¹ Jesu wangena eJericho wendlula. ² Bukani, bekunendvodza lapho ligama layo kunguZakewu. Bekangumtselisi lomkhulu futsi abecebile. ³ Abetama kubona kutsi Jesu abengubani, kepha angakhoni kubona kulesicuku, ngoba bekamfisha. ⁴ Ngako wagijimela ngembili kwalabantfu wakhwela sihlahla isikhamore kute ambone yena, ngoba Jesu besekatondlula kuleyo ndlela. ⁵ Uma Jesu efika kulendzawo, wabuka etulu watsi kuye, ''Zakewu, shesha wehlele phasi, ngoba namuhla kumele ngiyohlala endlini yakho.'' ⁶ Ngako washesha wehlela phasi bese wamemukela ngenjabulo. ⁷ Uma wonkhe muntfu akubona loku, bonkhe bakhonona, batsi, ''Uhambe wayovakashela indvodza lesoni.'' ⁸ Zakewu wasukuma watsi eNkhosini, ''Buka, Nkhosi, incenye yatintfo tami ngitawunika labaphuyile, futsi uma ngidlelele nome ngubani lutfo, ngitawubuyisela sekuphindvwe kane kunalemali yako.'' ⁹ Jesu watsi kuye, ''Lamuhla seyifikile insindziso kulendlu lena, ngoba naye uyindvodzana yaAbrahama. ¹⁰ Ngoba leNdvodzana yeMuntfu yeta kutofuna futsi kutosindzisa labantfu labalahlekile.'' ¹¹ Basativa letintfo leti, wachubeka wakhuluma wabatjela umfanekiso, ngoba bekadvutane neJerusalema, futsi bebacabanga kutsi umbuso waNkulunkulu wawutawuvela ngaleso sikhatsi. ¹² Watsi ngako ke, ''Indvodza letsite lehloniphekile yahamba yaya eveni lelikhashane kuyotemukelela umbuso bese ke uyabuya. ¹³ Wabita tisebenti takhe letilishumi watinika tinhlavu letilishumi watsi kubo, 'Sebentisani kute itale lenye ngize ngibuye.' ¹⁴ ''Kepha takhamiti takhe tamnyanya yena bese tatfumela tingijimi emvakwakhe, titsi, 'Singeke sibe nalendvodza lena iphatse tikwetfu.' ¹⁵ Kwenteka uma abuya futsi, asamukele lombuso, wabita letisebenti latinika lemali kutsi tite kuye, kutsi ati kutsi malini labayentile ngekwenta ibhizinisi. ¹⁶ ''Lowekucala weta phambi kwakhe, 'Nkhosi, luhlavu lwakho lente emagolide lalishumi bunyenti.' ¹⁷ ''Lendvodza lehloniphekile yatsi kuye, 'Wente kahle, sisebenti lesilungile. Ngoba wetsembekile kulokuncane, utawuphatsa emadolobha lalishumi.' ¹⁸ ''Lowesibili weta, atsi, 'Luhlavu lwakho, Nkhosi, lente tinhlavu letisihlanu.' ¹⁹ ''Lendvodza lehloniphekile yatsi kuye, 'Phatsa etikwemadolobha lamatsatfu.' ²⁰ ''Lomunye weta, atsi, 'Nkhosi, nali luhlavu lwakho, lengalibeka kahle ngalugocota ngendvwangu, ²¹ ngoba bengikwesaba, ngoba ungumuntfu lobheka lokunengi. Utsatsa longakakusebenteli, futsi uvuna longakakuhlanyeli.' ²² ''Lendvodza lehloniphekile yatsi kuye,' Ngitakwehlulela ngemavi akho, wena sisebenti lesibi. Bowati kutsi ngingumutfu lobheka lokunengi, ngitsatse lengingakakusebenteli, futsi ngivune lengingakakuhlanyeli. ²³ Awukayifaki ngani imali yami ebhange, khona ke uma ngibuya ngabe ngiyibutse inentalo?' ²⁴ Lendvodza lehloniphekile yatsi kulabebeme dvute naye, 'Memukeni loluhlavu, nilinike lona lonetinhlavu letilishumi.' ²⁵ ''Batsi kuye, 'Nkhosi, unetinhlavu letilishumi.' ²⁶ ''Ngitsi kini, kutsi wonkhe muntfu lonako uyawengetelwa, kepha kuloyo lote, ngisho loyo lonako kutawutsatfwa kuye. ²⁷ Kepha letitsa tami leti, labo labangafuni kutsi mine ngibuse tikwabo, baletseni lana bese bayabulawa phambi kwami.'' ²⁸ Sekatishilo letintfo leti, wachubeka wahamba, waya etulu eJerusalema. ²⁹ Kwefika lapho uma efika madvute naseBhethifage naseBhetani, kulentsaba lelibitwa ngekutsi yintsaba yemincumo, watfumela bafundzi lababili, ³⁰ atsi, ''Hambani edolobhaneni lelilandzelako. Nisangena, nitawutfola imbongolo lengakagitjelwa. Niyichache bese niyiletsa kimi. ³¹ Uma noma ngubani anibuta, 'Niyichachelani?' nibotsi, 'INkhosi inesidzingo sayo.'' ³² Labo labatfunyelwa batfola lembongolo njengoba Jesu abatjelile. ³³ Basayichacha lembongolo, lomnikati watsi kubo, ''Niyichachelani lembongolo?'' ³⁴ Batsi, ''INkhosi iyayidzinga.'' ³⁵ Bayiletsa kuJesu, bese bagaca tingubo tabo kulembongolo, bese bakhweta Jesu kuyo. ³⁶ Asahamba, bendlala tingubo tabo emgwacweni. ³⁷ Nase asatawufika kulendzawo lapho iNtsaba yeMncumo, sonkhe lesiscuku sebalandzeli bacala kujabula bese badvumisa Nkulunkulu ngelivi leliphakeme ngayo yonkhe lemisebenti lenemandla labayibonile, ³⁸ atsi, ''Ibusisiwe inkhosi leta egameni leNkhosi! Kuthula ezulwini neludvumo kulelisetulu!'' ³⁹ Labanye balabaFarisi esicukwini batsi kuye, ''Mfundzisi, yekhuta bafundzi bakho.'' ⁴⁰ Jesu waphendvula watsi, ''Ngiyanitjela, kube laba bebathulile, ematje atawukhala aphumisele.'' ⁴¹ Uma Jesu asasondzela kulelidolobha, wayikhalela, ⁴² atsi, ''Kube mane bewati kutsi ngalelilanga leli, ngisho nawe, letintfo letikuletsela kuthula! Kepha nyalo kufihlakele emehlweni akho. ⁴³ Ngoba emalanga ayeta kuwe lapho titsa takho titawakha umtsangala kuwe bese tiyakutungeleta bese tiyakucindzetela kuto tonkhe tinhlangotsi. ⁴⁴ Tiyawukushaya tikuwise phasi emhlabatsini, bantfwabakho nawe. Tingeke tishiye litje linye tikwa lelinye ngoba awuzange unake ngesikhatsi Nkulunkulu abetama kukusindzisa.'' ⁴⁵ Jesu wangena ethempelini wacala kukhiphela ngaphandle labo labebatsengisa, ⁴⁶ atsi kubo, ''Kubhaliwe, 'Indlu yami kutawuba indlu yemthandazo,' kepha seniyente umgedze wetigebengu.'' ⁴⁷ Ngako Jesu abefundzisa onkhe malanga ethempelini. Baphristi labakhulu nebafundzisi bemtsetfo nebaholi bebantfu bebafuna kumbulala, ⁴⁸ kepha behluleka kutfola indlela yekukwenta ngobe bonkhe labantfu bebamlalele batsatsekile.