¹ Kwenteka ngekushesha emvakwa loko Jesu wahamba emadolobheni nemakhaya, ashumayela aphindze amemetela livangeli lembuso waNkulunkulu. Labalishumi nambili bebanaye, ² kanye nebesifazane labatsite labebaphulukisiwe emadimonini nasetifeni; Mariya waseMagadala, loyo lokwakhishwa emadimoni lasikhombisa, ³ Juwana, umfati waKhuza, meninjeli waHerodi ; Susana; nalabanye labanyenti, lababetsatsa engcebeni yabo, banakekela tidzingo tabo. ⁴ Ngalesikhatsi sicuku sebantfu sihlangene, kantsi nebantfu bebeta kuye basuka emadolobheni onkhe, wabatjela umfanekiso;'' ⁵ Umlimi waya kuyohlanyela inhlanyelo. Asahlanyela, lenye yawa ngaphandle kwemgwaco bayinyatsela ngaphansi kwetinyawo, netinyoni letindizela emoyeni tayidla. ⁶ Lenye yawela emadvwaleni, yatsi nje isakhula, yabuna, ngoba yayingenamswakama. ⁷ Lenye yawela emkhatsini wemanyeva, nemanyeva akhula kanye kanye nenhlanyelo ayiminyanisa. ⁸ Kepha lenye yawela emhlabatsini lononile yakhicita silimo lesasilikhulu kakhulu kunakucala.'' Ngemuva kwekutsi Jesu atisho letintfo leti, wababita, ''Loyo lonetindlebe tekuva, makeve.'' ⁹ Bafundzi bakhe bambuta kutsi usho kutsini lomfanekiso. ¹⁰ Watsi, ''Lwati lwetimfihlo tembuso waNkulunkulu setiniketwe kini, kepha kulabanye ngikhuluma ngemfanekiso, khona lapho lababonako ngeke babone, nalabevako ngeke bakhone kucondza'. ¹¹ Nyalo ke nayi ichazelo yalomfanekiso: Inhlanyelo ilivi laNkulunkulu. ¹² Labo labakulendlela ngulabo labevile, kepha kwabese kufika sathane watsatsa livi etinhlitiyweni khona bangetu kholwa baphindze basindziswe. ¹³ Leyo lesedvwaleni ngulabo, mabeva livi, balemukele ngenjabulo. Kepha bababete timphandze; bakholwa kwesikhashana, ngesikhatsi sekuvivinywa bayawa. ¹⁴ Lenhlanyelo layawela emkhatsini wemanyeva bantfu labeva livi, kepha nabasachubeka nendlela, baminyaniswa yiminako nemicebo nenjabuliso yalokukuphila, netitselo tabo atikhuli. ¹⁵ Kepha lenhlanyelo lewela emhlabeni lolungile, labo ngulabatsi nabeva livi ngekwetsembeka nebuhle benhlitiyo, bayalibamba balivikele ukuze bakhicite titselo ngekubeketela ngekucinisela. ¹⁶ Kute namunye lokhanyisa sibane abese usivala ngendishi nome asibeke ngaphansi kwembhedze. Lokungenani ukubeka etikwesitja sekukhanyisa khona wonkhe longenako akubone kukhanya. ¹⁷ Ngoba kute lokufihlakele lokungayuwateka, futsi kute lokuyifihlo lokungayuwateka kuphindze kuvele ekukhanyeni. ¹⁸ Ngako lalela ngekucaphela, kuloyo lonako, lokunyenti utoniketwa lokunyenti kuye, kepha loyo lote lutfo, naloko lacabanga kutsi unako uyakwemukwa kona.'' ¹⁹ Bomake wakhe nabomnakabo beta kuye kepha abakhonanga kuta edvute naye ngenca yeticuku. ²⁰ Watjelwa, 'Make wakho nabomnakenu bakumele ngaphandle bafuna kukubona.' ²¹ Kepha Jesu waphendvula watsi kubo, 'Make wami nabomnaketfu ngulabo labeva livi laNkulunkulu balente.'' ²² Ngalelinye lilanga wekhwela umkhumbi nebafundzi bakhe, watsi kubo, ''asambeni siye ngesheya kwelwandle. ''Bachubeka bawelela ngesheya. ²³ Kepha basahamba walala. Umoya losivunguvungu wacala wahhusha elwandle, phindze umkhumbi wabo wagcwala emanti, babasengotini. ²⁴ Ngalokunjalo bafundzi baJesu beta kuye bamvusa batsi, ''Mfundzisi! Mfundzisi! sesitokufa!'' Wavuka wawekhuta lomoya neludlame lemanti, konkhe kwema, kwaba nekuthula. ²⁵ Wase utsi kubo, ''Kuphi kukholwa kwenu?'' Kepha bebasaba futsi bamangala babutana bodvwana,'' Ngubani kantsi lona, lotjela umoya nemanti, kumlalele?'' ²⁶ Bachubekela balibangisa esifundzeni sase Gerasa, lebe ngungesheya kwelwandle iGalile. ²⁷ Lapho Jesu wehlela emhlabatsini, wahlangana nendvodza letsite kulelidolobha lebeyinemadimoni. Kwakusikhatsi lesidze angakagcoki timphahla, futsi angahlali endlini kepha emkhatsini wemathuna. ²⁸ Makabona Jesu, wakhala wawa phansi phambi kwakhe watsi ngeliphimbo lelikhulu, ''Utihluphelani ngami, Jesu, ndvodzana yaNkulunkulu lophakeme? Ngiyakucela,ungangihlukumeti.'' ²⁹ Ngoba Jesu bakatjele umoya longcolile kutsi aphume kulendvodza. Besekungemahlandla lamanyenti, noma bekabophe ngetinketane aphindze agcinwe agadziwe, bekaphule tinketane bekahanjiswa ngemadimoni aze amuyise ehlane. ³⁰ Wase Jesu uyambuta, ''Ungubani libito lakho?'' Watsi, ''Legiyoni,'' emadimoni lamanyenti beka ngene kuye. ³¹ Bekamncenga kutsi angawatfumeli emgodzini longenamkhawulo. ³² Kwakukhona umhlambi wetingulube lobekatidlela emagcumeni. Lamadimoni amncenga kutsi awayekele angene kuto, futsi wawanika imvumo. ³³ Lamadimoni aphuma kulendvodza acondza etingulubeni, nemhlambi waphutfuma wehla emagcuma angena elwandle ancwila. ³⁴ Mababona labebanakekela tingulube loko lokwakwentekile, bagijima babatjela ngalokwentekile edolobheni nase macentselweni. ³⁵ Ngako ke bantfu bahamba bayobona kutsi kwakwentekeni, babese beta kuJesu bakhandza lendvodza lebekuphume emadimoni. Bekahleti etinyaweni taJesu, agcokile nasengcondvweni lekahle; batfuka. ³⁶ Nalabo labebabonile babatjela ngalendvodza lebeyinemadimoni kutsi iphilisiwe. ³⁷ Bonkhe bantfu bakuleso sifundza sase Gerasa bacela Jesu kutsi akesuke kubo, ngoba bebangenelwe kwesaba lokukhulu. Wangena esikebheni khona batawubuyela emuva ³⁸ Lendvodza lapho emadimoni bekaphume khona yamncenga kutsi amyekele ahambe naye, kepha Jesu wamtfula khashane, watsi,'' ³⁹ Buyela ekhaya lakho ubatjela ngaloku Nkulunkulu abakwentele kona.'' Lendvodza yahamba ngendlela, amemetela kulolonkhe lidolobha ngaloko Jesu labementele kona. ⁴⁰ Nyalo ke Jesu nakabuya, sicuku samemukela, ngoba bebamlindzele. ⁴¹ Buka la, indvodza lelibito layo kungu Jayiru, beka ngulomunye webaholi beli sinagogi, weta wawa phansi etinyaweni taJesu, wamncenga kutsi ete endlini yakhe ⁴² Ngoba indvodzakati yakhe lekuphela kwayo, intfombatana leneminyaka lelishumi nambili budzala, beyifa. Njengoba Jesu bekasendleleni, sicuku sebantfu samgegeletela madvute naye. ⁴³ Nyalo bekunemfati khona lapho lebekopha iminyaka lelishumi nambili besasebentise yonkhe imali yakhe, futsi angakhoni kuphiliswa nanoma ngubani. ⁴⁴ Weta ngemuva kwaJesu watsintsa umphetfo welijazi lakhe, ngesikhashana nje kopha kwama. ⁴⁵ Jesu watsi, ''Ngubani longitsintsile?'' Bonkhe baphika, Phetro watsi, ''Mholi, lesicuku sebantfu bakhona madvute nawe futsi bayasondzela madvute nawe.'' ⁴⁶ Kepha Jesu watsi, ''lomunye ungitsintsile, ngiyati kutsi emandla sekaphumile kimi.'' ⁴⁷ Nakabona lomfati lokutsi ngeke asakhona kubaleka angakabonwa, weta atfutfumela wawa phambi kwakhe. Ebukhoneni babo bonkhe labantfu wachaza kutsi umtsintse leni yena nekutsi ngesikhashana uphilisiwe. ⁴⁸ Wase utsi kuye,'' ndvodzakati, kukholwa kwakho kukuphilisile. Hamba ngekuthula.'' ⁴⁹ Kusenjalo asakhuluma, lomunye weta achamuka endlini yemholi welisinagogeni , atsi, ''Indvodzakati yakho seyifile. Ungasachubeki nekumhlupha umfundzisi.'' ⁵⁰ Kepha Jesu nakakuva loko, wamphendvula Jayiru,'' Ungesabi; kuphela kholwa, utowuphiliswa.'' ⁵¹ Maketa endlini, akavumelanga nanome ngubani kutsi angene naye, ngaphandle kwa Phetro naJohane kanye na Jakobe na babe walomntfwana namake wakhe. ⁵² Nyalo bonkhe bebazilile bakhalela yena, kepha watsi, ''Ningakhali; akafi kodvwa ulele.'' ⁵³ Kodvwa bamhleka yena, bebati kutsi ufile. ⁵⁴ Kodvwa wamtsatsa ngesandla wambita, watsi,''mntfwana, sukuma!'' ⁵⁵ Umoya wakhe wabuya, wasuka ngaleso sikhatsi. Wabatjela kutsi abamtfolele langakudla. ⁵⁶ Batali bakhe bamangala kakhulu, kodvwa wabatjela kutsi bangatjeli muntfu loko lekwakwentekile.