¹ Makura nkango ya Hompa ayiya kwande, na kughamba shi, ² ''Weno ove, monande, kuvhura upangure ndi? Kughupangura nkurumbara ya honde? Murenkite ayive mafingo ghendi naghantje. ³ Ove unakona kughamba, 'Hompa Karunga ana kughambo vino: Eyino nkurumbara oyo yina kuteto honde mukashi kendi mpo ashi shirugho shendi ngashivura kuya; nkurumbara oyo yaruwanango mafano gha vikarunga mukukunyatikita mwene. ⁴ Ove unakara mudjoni kuhonde oyo wateta, ntani ove unanyata kuavakarunga ovo wakuruwanenanga. Ove washeshupita mayuva ghoye papepi, ntani ghuhura wa mwaka doye unatiki mo. Mpo ngoli shi asme nganikenita ghuyakununuke kuvirongo ntani shighunda sha kushepa kuvirongo navintje. ⁵ Navantje ovo vakaro pepi ntani novo vakaro kughure nanwe ngavamushentja - mwanyateka nkurumbara - na mapuliro ghayuviko nakuntje yira kwayura mayaghano. ⁶ Kengenu! Vampititi va Israeli, kehe ghumwe na unankondo wendi, anaya kukwenu ayatete honde. ⁷ Vavo kapi vafumadeka vasha na vanyokwa mukashi kenu, ntani vavo varuwana valihepeko ku vantundavirongo mukashi kenu. Vavo vahepekire vantiwe na vafita vya mukatji kenu. ⁸ Ame mwanyenya vininke vyande vyakupongoka ntani kapi mwafumadeka Sabata yande. ⁹ Vakafumu va vimpempa vanaya mukatji kenu na shitambo sha kuyateta honde, ntania vavo kwa lyeranga pa mandundu. Vavo kwaruwananga udona mukatji kenu. ¹⁰ Mukatji kenu vantu mwafukura muhere-here wa vasha venu. Mukatji kenu vavo vadjonaura vakamali vakunyata muvirugho vyavo vya kushidira. ¹¹ Vantu ovo varughano mashwauro gha vakamali va vamaparambo vavo, ntani vakafumu ovo varuwanita vaghuni kadona vavo mwamudona - vana kadona va vasha vana ghumwavo - navintje vino kwaviruwananga mukatji kenu. ¹² Vakafumu vano kwaghupanga mfuto da vimpempa mukatji kenu na shitambo sha kuteta honde mbyo mwavitambura na kuwana viyeramo vya vingi, ntani mwa djonaura va maparambo venu kupitira mu mahepeko, ntani anwe mwa mvhurama me - elino lidukuro lya Hompa Karunga. ¹³ Kenga! Nalighoko lyande ame nateta vimpempa yeramo ovyo mwaruwana, ntani naliteto honde olyo linakushoroko mukatji kenu. ¹⁴ Dimutjima denu ngadiyimana, maghoko ghenu ngaghakara nkondo mumayuva opo ame naumwande nganiviruwana nanwe? Ame, Hompa, nakudukuro vino, ntani ame nganiviruwana. ¹⁵ Mpo ngoli ame nganimuhanitira anwe mukatji kavirongo na kumugawinina mwayendo livhu. Mundjira yno, ame nganidipagha linyato lyenu kukwenu. ¹⁶ Mposhi anwe ngamukara vakunyata mumantjo gha virongo. Makura anwe ngamuyiva ashi ame Hompa.''' ¹⁷ Vyakukwamako nkango ya Karunga ayayiya kwande, nakughamba, ¹⁸ ''Monande, ndjugho ya Israeli yina kara udona kukwande. Navantje vihupwa vya vikugho vy kupira mulyo na vitoromani, ntani vikugho na roto mukatji kenu. Vavo ngavakara yira poto wa shishiliveli mulidiko lyenu. ¹⁹ Mpo ngoli Hompa Karunga akuna kughamba vino, 'Mukonda anwe namuvantje munakara navihupwa vya shishiliveli, mpo ngoli shi, kenga! Ame kuna kushana kumupongeka anwe mukatji ka Jerusalemu. ²⁰ Yira moomo vapongeka vakafumu shiliveli, roto, vitoromani na viruhupwa vyavikugho nakuvitura mulidiko vavihemune, ntani vavo ngavafude mundiro pavyo nashitambo shakuvihemuna, mpo ngoli ame nganimupongeka anwe muugara wande na munyanya yande, ntani ame nganimutura moomo nakuhemuna. ²¹ Ame nganimupongeka ntani nakufudira mundiro pa penu muugara wande, ntani anwe ngamuhemuka mukatji kavyo. ²² Yira moomo vahemunanga shiliveli mulidiko, nanwe ngavamuhemwina mwavyo, ntani anwe ngamuyiva ashi ame, Hompa, natetere ugara wande pa penu!''' ²³ Nkango ya Hompa ayiya kwande, yinakughambo, ²⁴ ''Monande, ghamba kwendi, 'Ove livhu olyo vapira kukenita. Kundereko mvhura muliyuva lya ugara! ²⁵ Kundereko lighano lya mughumbembe mukatji kendi, yira nyime wakununga ana kutetauro muntu wakukukarera. Vavo kumina liparu na kughupa ugova wa uwa; vavo kurenkita vafita vya va vayingi mukatji kavo! ²⁶ Vapilisteli vendi kuruwana lidjonauro kuveta yande, ntani vavo kunyatikita vininke vyande vyakupongoka. Vavo kapi vagaununanga pakatji kavininke vyakupongoka na vininke vya kunyata, ntani kapi vashonganga makushekuno ghovyo vya nyato novyo vya keno. Vavo kuhoreka mantjo ghavo ku maSabata ghande mposhi vanyatikite mukatji kavo. ²⁷ Vana va vamati vahompa mukatji kendi kunafana yira mambungu ghanakupapauro vantu vakukukarera. Vavo kuteta honde ntani kudjonaura liparu, vawanemo viyeramo muvimpempa. ²⁸ Vaporofete vendi kwavapeyinda peyinde ya yikenu; vavo kumona mamoneko gha vimpempa ntani kupumbwa vininke vya mapuko kukwavo. Vavo kughamba ashi''Hompa Karunga anatanto vino'' kuno Hompa ahana kughamba. ²⁹ Vantu vamushirongo kwahepeka kupitara mu mutininiko ntani nakushakana kupitira muwidi, ntani vavo kuhepeka vahepwe novo vahepo vintu, ntani nakuhepeka vantundavirongo pa hana nkenda. ³⁰ Mpo ngoli me napapalire mukafumu mumwavo ogho ngavuro kudika likuma ntani ogho ngavhuro kuyimana kughuto wande mukatji kashirongo mpo ngoli me nganidira kushidjonaurapo, ene ngoli ame kundereko ogho nawana. ³¹ Mpo ngoli ame nganitetera ugara wande pavo. Ame nganivamanapo na mundiro wa naghumwande ntani nakutulitapo ndjira davo mudimutwe da naumwavo - elino lidukuro lya Hompa Karunga.'''