¹ Jesu watsi kubafundzi bakhe, ''Kuliciniso kutawuba netintfo letisibangela kutsi sone, kepha maye kuloyo muntfu lesichamuka ngaye! ² Kutawuba ncono kwakhe uma kungakhungelwa litje litungeletwe entsanyeni yakhe bese uphoselwa elwandle kunekutsi angabanga munye walaba labancane kutsi bone. ³ Ticapheleni. Uma umnakenu ona, mekhute, bese uma aphendvuka, mcolele. ⁴ Uma akona emahlandla lasikhombisa elangeni, emahlandla lamatsatfu abuyela kuwe, atsi, 'Ngiyaphendvuka,' kumele umcolele!'' ⁵ Baphostoli batsi eNkhosini, ''Khulisa lukholo lwetfu.'' ⁶ INkhosi yatsi, ''Kube beninekukholwa njenge nhlavu yendlulamitsi, beningatsi kulesihlahla, 'Dzephuneka, uhlanyeleke elwandle,' futsi besinganilalela. ⁷ Kepha ngumuphi wenu, lonesisebenti lesilimako nome leselusako, angatsi kuye uma abuya ensimini, 'Wota uhlale phasi ngaleso sikhatsi udle'? ⁸ Angeke yini sekasho kuye, 'Ngilungisele lengengingakudla, bese ufaka libhande litungelete timphahla takho bese uyanginika ngize ngicedze kudla nekunatsa. Bese emva kwaloko utawudla unatse'? ⁹ Akasibongi lesisebenti ngoba sente letintfo letifanele sitente, kuliciniso yini? ¹⁰ Kanjalo ke nawe, uma sewente konkhe loko lokufanele, kumele utsi, 'Sitisebenti letingakafaneli kubongwa. Sente lebesifanele sikwente.'' ¹¹ Kwefika lapho asahamba aya eJerusalema, wendlula umncele emkhatsini weSamariya neGalile. ¹² Nakasangena ekhaya lelitsite, lapho wahlangabetwa madvodza lalishumi labebanebulephelu. Bema khashane naye ¹³ baphakamisa emaphimbo abo, batsi, ''Jesu, Nkhosi, yiba nemusa kitsi.'' ¹⁴ Uma ababona, watsi kubo, ''Hambani nitibonakalise kubaphristi.'' Basahamba baphiliswa. ¹⁵ Uma munye wabo abona kutsi uphilisiwe, wajika wabuyela emuva, ngelivi lelikhulu advumisa Nkulunkulu. ¹⁶ Yatilahla phasi etinyaweni taJesu, imbonga. AbengumSamariya. ¹⁷ Wabese Jesu utsi, ''Laba labalishumi abaphiliswanga yini? ¹⁸ Baphi labayimfinca? Bekute labanye lababuya kutonika Nkulunkulu ludvumo, ngaphandle kwalomchamuki yini?'' ¹⁹ Watsi kuye, ''Sukuma, uhambe. Lukholo lwakho likwente waphila.'' ²⁰ Ngekubutwa bafarisi utofika nini umbuso waNkulunkulu, Jesu wabaphendvula watsi, ''Umbuso waNkulunkulu awuti ngalokubonwako. ²¹ Kute labatawutsi, 'Bukani, nangu!' nome, 'Nanguya!' Ngoba buka, umbuso waNkulunkulu uphakatsi kwakho.'' ²² Watsi kubafundzi bakhe, ''Ayeta emalanga uma nitofuna kubona linye lemalanga eNdvodzana yeMuntfu, kepha ngeke nikubone. ²³ Batobese batsi kini, 'Bukani, laphaya! Bukani, lapha!' Kepha ningaphumeli ngaphandle nome nilandzele ngemuva kwato, ²⁴ ngoba njengembane ubaneka ukhanyisa uma uvundla endleleni yinye yesibhakabhaka uye kulenye indlela yesibhakabhaka, ngako iyawuba njalo iNdvodzana yeMuntfu ngelilanga layo. ²⁵ Kepha kufanele ihlupheke kucala tintfo letinyenti ilahlwe ngulesitukulwane lesi. ²⁶ Njengoba kwenteka ngemalanga aNowa, ngalokukanjalo kutawenteka ngemalanga eNdvodzana yeMuntfu. ²⁷ Badla, banatsa, bashada, futsi banikwa emshadweni kwaze kwaba lilanga nowa wangena emkhumnjini- bese imvula yeta yabhubhisa konkhe. ²⁸ Ngalokukanjalo, njengoba kwenteka ngemalanga aLoti- bebadla banatse, batsenga batsengisa, bahlanyela bakha. ²⁹ Kepha ngelilanga kutsi Loti aphuma eSodoma, kwana umlilo nesibabule uchamuka ezulwini wababhubhisa bonkhe. ³⁰ Emvakwaloko kuyawuba njalo ngelilanga lekwembulwa ngalo iNdvodzana yeMuntfu. ³¹ Ngalelo langa ningamvumeli loyo losetikwendlu kutsi ehle ayotsatsa tintfo takhe ngaphandle kwendlu, futsi ningamvumeli losensimini kutsi abuye. ³² Khumbulani umka Loti. ³³ Umuntfu lofuna kuzuza imphilo itamlahlekela, kepha umuntfu lolahlekelwa imphilo yakhe utayigcina. ³⁴ Ngiyanitjela, kulobo busuku kutawuba nebatfu lababili embhedzeni munye. Munye utawutsatfwa, bese lolomunye utawushiywa. ³⁵ Kutawuba nebafati lababili bagaya kanyekanye. Munye utawutsatfwa, bese lolomunye utawusala.'' ³⁶ Kutawube kunalababili ensimini, munye uyawutsatfwa, bese lomunye utawusala.'' ³⁷ Bambuta, ''Kuphi, Nkhosi?'' Watsi kubo, ''Lapho kunesidvumbu khona nemangce ahlangana khona.''