¹ Wabese ukhuluma umfanekiso kubo ngekutsi bathandaze njani sonkhe sikhatsi futsi bangapheli mandla, ² atsi, ''Edolobheni lelitsite bekunemehluleli lobekangamesabi Nkulunkulu futsi angabahloniphi bantfu. ³ Nyalo bekunemfelokati kulelo dolobha, bekavame kuta kuye, atsi, 'Ngisite nginike kuthula kulona lolwa nami.' ⁴ Sikhatsi lesidze angamsiti angafisi kumsita, kepha emvakwesikhatsi lesidze watitjela watsi, 'nome ngingamesabi Nkulunkulu nome ngihloniphe bantfu, ⁵ yebo ngoba lomfelokati ungibangela tinkinga, Ngitamsita atfole kuthula, khona angatochubeka kungihlupha ngalokuta kwakho lokungapheli.'' ⁶ Yabese iNkhosi itsi, ''Lalelani kutsi utsini lomehluleli lomubi. ⁷ Nyalo Nkulunkulu angeke yini aletse kukhululeka kulabakhetsiwe bakhe labakhala baphimisele kuye imini nebusuku? Angaphuta yini sikhatsi lesidze kubo? ⁸ Ngitsi kini utawuletsa kukhululeka kubo ngekushesha. Kodvwa ke, uma iNdvodzana yeMuntfu ita, itakukhandza yini kukholwa emhlabeni?'' ⁹ Wabese ukhuluma lomfanekiso lona kulabanye labetsembe kulunga kutsi bebalungile bese babukela phasi labanye bantfu, ¹⁰ ''Emadvodza lamabili enyukela ethempelini kuyawuthandaza- munye bekanguMfarisi lolomunye abengumtselisi. ¹¹ LoMfarisi wasukuma watithandazela ngaletintfo leti, 'Nkulunkulu, Ngiyakubonga kutsi angifani nalabanye bantfu- tigebengu, bantfu labangakalungi, tiphingi- nome ngisho njenganaba batselisi. ¹² Ngizila kabili ngeliviki. Ngiletsa kweshumi kuko konkhe lengikutfolako.' ¹³ Kepha lomtselisi, amile bucalu, angeke aphakamise ngisho emehlo akhe ezulwini, kepha watishaya sifuba, atsi, 'Nkulunkulu, yiba nemusa kimi, soni.' ¹⁴ Ngitsi kini, lendvodza lena yahamba yabuyela phasi endlini yayo seyikhululekile kunalolomunye, ngoba wonkhe muntfu lotiphakamisako uyotfotjiswa, kepha loyo lotitfobako uyawuphakanyiswa.'' ¹⁵ Labantfu bebaletsa kuye tinswane tabo khona atotitsintsa, kepha uma bafundzi bakubona, babamisa. ¹⁶ Kepha Jesu wababita kuye, atsi, ''Vumelani bantfwana bete kimi, ningabavimbeli. Ngoba umbuso waNkulunkulu walabanjalo. ¹⁷ Ngicinisile ngitsi kini, nanome ngubani longeke amukele umbuso waNkulunkulu njengemntfwana angeke angene kuwo.'' ¹⁸ Sikhulu lesitsite sambuta, satsi, ''Mfundzisi lolungile, yini lekumele ngikwente kuzuza imphilo yaphakadze?'' ¹⁹ Jesu watsi kuye, ''Ungibitelani ngalolungile? Kute lolungile, ngaphandle kwaNkulunkulu kuphela. ²⁰ Uyayati imiyalo letsi ungaphingi, ungabulali, ungebi, ungafakazi emanga, hlonipha uyihlo nenyoko. ²¹ Lesikhulu satsi, ''Tonkhe letintfo leti ngatihlonipha kusukela ngesikhatsi ngisemusha.'' ²² Uma Jesu akuva loko, watsi kuye, ''Kunye lokushodako. Kumele utsengise konkhe lonako bese unika kulabaphuyile, bese utawuba nemcebo ezulwini- bese uyeta, uyangilandzela.'' ²³ Kepha uma lesikhulu siva letintfo leti, yadzabuka kakhulu, ngoba bekacebe kakhulu. ²⁴ Wabese Jesu, nakambona akhatsateka watsi, ''Kumatima kanganani kulabo labacebile kungena embusweni waNkulunkulu! ²⁵ Ngoba kumelula kutsi likamela lingene embotjeni lenyalitsi, kune muntfu locebile kutsi angene embusweni waNkulunkulu.'' ²⁶ Labo labakuva batsi, ''Kepha ngubani longasindziswa?'' ²⁷ Jesu waphendvula, ''Letintfo letingeke tenteke kubantfu tiyenteka kuNkulunkulu.'' ²⁸ Phetro watsi, ''Bukani tsine, sishiye konkhe lokungekwetfu sabese siyakulandzela. ²⁹ Jesu wabese utsi kubo, ''Ngicinisile, ngitsi kini kute loshiye likhaya, nome umfati, nome bomnakabo, nome batali, nome bantfwana, ngenca yembuso waNkulunkulu, ³⁰ longeke emukele lokungetulu kulomhlaba, bese kulelive lelitako, imphilo yaphakadze.'' ³¹ Emvakwekutsi ahlanganise laba labalishumi nakubili kuye, watsi kubo, ''Bukani, siyahamba siya etulu eJerusalema, futsi tonkhe tintfo letabhalwa baphrofethi ngeNdvodzana yeMuntfu kutawupheleliswa. ³² Ngoba itawunikelwa kuBetive, bese iphukutwe, tiyawumphatsa kabi, timkhafulele. ³³ Emva kwekuyishaya, batayibulala, bese ngelilanga lesitsatfu itawuvuka futsi.'' ³⁴ Abazange baticondze letinfo leti, futsi lelivi leli belifihliwe kubo, futsi abazange baticondze letintfo letashiwo. ³⁵ Kwatsi, Jesu asasondzela eJerikho, indvodza letsite beyihleli ngasemgwacweni icela, ³⁶ weva sicuku sendlula, wabuta kuta kutsi kwentekani. ³⁷ Bamtjela kutsi Jesu waseNazaretha bekandlula. ³⁸ Ngako lendvodza lengaboni yamemeta, yatsi, ''Jesu, Ndvodzana kaDavide, yiba nemusa kimi.'' ³⁹ Labo lebebahamba lapho bayithulisa lendvodza lengaboni, bamtjela kutsi akathule. Kepha wamemeta kakhulu, ''Ndvodzana kaDavide, yiba nemusa kimi.'' ⁴⁰ Jesu wema wabatjela kutsi abaletse lendvodza kuye. Uma lendvodza lengaboni seyidvutane, Jesu wambuta, ⁴¹ ''Ufuna ngikwenteleni?'' Watsi, ''Nkhosi, ''Ngifuna kwemukela kubona kwami.'' ⁴² Jesu watsi kuye, ''Mukela kubona kwakho. Kukholwa kwakho kukuphilisile.'' ⁴³ Ngaleso sikhatsi wemukela kubona kwakhe wamlandzela, advumisa Nkulunkulu. Bonkhe labantfu, uma babona loku, banika Nkulunkulu tibongo.