutantashiSamaria, ntani Oholiba kutantashi Jerusalemu. ⁵ Ene ngoli Ohola amonekire ghukumbu nampiri moomo akalire wendi; arumbilire vihora vyendi, vaAssyria ovo vapangiliro, ⁶ vakarelipo ovo vavenino, na vakareli po, vankondo nava vavawa, navantje varume varondire patukambe. ⁷ Mpo akutapire mwene akare shikumbu shavo, kwanavantje varume vamuAssyria, ntani akara wakunyata kwa kehe uno amurumbiliro - na kwakehe shintjwantjwe. ⁸ Kapi asheyekire ghukumbu wendi muEgipute, opo varalire naye ghuye shimpe mukadona wa mwanuke, opo vahovire kukuwana ghuye mashwe shimpe mawawa, opo vahovire kukuwana paureru mundunge da mukadi. ⁹ Mposhi namupire mumaghoko gha vaunyoye, mumaghoko gha vaAssyria ove abumukire. ¹⁰ Avamushutura akare muhere-here, kughupa vana vendi va vamati nava vavakadona, vamudipaghe narufuro, akalire mukatji kavakadi vamweya, ava mughupu ndunge da diwa. ¹¹ Muunyendi wamukadona Oholiba avimonine vino, ngoli aholire nkondo da kukuminikita yira sikumbu kupitakana muunyendi wa mukadona. ¹² Aholire Assyria, vayenditi ovo vatura kumeho, varume ovo kavarondango tukambe, navantje vakalire nkondo, varume va vawa. ¹³ Namumono anakunyateke naumwendi nka shikwagho kuvauni vendi va vakadona. ¹⁴ Ayingipita ghukumbu wendi. Amonine murume ana yeyameno kulikuma, rudi rwa Kaldeyane vapeyinda ugeha, ¹⁵ adwatiro ruvya mumbunda, na nkata pa dimutwe davi. Navantje kwa monikire tupu vampititi vakarukara, omo vaholire vana va vamati vamuBabiloni, wa mumundi wa shirongo sha Kaldeya. ¹⁶ Tupu avakengire mantjo, mpopo avahoro kare vatume mbudi kuva Kaldeya. ¹⁷ Makura vaBabiloni avaya kwendi kumbete yendi yashihoro, avamutura nyata, nayintje vamutulire. Kovyo aruwana vyakunyata, akutura mwene avinyengauka. ¹⁸ Opo atulire limoneko lyendi lyaukumbu na rushonda, ani mutungwiri mughongo, tupu namutungwire mughongo na kumunyenga muunyendi. ¹⁹ Ayingipita ghukumbu wendi ntani asheshupita mayuva gha wanuke opo akalire ghukumbu mushirongo sha Egipute. ²⁰ Adohorokilire va vihora vendi, ovo vakaliro vilyo vyavo yira vya vidongi, novo vakaro ghukafumu wavo yira tukambe. ²¹ Ngoli ayitire lishwau kuvanantjoka, omo vaEgipute vavikengire opo wakushengire nomo wagamine mashwe ghendi gha ukadona. ²² Mpo ngoli shi; Ohaliba, Hompa Karunga aghambire shi, 'Kuture! ngavivyuta vihora vyoye, kovo watunda, nganivayita koye kukehe ruha. ²³ VaBabiloni nava Kaldeya, Pekode, Shoya, ntani Koya, nava Assyria navantje, vankondo, va vawa, varaghuli na vampititi, navantje vanamberewa ntani varume vaukonentu, navantje varondi va tukambe. ²⁴ Ngavaya mumakulimbo na marufuro, natukarukara ngavayendaure mumbunga ya vantu. Ngavatura muragho, tumuragho na magcoko mukudira kuvakwatitako. Nganivapa ruvede ngavakutengeke, ntani ngvakutengeka na kuvitura mushiruwana. ²⁵ Ngani tuma mfudu ya ugara, ngavavikuruwane muugara. Ngavakuteta liyuru lyoye na matwi ghoye, varangweka voye ngavafa kurufuro. Ngavaghupa vana voye va vamati nava va vakadona na varangweka voye ngavavashore na mundiro. ²⁶ Ngavaya kushutura vyuma vyoye nakughupa vimbilingwa vyoye. ²⁷ Mposhi nganighupepo ntjoni doye na ndunge dona doye ntani na limoneko ghukumbu mushirongo sha Egipute. Kapi ngauyerura mantjo ghoye kwavo, ntani kapi ngaghuyaranga nka Egipute. ²⁸ Hompa Karunga aghamba, 'Kuturenu! Nganimutura mu maghoko ghovo mwanyenga, kuvyuka mumaghoko nka ghovo mwadira kuhora. ²⁹ Ngavamuruwanita na nyanya; ngavaghupa mavango ghenu nakugharuwanita nyara-nyara na muhere-here ngaghudwata mpopo ngaukuhamitira murushonda na ghukumbu. ³⁰ Ovino ngavavikuruwana muviruwana vya ghukumbu, lidovaukiro lyoye kuruku rwa mwaka opo ngaukara wakudira kunyata na vintjantjwe. ³¹ Wayenda mundjira ya mukuroye wa mukadona, nganitura nkinda yendi ya matengeko mulighoko lyendi.' ³² Hompa Karunga aghamba vino, 'Ngamunwa nkinda ya muunyoye ya yire na unene. Ngaukara wakushepaghana na mutapi nkango wa muwa - oyo nkinda kwakara nauwa. ³³ Ngavakuywida unkorwi na nkenda, nkinda ya tjutju nakudongonitapo nkinda ya muSamaria. ³⁴ Ngauyinwa dogoro ngayipwe; makura ngauyidjonaurepo na kuyitavaura gcene-ugcene. Nganighamba - ame Hompa Karunga wenu nganivimutantero. ³⁵ Mpo ngoli, Hompa Karunga anakughamba vino, 'Mukondashi mwamvhurama me na kuntura kuruku rwenu, ngamukwama marondoro gha lishwaghu lya nkedi denu na kumoneka muvihoro vya mampempa- mpempa. ³⁶ Hompa aghamba kwande shi, ''Monande, kuvhura upangure Ohola na Oholiba ndi? kulimoneko lyavo, kulishwauko lya viruwana vyavo. ³⁷ Kutundapo varuwanine vya vakurona, ntani kutundapo yakara honde mumaghoko ghavo. Varuwanine vya vakurona na vintjantjwe vyavo, ntani vayitire vana vavo va vamati vapite mumundiro, yira ndya da vintjantjwe. ³⁸ Avatwikiri nka shimpe kuviruwana kwande: Vavo vatulire ntembeli yande nyata, ndyolyo liyuva limwe avashwaulita liyuva lyande lya Sabata. ³⁹ Omo vatwalire mo vana vavo vavangi kuvintjantjwe vyavo. Avakaya nka muntembeli yande ndyolyo liyuva vayayinyateke! Kuturenu! Evino mbyo varuwanine mukatji kandjugho. ⁴⁰ Watuma varume ovo vatundiro kwapeke, kovo vatumine mbudi vayitume - weno kuturenu. ⁴¹ Avakaya, ovo mwakushire, vakwitire mantjo, aghukuvipita naumoye na vimbilingwa. Ngautura shininke shashiwa pambete na pantishe vavitura kuruku oko vatulire maghadi ghendi. ⁴² Liywi lyamuyoyo lya mumbunga lya mukundurukidire mukadi, kuwedererako na vakafumu navantje, nampiri va Sabeyane navo vakavayitire mumbunga oyo, avatura mpande mumaghoko ghavo na nkata dadiwa mudimutwe davo. ⁴³ Animutantere mukadi ogho vakarondire vakondi, 'Ngoli ngavakara likaro panyama naye. ⁴⁴ Avayendi kwendi avakara naye murume amutura shikumbu. Oruno ruvede avakarara na Ohola na Oholiba, ovo vakaliro vakadona va vadona. ⁴⁵ Ene ngoli kughupapo ndjo varume ngapita mumpanguro na matengeko gha vakondi, ngavatengeka na kuvatura mumundulye wa honde, mukonda vakondi vavo ovo vavayito mumaghoko ghavo. ⁴⁶ Hompa Karunga aghamba vino: Nganiturapo mbunga oyo ngayimutjilito ngavamumange. ⁴⁷ Oyo mbunga yo ngayimutoghona na mawe ntani nakumubotaura na marufuro. Ngavadipagha vana venu va vamati nava va vakadona ntani nakushora ndjugho denu. ⁴⁸ Ame ngani ghupapo ntjoni naukaro dona mushirongo kuvashongomenita vakadi navantje mposhi kapi ngavakare nka shimpe ghukumbu. ⁴⁹ Ngavatura ntjoni nandunge dona denu. Ngamushimba nkenda da ndjo da vintjantjwe, mundjira yino ngamuyiva ashi ame Hompa Karunga wenu.