¹ Emnyakeni welishumi nesihlanu wekubusa kwaThibheriyusi Khesari- Phontiyusi Philatu asesengumbusi waseJudiya, Herodi abeyinkhosi yaseGalile, umnakabo Filiphu abeyinkhosi yesive saseIthureya naseTrakhonithisi, naLisaniyasi abeyinkhosi yaseAbelene, ² ngesikhatsi sebaphristi labakhulu sa Anasi naKhayafase- livi laNkulunkulu lefika kuJohane indvodzana yaZakhariya ehlane. ³ Wahamba kuto tonkhe tive emacentselweni eJordane, ashumayela umbhabhatiso wekuphendvuka kanye nekucolelwa kwetono. ⁴ Njengobe kubhaliwe encwadzini yemavi aIsaya umphrofethi, ''Liphimbo lalomemetako liphuma ehlane, 'Yentani indlela yeNkhosi ilunge, yentani imikhondvo yakhe icondze. ⁵ Tonkhe tigodzi titawugcwaliswa, netintsaba kanye nemadvwala atawentiwa abe phasi, nemigwaco lengakacondzi itawentiwa icondze, netindzawo letingahambeki titawakhiwa tibe yimigwaco, ⁶ futsi yonkhe inyama itawubona insindziso yaNkulunkulu.'' ⁷ Ngako Johane watsi kuleticuku lebetiphumela kuyobhabhatiswa nguye, ''Nine bantfwana betinyoka! Ngubani lonecwayisile kutsi nibalekele lolulaka lolutako? ⁸ Ngako ke, khicitani titselo letifanele kuphendvuka, futsi ningacali nitsi ngekhatsi kini, 'Sinaye Abrahama waBabe wetfu,' ngobe ngiyanitjela kutsi Nkulunkulu angakhona kuvusa bantfwana baAbrahama kulamatje lawa. ⁹ Ngisho nanyalo lizembe lilungele kumelana netimphandze taletihlahla. Ngako sonkhe sihlahla lesingakhiciti titselo letilungile siyajutjwa phasi bese siphoswa emlilweni.'' ¹⁰ Besetiphele kumbuta leticuku, titsi, ''Yini lekufanele siyente''? ¹¹ Waphendvula watsi kubo, ''Uma lomunye anemahembe lamabili, kumele akwehlukanise nalomuntfu lote lutfo, futsi nalona lonekudla kumele ente lokufanako.'' ¹² Batselisi nabo beta kutobhabhatiswa, futsi batsi kuye, ''Mfundzisi, kumele senteni?'' ¹³ Watsi kubo, ''Ningabutsi imali lenyenti kunaloku lotjelwe kutsi ukubutse.'' ¹⁴ Lamanye emasotja nawo ambuta, atsi, ''Tsine ke? Yini lesingayenta?'' Watsi kubo, ''Ningayitsatsi imali kunome ngubani ngemacebo, futsi ningamangaleli nome ngubani ngemanga. Yeneliswani ngumholo wenu.'' ¹⁵ Manje bantfu bebasafuna bagadze Khristu kutsi ete, wonkhe muntfu abezindla etinhlitiyweni tabo mayelana naJohane, kutsi mhlawumbe angaba nguloKhristu. ¹⁶ Johane waphendvula ngekutsi kubo bonkhe, ''Njengami nje, nginibhabhatisa ngemanti, kepha ukhona lotako lonemandla kakhulu kunami, futsi angikafanelwa ngisho nekutfukulula imichilo yetincabule takhe. Utanibhabhatisa ngaMoya Longcwele nangemlilo. ¹⁷ Esandleni sakhe kunesitja sakhe sekwelisisa kuhlobe kukhiphe timphephelezi phasi bese kuhlanganiswa lamabele endlini yekugcina. Kepha utawushisa emakhoba ngemlilo longeke ucishe.'' ¹⁸ Futsi nalokunyenti kukhutsata, Johane washumayela livangeli kulabantfu. ¹⁹ Ngesikhatsi Herodi inkhosi sekasoliwe kutsi ashade umfati wemnakabo Herodiyasi, nato tonkhe letintfo letinye letimbi letentiwa nguHerodi, wengeta loku kuto tonkhe, ²⁰ kutsi akhiyele Johane ejele. ²¹ Manje kwefika, ngesikhatsi bonkhe labantfu babhabhatiswe, naJesu wabhabhatiswa, futsi nakasakhuleka, emazulu avuleka, ²² Moya Longcwele wehlela kuye njengelituba, bese livi lavela ezulwini, ''UyiNdvodzana yami, lengiyitsandzako. Ngitfokotile ngawe.'' ²³ Ngesikhatsi Jesu acala umsebenti wakhe, bekanemashumi lamatsatfu budzala. Abeyindvodzana (njengobe bebacabanga) yaJosefa, umsa waHeli, ²⁴ umsa waMathati, umsa waLevi, umsa waMelkhi, umsa waJanayi, umsa waJosefa. ²⁵ Josefa abengumsa waMathathiyasi, umsa waAmosi, umsa waNahume, umsa waEsli, umsa waNagayi, ²⁶ umsa waMahathi, umsa waMathathiyasi, umsa waSemeyini, umsa waJoseki, umsa waJoda. ²⁷ Joda abengumsa waJowanani, umsa waResa, umsa waZerubhabheli, umsa waSheyaltiyeli, umsa waNeri, ²⁸ umsa waMelkhi, umsa waAdi, umsa waKhosami, umsa waElmadamu, umsa waEri, ²⁹ umsa waJoshuwa, umsa waEliyezeri, umsa waJorimu, umsa waMathati, umsa waLevi. ³⁰ Levi umsa waSimeyoni, umsa waJuda, umsa waJosefa, umsa waJonamu, umsa waEliyakhimu, ³¹ umsa waMeliya, umsa waMena, umsa waMathatha, umsa waNatani, umsa waDavide, ³² umsa waJese, umsa waObedi, umsa waBhowazi, umsa waSalmoni, umsa waNasoni. ³³ Nasoni umsa waAminadabi, umsa waAdmini, umsa waArini, umsa waHezroni, umsa waPheresi, umsa waJuda, ³⁴ umsa waJakobe, umsa waIsaka, umsa waAbrahama, umsa waThera, umsa waNahori, ³⁵ umsa waSerugi, umsa waRehu, umsa waPhelegi, umsa waEbheri, umsa waShela. ³⁶ Shela abengumusa waKhenani, umsa waAphakisadi, umsa waShemi, umsa waNowa, umsa waLameki, ³⁷ umsa waMethusala, umsa waEnoki, umsa waJarede, umsa waMahalaleli, umsa waKhenani, ³⁸ umsa waEnoshi, umsa waSethi, umsa waAdamu, umsa waNkulunkulu.