¹ Manje kwenteka labantfu basese tungelete Jesu balalela livi laNkulunkulu, kutsi abeme eceleni kwelwandle laseGenesaretha. ² Wabona tikebhe letimbili tidvonselwe eceleni kwelwandle. Labadwebi bebaphumile kuto futsi bebawasha emanetha abo. ³ Jesu wangena kusinye sikebhe, lebesisa Simoni, wabese umcela kutsi akhweshele emantini khashanyana nemhlaba. Wabese uhlala phasi wabafundzisa bantfu akulesikebhe. ⁴ Uma asacedzile kukhuluma, watsi Simoni, ''Tsatsani lesikebhe niye ekujuleni kwemanti bese nehlise emanetha enu nitobamba.'' ⁵ Simoni waphendvula watsi, ''Mfundzisi, sisebente busuku bonkhe, futsi asikabambi lutfo, kepha ngelivi lakho, ngitawulehlisa lelinetha.'' ⁶ Uma sebakwentile loku, babamba inombolo lenkhulu yetinhlanti, futsi nemanetha abo abesadzabuka. ⁷ Ngako batjela balingani babo kuletinye tikebhe kutsi bete batobasita. Beta bagcwalisa letikebhe totimbili, kangangekutsi bese ticala kucwila. ⁸ Kepha Simoni Phetro, nakakubona kona, wawa ngemadolo phasi kuJesu', watsi, ''Suka kimi, ngobe ngingiyindvodza lesoni , Nkhosi.'' ⁹ Ngobe abemangaliswa, nabo bonkhe bebanaye, ekubanjweni kwetinhlanti letatsatfwa. ¹⁰ Loku kufaka ekhatsi Jakobe naJohane, emadvodzana aZebedi, lebebasebentisana naSimoni. Jesu watsi kuSimoni, ''Ungesabi, ngobe kusukela lamuhla utawudweba bantfu.'' ¹¹ Ngesikhatsi sebaletse tikebhe tabo emhlabatsini, bashiya konkhe bamlandzela. ¹² Kwefika lapho kutsi uma asese kulinye lemadolobha, bekunendvodza lenebulephelo. Uma abona Jesu, waguca ebusweni bakhe wamcela, atsi, ''Nkhosi, uma ufisa, ungangenta ngihlanteke.'' ¹³ Wabese Jesu welula sandla sakhe wamtsintsa, atsi, ''Ngiyafisa. Hlanteka.'' Naleso sikhatsi bulephelo bamshiya. ¹⁴ Wamyala kutsi angatjeli muntfu kepha wamtjela, ''Hamba endleleni yakho, uyotiveta kubaphristi bese unikela umhlatjelo wekuhlambuluka, ngendlela leyashiwo nguMosi, kuze kube bufakazi kubo.'' ¹⁵ Kepha lombiko ngaye wandza indzawo yonkhe, futsi ticuku tebantfu letinkhulu teta kanyekanye kutowulalela yena afundzisa nekuphiliswa etifeni tabo. ¹⁶ Kepha abehlale abahlamuka kuletindzawo letisehlane bese uyothandaza. ¹⁷ Kwefika lapho kulinye lalawo malanga kutsi asafundzisa, bekunebaFarisi nebafundzisi betihlalo letiphasi labo labachamuka kuto tonkhe tigodzi taseGalile naseJudiya naseJerusalema. Emandla eNkhosi abenaye kuphilisa. ¹⁸ Manje lamanye emadvodza eta atfwele indvodza ngelihlaka lobekakhubatekile, babese bafuna indlela yekumuletsa phakatsi kute abekwe phasi phambi kwaJesu. ¹⁹ Abayitfolanga indlela yekumletsa ngekhatsi ngenca yalesicuku, ngako baya etulu kwendlu behlisela lendvodza phasi emathayeleni, eluhlakeni lwakhe, emkhatsisini walabantfu, embikwaJesu. ²⁰ Abona lukholo lwabo, Jesu watsi, ''Ndvodza, tono takho ticolelwe.'' ²¹ Tati temtsetfo nebaFarisi bacala kukubuta loku, titsi, ''Ngubani lona lokhuluma kuhlambalata? Ngubani longacolela tono phandle kwaNkulunkulu kuphela?'' ²² Kepha Jesu, akubona lebebakucabanga, waphendvula watsi kubo, ''Nikubutelani loku etinhlitiyweni tenu? ²³ Ngukuphi lokumelula kukusho, 'Tono takho ticolelwe' nome kutsi 'Sukuma uhambe'? ²⁴ Kepha kutsi nati kutsi iNdvodzana yeMuntfu inemagunya emhlabeni kucolela tono,''- watsi kulendvodza lebeyikhubatekile- ''Ngiyakutjela, sukuma, utsatse luhlaka lwakho bese uya endlini yakho.'' ²⁵ Ngaleso sikhatsi wasukuma phambi kwabo watsatsa luhlaka lwakhe lebekalele kulo. Bese waya endlini yakhe, advumisa Nkulunkulu. ²⁶ Wonkhe umuntfu abemangele badvumisa Nkulunkulu. Bebagcwele kwesaba, batsi, ''Sibone tintfo letingaka jwayeleki lamuhla.'' ²⁷ Emvakwa letintfo leti tentekile, Jesu waphuma lapho wabona umtselisi libito nguLevi ahleli ethendeni lebatselisi. Watsi kuye, ''Ngilandzele.'' ²⁸ Ngako Levi wasukuma wamulandzela, washiya konkhe ngemuva. ²⁹ Wabese Levi wentela Jesu lidzili endlini yakhe. Bekunebatselisi labanyenti lapho nalabanye labebahlangene etafuleni futsi adla nabo. ³⁰ Kepha labaFarisi netati temtsetfo bebakhonona kubafundzi bakhe, batsi, ''Leni adle anatse nebatselisi netoni?'' ³¹ Jesu wabaphendvula, ''Bantfu labaphilile abamudzingi dokotela; ngulabo labagulako kuphela. ³² Angiketeli kutowubita labalungile, kepha toni ekuphendvukeni.'' ³³ Batsi kuye, ''Bafundzi baJohane bebazile bathantaza njalo, futsi nebafundzi bebaFarisi benta lokufanako. Kepha bafundzi bakho bayadla banatse.'' ³⁴ Jesu watsi kubo, ''Ukhona yini longenta timenywa temkhwenyane tizile umkhwenyane asesenabo? ³⁵ Kepha emalanga atawufika uma umkhwenyane atsatfwa kubo, bese ngalawo malanga batawuzila.'' ³⁶ Wabese Jesu futsi wakhuluma umfanekiso kubo. ''Kute lodzabula sicephu emphahleni lensha bese uyisebentisa kuchibela imphahla lendzala. Uma enta loko, utawudzabula lemphahla lensha, futsi lesicephu lesisuka kulemphahla lensha ingeke ihlale kahle nalena yalemphahla lendzala. ³⁷ Kute lofaka liwayini esikhwameni seliwayini lesidzala. Uma enta loko, leliwayini lelisha litawubhomisa lesikhwama, futsi leliwayini litawucitseka, futsi nalesikhwa sitawufa. ³⁸ Kepha liwayini lelisha kumele lifakwe esikhwameni seliwani lesisha. ³⁹ Kute lowake wafuna liwayini lelisha emvakwekunatsa lelidzala, ngobe utsi, 'Lelidzala lincono.''