¹ Jesu futsi watsi kubafundzi bakhe, ''Bekunendvodza letsite lebeyicebile lebeyinendvuna, kwabikwa kuye kutsi lendvuna lena beyidlabhatisa inzuzo yakhe. ² Ngako ke lendvodza lesicebi yambita yatsi kuye, 'Yini loku lengikuvako ngawe? Nginike lokubhaliwe ngekuphatsa kwakho, ngoba ungeke uphindze ube yindvuna yami.' ³ ''Lendvuna yakhuluma yodvwa yatsi, 'Yini lekumele ngiyente, njengoba umphatsi wami uyawutsatsa umsebenti wami wekuphatsa? Ngite emandla ekugubha, futsi nginemahloni ekucela. ⁴ Ngiyati kutsi ngitowenta njani, khona uma sengisusiwe emsebentini wami wekuphatsa, bantfu batawungemukela etindlini tabo.' ⁵ Yabese lendvuna ibita bonkhe labebakweneta umnumzane wakhe, wabuta lowekucala, 'Ukweneta malini kumnumzane wami?' ⁶ ''Watsi, 'Emabhodlela lalikhulu emafutsa eliphehla.' ''Watsi kuye, 'Tsatsa sikwenedi sakho, uphangise uhlale phasi, bese ubhala emashumi lasihlanu.' ⁷ ''Yabese lendvuna yatsi kulomunye, 'Ukweleda malini?' ''Watsi, 'Likhulu lemasaka embila.' Watsi kuye, 'Tsatsa sikwenedi sakho, bese ubhala emashumi lasiphohlongo.' ⁸ Umnumzane wabese udvumisa lendvuna lengaketsembeki ngoba yente intfo lenebucili. Ngoba bantfwana balelive leli bahlakaniphe kakhulu ekukhwabaniseni nebantfu babo kunebantfwana bekukhanya. ⁹ Ngitsi kini, tenteleni bangani ngemcebo longakalungi khona ke uma sewuhambile, bangakwemukela ekhaya laphakadze. ¹⁰ Loyo lowetsembeka kulokuncane kakhulu utsembekile futsi kulokukhulu, futsi loyo longaketsembeki kulokuncane aketsembeki futsi kulokukhulu. ¹¹ Uma ungakase watsembeka ekusebentiseni ngemcebo longakalungi, ngubani lotakwetsemba ngemcebo lolungile? ¹² Uma ungaketsembeki ekusebentiseni tintfo talabanye bantfu, ngubani lotokunika imali yakho? ¹³ Kute sisebenti lesingasebentela emakhosi lamabili, utawuzonda yinye bese utsandza lelenye, noma ke sitawunamatsela kuyinye bese sedzelela lelenye. Ungeke ukhonte Nkulunkulu nemali.'' ¹⁴ Nyalo baFarisi, labebabatsandzi bemali, beva tonkhe letintfo leti, bese bamphukuta. ¹⁵ Watsi kubo, '''Nitenta labalungile emehlweni ebantfu, kepha Nkulunkulu uyatati tinhlitiyo tenu. Loko lokuphakanyisiwe kubantfu kusinengise ebusweni baNkulunkulu. ¹⁶ Umtsetfo nebaphrofethi bebasemagunyeni kwaze kwefika Johane. Kusukela ngaleso sikhatsi, livangeli lembuso waNkulunkulu lashunyayelwa, futsi wonkhe muntfu wazama kuphocelela indlela yakhe kuwo. ¹⁷ Kepha kulula kutsi lizulu nemhlaba lendlule kunekutsi licashata linye lencwadzi yemtsetfo lendlule liphele. ¹⁸ Wonkhe lodivosa umkakhe bese ushada lomunye uyaphinga, futsi loyo loshada loyo lodivoswe yindvodza yakhe uyaphinga. ¹⁹ ''Bekunendvodza letsite lecebile lebeyigcoka timphahla letidulile letibukhwebeletane ne lineni lecolisakele atijabulisa onkhe emalanga ngemcebo wakhe. ²⁰ Umceli lotsite libito lakhe kunguLazaru abehlala egedeni lakhe, abenetilondza, ²¹ futsi abedzinga kudla lobekuwa etafuleni lalendvodza lecebile. Ngisho netinja teta takhotsa letilondza takhe. ²² Kwefika kutsi lomceli wafa futsi watsatfwa tingelosi tamuyisa endzaweni yaAbrahama. Lendvodza lecebile nayo yafa yangcwatjwa, ²³ futsi eSihogweni, asebuhlungwini, waphakamisa emehlo akhe wabona Abrahama khashane anaLazaro eceleni kwakhe. ²⁴ Ngako wakhala waphumisela watsi, 'Babe Abrahama, yiba nemusa kimi utfumele Lazaro, kutsi akenye sihloko semuno wakhe emantini aphotise lulwimi lwami, ngoba ngisebuhlungwini kulomlilo.' ²⁵ ''Kepha Abrahama watsi, 'Ndvodzana, khumbula kutsi usaphila emhlabeni wemukela tonkhe tintfo letinhle, Lazaro abenikwe tintfo letimbi. Kepha nyalo uyadvudvutwa lana, wena usekuhluphekeni. ²⁶ Nangaphandle kwako konkhe loku, ludvonga lolukhulu selibekwe endzaweni, khona labo labafuna kuwela ngetulu kusuka lapha kuya kuwe ngeke bakhone, futsi kute longawela ngetulu kusuka lapho kuta kitsi.' ²⁷ ''Lendvodza lecebile yatsi, 'Ngiyakucela, Babe Abrahama, kutsi utamtfumela endlini yababe wami- ²⁸ ngoba nginabomnaketfu labasihlanu- khona atobecwayisa, khona kungenteki kutsi bete kunayi indzawo yebuhlungu.' ²⁹ ''Kepha Abrahama watsi, 'Banaye Mosi nebaphrofethi; ababalalele.' ³⁰ ''Lendvodza lecebile yaphendvula, 'Chake, Babe Abrahama, kepha uma kungavuka umuntfu ekufeni, batawuphendvuka.' ³¹ ''Kepha Abrahama watsi kuye, 'Uma bangamulaleli Mosi nebaphrofethi, ngete beneliswa ngisho noma umuntfu avuka ekufeni.''