¹ Sô ê ra whã dia yô nkênu ta ka pemé boro Jizu pa ane ndê lumba Dessu, sô Ê ta ndjoru zuntu aua genesaré. Ê ² bê dosu vapô boro aua, sô piskaró ê ku ta desé vapô tá ka laba lélê. ³ Sô Ê subi letu whã ané vapô, ku sa di Simon, sô ê pindji pa siê txo ku vapô paia. Jizu tasó letu vapô ka sina yô nkênu. ⁴ Ola ê sina lokê, Jizu fa Simon: bé ku vapô aua fundo ba lêlê sê. ⁵ Sô Simon kundjé: Mésé-ê, nón taba suku têlu nón na tamba né whã kua-ua, mazi punda ô ku lumba ô ngá léga lêlê. ⁶ Sô ola ané jikué, ané tê yô kikê ma lêlê komesa ka fono. ⁷ Sô ané zi sinali sama ané melu ané ni ôtô vapô di bi zura ané, ané sia dosu vapô ku ta kuazi funda. ⁸ Ola Simon Peru bê kua-é, ê pê puna só, da Jizu fá: Sumu ê fô kota-ô punda un sá whã omé pekarô. ⁹ Sô ané ku turu nkênu fika soblaru ku tamba ku ané zi. ¹⁰ Mora é mé Txiagu Zon ná Zebereu, ku ta sisi ku Simon. Sô Jizu fa Simon: Namendua, punda ni aié bokasa piskarô omé. ¹¹ Ola ané bi ku vapô paia, ané desa turu kua sigui Jizu. ¹² Sô ola ê ra, Ma Ê ta whã posó, nha ta ku whã Omé siaru lepla. ola ê bê Jizu, ê pê puna só bila poló ba só, pindji fa: Sumu-ê se ê sa vonte ô, dipa un. ¹³ Sô Jizu sendê mó Rê sô tê, fa: yé sa vonté un. sá limpu ola é mé lepla desé. ¹⁴ Ê siné, pa ê na fa néwhã nkênu wha, mazi ê fa ané: lêlê mondja ô musa ané sefi nguêza ra whã sakifiso pá ô sa limpu mora ma Muzé manda rá sesemunha. ¹⁵ Sô, a ndê kua Rê masi andá ma yô nkenu bi pa ané ndê Jizu ka sina pa ané sa kularu di doetxi ané. ¹⁶ Ku turu kua-é Ê siê ba whã nga êlê sô ba fa lason. ¹⁷ Ê ra ma whã ria Jizu ta ka sina, sô nha ta ku fasu mese ku mese alê tasoru petu Rê. Sô ané bi di yô flegueja kiba Zure ku Galileia ku posó Jeruzalé. Sô porê Sun ta kuê di kula. ¹⁸ Sô whã dosu Omé bi kégaru ni whã kama ku whã Omé ku ta lezaru, ané ngoló whã mora di bi kuê letu whã nga, di pê numi wê Jizu. ¹⁹ Mazi punda yô nkênu ku ta nha ané na poiwa, anto ané subi diba kai, biri teia, desê Omé-é ku kama rê katxi yô nguê, plopi wê. ²⁰ Jizu bê afé ané, Ê fa: Omé-é, a pura pekaru ô. ²¹ Ané sefi nguêza ku fasu mese komesa ka ngolo ta, ka fa: nguê sa nguê i ku ka fa mali-é! Deau sô ka pora pekaru. ²² Mazi Jizu, bi ta kua ma ané ta ka pesa, Ê kundji fa ané: punda kuai ma sê ka ngolo ta kua-é ni koso sê! ²³ Kuai ka kusta sê fá: turu pekaru ô a poré, ô lata ndá! ²⁴ Yé pa sê ta ma Ná Omé tê porê ni tia di pora pekaru, ngá fá ô: Lata tua kama ô bêô kai ô. ²⁵ Pá sô ê lata wê ané, tua kama mé ta né dumiru sô ê ba kai rê ba gôgô ku Dessu. ²⁶ Turu nkênu babaka, ka gôgô Dessu ku yô mendu ka fa: oze nón Bê kua fina foga whã. ²⁷ Kua-é pasa Jizu siê fô nha ê bê whã kobladô impostu ma ka sama Livi tasoru whã ngá ka impostu. Sô Jizu fé: Lêlê un. ²⁸ Livi desa turu kua, lata sigui Jizu. ²⁹ Sô Livi luma whã fesa ngai dá Jizu kai rê. Yô koblarô impostu ku ôtô nkênu ta mesa ku ané. ³⁰ Sô ané fasu mese ku sefi nguêza nákulu ta ka fa ané melu Jizu: Ra kuai ma sê ka mé ka bêbê ku koblarô impostu ku ôtô pekarô. ³¹ Jizu kundji ané Nkênu ku sauri na ka mêsê dotolô whã ku doetxi sô. ³² Na bi sama zusto wha, mazi mbi sama pekarô ku ka leplende! ³³ Ané Faré, ané melu Zon kata jinzun ka fá lasó, ku melu fasu sefi turu. Mazi melu ô ka mé ka bêbê. ³⁴ Jizu fa ané: whã nkênu ka pô kuvira whã kazamentu ni jinzun ku Omé kazaru kota rê! ³⁵ Mazi ê ka bi siga ria ma kazaru ka siê, diê ané ka zinzua. ³⁶ Sô Jizu tanga ané whã vesu: né whã nguê na ka txia ndjigui kabisi novu ba dêtê kabisi vé wha, punda si a zi kua-é, kabisi novu ka fonó, sô nga ma a buté né na ka rá ku kabisi vé wha. ³⁷ Né whã nkênu na ka pê, Vin novu ni buli vé wha, si a zi kua-é vin novu ka kebia buli sô vin ka lukua y buli ka taia. ³⁸ Mazi vin novu ka sa letu buli novu. ³⁹ Né whã nkênu ku ka tua vin vé, ka mese tua vin novu, sô fá: vé sô sa buaru.