¹ Kwakunendvodza libito layo kungu Ananiyasi, kanye na Safira umkakhe, batsengisa incenye yemhlaba wabo, ² wagodla incenye yalemali (nemkakhe abati ngaloko), baletsa incenye yalemali labayitfola bayibeka etinyaweni tebaphostoli. ³ Kodvwa Phetro watsi, ''Ananiyasi, yini Sathane agcwabise inhlitiyo yakho ngekutsi ucambe emanga ku Moya Longcwele nekutsi ugcine incenye yemali lenitsengise ngayo umhlaba wenu? ⁴ Ingakatsengiswa, beyingasiyo yenu yini, noma seniyitsengisile, beyingekho etandleni tenu na? Kwenteke njani kutsi nicabange intfo lenje enhlitiyweni yenu? anikacambi emanga kubantfu, kepha kuNkulunkulu.'' ⁵ Asalalele lamavi, Ananiyasi wawa phansi waphefumula kwekugcina, kwehla kwesaba lokukhulu etukwabo bonke labeva lamavi. ⁶ Emajaha asondzela amgocota bamtfwala bamyisa ngephandle kuyomngcwaba. ⁷ Emva kwemahora langaba matsatfu, umfati wakhe wefika, angati kutsi kwentekeni. ⁸ Phetro watsi kuye, ''ngitjele kutsi nitsengise lomhlaba ngalemali lena.'' Watsi, ''Yebo, ngiyo leyo.'' ⁹ Phetro wase utsi kuye, ''Kuye ngani kutsi nivumelane nobabili kutsi nilinge uMoya weNkhosi? Bheka, tinyawo talamadvodza langcwabe indvodza yakho bangalapha emnyango, batokutsatsa nawe bakukhiphele ngaphandle.'' ¹⁰ Ngalowo mzuzu wawa phansi waphefumula kwekugcina. ¹¹ Uma lamajaha abuya, amtfola asafile, bamtsatsa bahamba bayomgcwaba enceleni kwendvodza yakhe. Kwesaba lokukhulu kwehlela lonke libandla kanye nabo bonke labeva letintfo. ¹² Tibonakaliso netimangaliso letiningi tatentiwa emkhatsini webantfu ngetandla tebaphostoli. Bebakanye kanye egumbini laSolomon. ¹³ Akutanga kube khona lababa nesibindzi sekuhlanganyela nabo; konje, bebahlonishwa kakhulu bantfu. ¹⁴ Kwakungeteka lamanye emakholwa eNkhosini, tindimbane temadvodza nebafati, ¹⁵ kangangekutsi baletsa bantfu labebagula babaletsa emigwagcweni babalalisa emibhedzeni nangeluhlaka, kute kutsi Phetro natokwengca, sitfunti sakhe simane siwele kubo. ¹⁶ Kweta bantfu labanyeti bavela emadolobheni lakhelene neJerusalema, baletsa bantfu labebagula nalabo bebanemimoya lengcolile, bonkhe baphiliswa. ¹⁷ Kepha umphristi lomkhulu wasukuma, kanye nabo bonke labebanaye (labo belicembu leba Sadusi); ¹⁸ bagcwala umona base babamba baphostoli, babagcina phakatsi ejele. ¹⁹ Ebusuku ingelosi yeNkhosi yavula iminyango yelijele yase iyabaholela ngaphandle, yase itsi, ²⁰ ''hambani, nime ethempelini nikhulume nebantfu bonke onke emavi alemphilo.'' sebeve loku, bangena ethempeleni entsatsa kusa bafundzisa. ²¹ Kepha umphristi lomkhulu wefika, kanye nalabo bebanaye, wabita baphatsi, nawo onkhe emalunga akaIsrayeli, batfumela bantfu kutsi baye ejele balandze baphostoli babaletse kubo. ²² Kepha letitfunywa taya tangabatfoli ejele, taphindzela emuva kuyobika. ²³ ''Sitfole lijele livalwe ngci nabogadzi beme eminyango, kepha uma sesivulile, asitfolanga muntfu ngekhatsi.'' ²⁴ Uma siphatsimandla selitempeli nebapristi labakhulu beva lombiko, bacakeka kakhulu kutsi nyalo sekutokwentakala njani. ²⁵ Kwase kufika lomunye wabatjela kutsi, ''lamadvodza lebeniwavalele ejele emile ethempelini afundzisa bantfu. ²⁶ Ngako ke siphatsimandla selithempeli sahamba kanye netisebenti, babalandza, ngaphandle kwekubaphocelela, ngoba bebasaba kutsi bangahle bagcotjwe ngematje. ²⁷ Nase babalandzile babamisa phambi kweliqoqo. Umphristi lomkhulu wabagweba ngemibuto, watsi, ²⁸ ''Siniyalisisile kutsi ningafundzisi ngaleligama, kodvwa senigcwalise iJerusalema ngalemfundziso yenu futsi nifisa kuletsa ingati yalendvodza etukwetfu. ²⁹ Bo Phetro nebaphostoli baphendvula batsi, ''kufanele silalele Nkulunkulu kune bantfu. ³⁰ Nkulunkulu wabo babe wavusa Jesu, yena lona lenambulala ngekumbetsela emtsini. ³¹ Nkulunkulu wamphakamisa wambeka esandleni sakhe sekudla kutsi abe iNkhosi neMsinidisi, kutsi anike sive sakaIsraeli kuphendvuka nekutsetselelwa kwetono. ³² Sibofakazi bato leto tintfo, kanye na Moya Longcwele, le Nkulunkulu wanika labo labagcina imiyalo yakhe. ³³ Emalunga etikhulu akuva loko, atfukutsela afisa nekubabulala baphostoli. ³⁴ Kodvwa umFarisi ligama lakhe lingu Gamaliyeli, labengumfundzisi wemtsetfo labehlonishwa ngibo bonke bantfu, wema wayaleta kutsi baphostoli bakhishwe kwesikhashana. ³⁵ Wase utsi kubo, Madvodza akaIsrayeli, kunakisiseni loko lenifisa kukwenta kulabantfu. ³⁶ Ngoba emalangeni lengcile, Thewuda wavuka asatsi atenta umuntfu lomcoka, emadvodza langaba ngemakhulu lamane, amlandzela. Wabulawa, bonke labebamlandzele basakateka umhlaba wonke loko abekukhuluma kwabalite lelite. ³⁷ Emva kwalendvodza, Judasi wase Galile wavuka nalabanye kulawo malanga ngemalanga elubalo wadvonsa labanyenti kutsi bamlandzele. Naye washabalala, nabobonke labebamlandzele basakateka. ³⁸ Ngitsi kini, sukani kulabantfu nibayekele bodvwa, uma lomsebenti uwe muntfu, utoshabalala. ³⁹ Kepha uma uwa Nkulunkulu, kute loyokhona kuwucima; ningatitfola senilwa naNkulunkulu. Wakhona kubenta beve. ⁴⁰ Base babita baphostoli babashaya base bayabayala kutsi bangakhulumi ngeligama laJesu, base bayabakhulula kutsi bahambe. ⁴¹ Balishiya leliqoqo bajabula kutsi babalwele kulabo labahlupheke ngekuhlaziselwa lelibito. ⁴² Kusukela lapho, onke emalanga, ethempelini bahambela futsi imiti ngemiti, bachubeka kufundzisa nekumemetela livangeli lelitsi Jesu unguKhristu.