¹ Elyo Yesu atampile ukubasambilisha mu milumbe. Atile, ''Umuntu alimine ibala lyamyangashi, ashungulwisheko nelinga, aimbile necilindi umwakukamina umwangashi. Akuliilemo nolupungu elyo alishiile kubalimi nokuya pa bulendo. ² Panshita isuma atumineko umubomfi kubalimi ku kusendako ifisabo fya myangashi basomwele. ³ Leelo bamubulile, bamumine nokumutamfya nokuya nangu kamo. ⁴ Kabili atumineko nomubomfi naumbi, bamucenene ku mutwe nokumusebanya. ⁵ Nakabili atumine naumbi, uyu ena balimwipeye. Bacitile ifi nakulibambi abengi, baleboma nabambi balebepaya. ⁶ Kuli ena kwashelefye umwana umwaume uyo atemwishishe. Ewali uwakulekelesha ukutuma kuli bena. Apo mwana wandi bakamucindika.'' ⁷ Leelo abalimi ba myangashi balaiipusha, ''Uyu nimpyani yakwe iseni tumwipaye, nebala likaba lyesu.'' ⁸ Bamubulile, bamwipeye, bamuposele nakunse yebala. ⁹ Bushe umwine webala akacita shani? Umwine webala akesa onaula abo balimi bamyangashi nokupeela ibala kuli bambi. ¹⁰ Bushe tamwabelenga aya malembo? 'Itafwali ilyo bakakula basuliile ilyo baishilebika pa cifutu ca ng'anda. ¹¹ Ici cafumine kuli shikulu, kabili cakupapa kuli ifwe fwebaleimwena.'' ¹² Panuma ici intungulushi sha ba Yuda shafwaile inshila yakwikatilamo Yesu pantu balilwike ukuti ebo aleumina umulumbe. Leelo baletina icintubwingi. Eico bamushile nokuya. ¹³ Kabili batumine aba Falise bamo na bena Helodi ukufwaya inshila yakumwikatilamo mumilandile. ¹⁴ Elyo baishile, batile kuli wene, ''Kasambilisha talishiba, ukuti tamutina muntu nangu umo kabili uli wacishinka tawakwata kapatulula pa bantu. Icine ufunda inshila ya kwa Lesa. Twebe bushe calisuminishiwa ukupeela umusonko kuli Kaisala nangu iyo? Tufwile ukupeela nangu iyo?'' ¹⁵ Leelo Yesu aishibe bumumbimunda bwabo epakubeba ati, ''Ninshi ico mulengesesha? Leteni ulupiya, ndoleshepo.'' ¹⁶ Baleteele impiya imo kuli Yesu. Atile kuli bena, ''Cilungi cakwa naani ici? Nabo batiile, ''Cakwa Kaisala.'' ¹⁷ Yesu atile, ''peleeni Kaisala ifya kwa Kaisala, na kuli Lesa ifya kwa Lesa.'' Nomba bapapwike kufyo ayaswike. ¹⁸ Kabili aba Sanduki, abatile takwaba kushukuka baishile kuli wene. Bamwipwishe batiile, ¹⁹ ''Kasambilisha, Mose atulembele ati, ''Ngacakuti umwaume afwa elyo asha umukashi wakwe ukwabula umwana, munyina afwile abuula umukashi wakwa munyina pakuti afyaliko munyina abana.' ²⁰ Kwali bamunyina,cine lubali; uwakubalilapo alyupile umwanakashi napanuma alifwile,tafwelepo mwana. ²¹ Nowabubili amupile napanuma afwiile nao,ukwabula ukufyalamo umwana, nowacitatu nao cimocine. ²² Uwalenga cine lubali nao afwile ukwabula ukufyalamo umwana.Napakulekelesha umwanakashi nao afwile. ²³ Nomba pakushukuka kwabafwa,akaba mukashi wakwa naani? pantu bonse cine lubali balimupile.'' ²⁴ Yesu atile, ''Tali uku ekuluba kwenu, pantu tamwaishiba amalembo nangu amaka yakwa lesa? ²⁵ Pantu elyo bakashukuka kubafwa, takwakabe ukupa nangu ukupwa, pantu bakaba nga bangeli mumulu. ²⁶ Nomba pamulandu wakushukuka kwabafwa, bushe tamwabelenga mwibuku lyakwa Mose, palwacimpusa calepya, ifyo Lesa wakwa Abramu kabili Lesa wakwa Isaki kabili Lesa wakwa Yakobo?'' ²⁷ Te Lesa wabafwa, lelo waba mweo. Mwaliluba.'' ²⁸ Umo uwabakalemba bamafunde aumfwile ifyo balelanshanya, amwene ukuti Yesu ayasuka bwino. Aipwishe Yesu ati, ''Bushe lifunde nshi ilya cila pamafunde yons?'' ²⁹ Yesu amwaswike ati, ''Ilyacila yonse nili, 'Umfwa we Israeli, imfumu Lesa wesu, imfumu yabafye imo. ³⁰ Uletemwa imfumu Lesa obe no mutima obe onse, nomweo obe onse, namano yobe yonse, namaka yobe yonse.' ³¹ Ilyabubili nili, 'Uletemwa umubiyo ngefyo waitemwa.' Takwaba limbi ilyacila pali aya.'' ³² Kalemba wamafunde atiile, ''Cisuma kasambilisha! Wayasukafye bwino ukuti Lesa abafye umo kabili takwaba naumbi. ³³ Walungika mukwasuka ukutemwa Lesa obe no mutima obe onse, nomweo obe onse, namaka yobe yonse elyo nokutemwa umubiyo ngefyo waitemwa fyalicila ifyakoca fyabulambo bwa kwa Lesa.'' ³⁴ Elyo Yesu amwene ukuti ayasuka bwino atile kuli wene, ''Tauli ukutali nobufumu bwa kwa Lesa.'' Panuma yaifyo tapali uwatwalilile ukwipusha Yesu amepusho. ³⁵ Elyo Yesu acili alesambilisha mu mansa ya chalici; atile ati, ''Cinshi bakalemba bamafunde balandila ati Yesu nimwana Dabidi? ³⁶ Libe Dabidi umwine, mu mupashi wa mushilo, atile, 'Imfumu yaeba imfumu yandi, ''Ikala kukuboko kwa kukulyo kwandi mpaka nkacile abalwani bobe apakunyanta amakasa yobe.'' ³⁷ Dabidi umwine amwita ati 'Imfumu,' nomba Kristu kuti aba shani mwana Dabidi? Icintubwingi calemukutika nokusekelela. ³⁸ Mukusambilisha kwakwe Yesu atiile, ''Muleba abacenjela nabakalemba bamafunde balitemwa ukwenda nemingila iitali nokutemwa ukulabaposha mu mansa shafisankano ³⁹ nokuipeela ifipuna ificililepo mu masina goge nencende isha cindama pamalila. ⁴⁰ Kabili aba bantu baliila bamukamfwilwa ifyuuma, nokutemwa ukupepa amapepo ayatali pakuti abantu babamone. Aba bantu eba Lesa akakandisha icine cine.'' ⁴¹ Elyo Yesu aikele apalungatene nembokoshi baleeposamo ubupe. Abakankala abengi baletuula ulupiya ulwingi. ⁴² Elyo kwaishile namayo mukamfwilwa umulanda saana ena atuliile utundalama tubili utunono uto akwete. ⁴³ Aitile abasambi bakwe nokubeba ati, ''Ndemweba icine cine nati, '' Uyu mukamfwilwa atuula ukucila bonse. ⁴⁴ Pantu aba bonse bacituula ukufuma pamiina yalupiya yabo. Leelo uyu mukamfwilwa, mu bupina bwakwe, atuula utulupiya twakwe tonse uto aciba nokubomfya.''