Sehluko
1
Manje ngalawo malanga, kwefika kutsi Khesari Agustusi akhiphe umtsetfosimemetelo ayale kutsi lubalo lutawutsatfwa kubo bonkhe bantfu labaphila emhlabeni.
2
Leli bekulubalo lwekucala lelwentiwa ngesikhatsi Khwiriniyusi anguMbusi waseSiriya.
3
Ngako wonkhe muntfu waya edolobheni lakubo wayobhalisela lubalo.
4
NaJosefa wenyukela etulu asuka eGalile, edolobheni laseNazaretha, aya eJudiya, kulelidolobha laDavide, lelibitwa ngekutsi iBhethlehema, ngobe abewakulendlu nentalelwane yaDavide.
5
Waya lapho kuyobhalisa naMariya, lobekatsembisene naye futsi atetfwele.
6
Manje kwefika uma basese lapho, sikhatsi sefika kutsi abeleke untfwana wakhe.
7
Wabeleka indvodzana, umntfwana wakhe wekucala, wamgocota ngetindvwango wamlalisa emkhombeni, ngobe bekute likamelo labo endlini yetihambi.
8
Bekunebelusi kulelo live labebahlala emadlelweni, bagadze imihlambi ebusuku.
9
Ingelosi yeNkhosi yavela kubo, inkhatimulo yeNkhosi yabakhanyisela, babese bagcwala kwesaba lokukhulu.
10
Yabese lengelosi itsi kubo, ''Ningesabi, ngobe nginiletsele livangeli lelitawuletsa intfokoto lenkhulu kubo bonkhe bantfu.
11
Lamuhla nitalelwe umsindzisi nine edolobheni laDavide! UnguKhristu iNkhosi!
12
Lolu luphawu lenitawunika lona: Nitawutfola umntfwana agocotwe ngetindvwango futsi alele emkhombeni.''
13
Masinyane kwaba nesicuku lesikhulu kanye kanye nalengelosi ezulwini, sidvumisa Nkulunkulu sitsi,
14
''Ludvumo kuNkulunkulu ekuphakameni, futsi akube nekuthula emhlabeni kubantfu labatfokotelwa nguye.''
15
Kwefika lapho ngesikhatsi ingelosi seyihambile kubo iye ezulwini, labelusi batsi kulomunye nakulomunye, ''Asambeni ke siye eBhethlehema siyobona lentfo lena leyentekile, iNkhosi lesatise ngako.''
16
Baphutfuma khona batfola Mariya, Josefa, nalomntfwana, lobekalele emkhombeni.
17
Emvakwekuba bambone, babika lokwashiwo kubo ngalomntfwana.
18
Bonkhe labakuva bamangala ngalokwakukhulunywe kubo ngulabelusi.
19
Kepha Mariya wahlale acabanga ngato tonkhe letintfo bekativile, wazindla ngato enhlitiyweni yakhe.
20
Labelusi babuya, badvumisa babonga Nkulunkulu ngako konkhe labakuvile nalabakubonile, njengobe kwakushiwo kubo.
21
Ngesikhatsi kuyophela emalanga lasiphohlongo, asasokiwe, wetsiwa kwatsiwa nguJesu, leligama walinikwa yingelosi asengekho nasesiswini.
22
Ngesikhatsi lenombolo yemalanga labekiwe ekuhlanjululwa kwabo sekwendlulile, ngendlela yemtsetfo waMosi, bamuletsa ethempelini eJerusalema kuyometfula eNkhosini.
23
Njengobe kubhaliwe emtsetfweni weNkhosi, ''Wonkhe lomdvuna lovula sibeletho utawehlukaniselwa iNkhosi.''
24
Ngako banikela umnikelo ngendlela leyashiwo emtsetfweni weNkhosi, ''ematuba lamabili nome emavukutfu lamabili lamancane.''
25
Bheka, bekunendvodza eJerusalema libito lakhe bekunguSimeyoni, futsi lendvodza lena beyilungile futsi itinikele. Abefuna kudvudvutwa kwa Israyeli, futsi naMoya Longcwele abesetikwakhe.
26
Kwembulwa nguMoya Longcwele kuye kutsi angakuboni kufa angakamboni Khristu weNkhosi.
27
Aholwa nguMoya, Simeyoni weta ethempelini. Uma labatali baletsa lomntfwana Jesu, kutomentela ngendlela yemihambo yemtsetfo,
28
wamtsatsa wamgona wadvumisa Nkulunkulu, watsi,
29
''Manje vumela sisebenti sakho sikhululeke ngekuthula, Nkhosi, ngendlela yelivi lakho.
30
Ngobe emehlo ami sekayibonile insindziso yakho,
31
loyilungisile embikwebantfu bonkhe bakhona:
32
Kukhanya kwesambulo kuBetive nenkhatimulo kuIsrayeli bantfu bakho.''
33
Babe na make wakhe bamangala ngaloku lokwashiwo ngaye.
34
Simeyoni wababusisa watsi kuMariya make wakhe, ''Buka, lomntfwana lona ukhetfwe nguNkulunkulu ekuweni kanye nekuvuka kwebantfu labanyenti kaIsrayeli futsi nesibonakaliso lesiphikwayo-
35
futsi inkemba itawuhlaba umphefumulo wakho-kute imicabango yetinhlitiyo letinyenti yembuleke.''
36
Umphrofethikati lobitwa nga Ana abekhona. Abeyindvodzakati yaFanuweli wesive sakaAsheri. Abesakhule kakhulu. Abehlale nemyeni wakhe iminyaka lesikhombisa emvakwebutfobhi bakhe,
37
bese waba ngumfelokati iminyaka lesiphohlongo. Akazange salishiye lithempeli kepha abekhonta ngekuzila nemithandazo, busuku nemini.
38
Kulelo hora weta dvutane kubo wacala kuletsa tibongo kuNkulunkulu, wakhuluma ngalomntfwana kuwonkhe muntfu lobekasolo amele inkhululeko yaJerusalema.
39
Ngesikhatsi sebacedzile ngendlela yemtsetfo weNkhosi, babuyela eGalile, edolobheni labo laseNazaretha.
40
Lomntfwana wakhula waba nemandla, wagcwala inhlakanipho, futsi nemusa waNkulunkulu bowusetikwakhe.
41
Batali bakhe bebaya minyaka yonkhe eJerusalema ngeMikhosi yeliphasika.
42
Ngesikhatsi anelishumi nakubili iminyaka akhulile, baphindza futsi baya esikhatsini semusimeto emkhosini.
43
Emvakwekuba bahlale khona emalanga lagcwele emkhosi, bacala kubuyela ekhaya. Kepha lomfana Jesu wahlala ngemuva eJerusalema futsi batali bakhe bebangati.
44
Bacanga kutsi bekanalesicuku lebesihamba nabo, ngako bahamba luhambo lwelilanga. Babese bacala kumfuna etihlotjeni kanye nebangani babo.
45
Uma bangamtfoli, babuyela eJerusalema bacala kumfuna lapho.
46
Kwefika kutsi emvakwemalanga lamatsatfu bamtfola ethempelini, ahleli emkhatsini webafundzisi, abalalele futsi ababuta imibuto.
47
Bonkhe labamuva bamangaliswa ngulokucodza kwakhe netimphendvulo takhe.
48
Uma bambona, bamangala. Make wakhe watsi kuye, ''Ndvodzana, leni usiphatse ngalendlela? Buka, mine nababe wakho besikhatsatekile sifuna wena.''
49
Watsi kubo, ''Beningifunelani? Beningati yini kutsi bekufanele ngibesemsebentini waBabe?
50
Kepha abazange bacondze kutsi bekachazani ngalawo magama.
51
Wabese ubuyela nabo emuva ekhaya eNazaretha wabalalela. Make wakhe watigcina tonkhe letinfo leti enhlitiyweni yakhe.
52
Kepha Jesu wachubeka kukhula enhlakaniphweni nasemtimbeni, futsi wakhula nasemseni kuNkulunkulu nebantfu.