¹ Kwatsi bo Phetro na Johane basakhuluma kulesicuku, baPhristi nebaphatsi belithempeli nebaSadusi beta kubo. ² Bakhatsateka kakhulu ngoba Phetro na Johane bebafundzisa bantfu futsi bamemetela ngaJesu kuvuka ekufeni. ³ Bababopha babafaka ejele kwate kwaba sekuseni, ngalokwekutsi besekuyintsambama. ⁴ Kepha bantfu labanyenti labeva lomlayeto bakholwa; futsi lenombolo yemadvodza lakholwa beyitinkhulungwane letisihlanu. ⁵ Kwefika lilanga lelilandzelako babusi, emalunga, nebabhali bahlangana ndzawonye eJerusalema. ⁶ UmPhristi lomkhulu Anasi bekakhona, naKhayafase, naJohane, naAlekzanda, nabo bonkhe labebatihlobo tempristi lomkhulu. ⁷ Ngesikhatsi sebabeke Phetro na Johane emkhatsini wabo, bababuta, ''Ngamaphi emandla, noma ngaliphi ligama, lenikwente ngako loku?. ⁸ Ngako Phetro agcwele Moya Longcwele watsi kubo, ''Nine baholi balabantfu nemalunga, ⁹ uma sibutwa lamuhla mayelana nalesento lesenteke kulendvodza legulako, kutsi lendvodza yaphiliswa kanjani, ¹⁰ ngako loku akwatiwe ngini nonkhe kanye nebantfu bonkhe baka Israyeli kutsi lendvodza ime phambi kwenu iphilile ngeligama laJesu Khristu wase Nazaretha, lenambetsela, kepha Nkulunkulu wamvusa kulabafile. ¹¹ Jesu Khristu ulitje lelalahlwa bakhi kepha labese lentiwa inhloko yesisekelo. ¹² Kute insindziso kulomunye umuntfu, ngoba kute lelinye ligama ngaphasi kwelizulu lelinikwe kubantfu lekumele sisindziswe ngalo.'' ¹³ Uma babona sibindzi saPhetro na Johane bacondza kutsi babantfu, madvodza langakafundzi, bamangala, bacondza kutsi Phetro na Johane bebasolo bana Jesu. ¹⁴ Ngoba babona lendvodza leyayiphilisiwe ime nabo, bebete lutfo labangalusho ngaloku. ¹⁵ Emva kwekuba baphocelele ba Phostoli kutsi bawushiye lomhlangano wekweluleka, bakhuluma bodvwa. ¹⁶ Batsi, ''Singentani kulamadvodza? ngoba lommangaliso lowenteke ngabo sewutawatiwa nguwonkhe muntfu lohlala eJerusalema; singeke sikuphike. ¹⁷ Kepha kute kutsi kungandzi kadze emkhatsini webantfu, asibecwayise kutsi bangasaphindzi bakhulume namuntfu ngaleligama.'' ¹⁸ Bababitela ngekhatsi babaphocelela kutsi bangakhulumi noma bafundzise sanhlobo egameni laJesu. ¹⁹ Kepha boPhetro na Johane babaphendvula batsi kubo, '''Noma ngabe kukahle emehlweni aNkulunkulu kulalela nine kunaye, yehlulelani nine. ²⁰ Singeke sikhone kuyekela kukhuluma ngaletintfo lesitibonile kanye nalesitivile.'' ²¹ Emvakwe kucaphelisiswa lokunyenti Phetro na Johane, babayekela bahamba. Abatange bakhone kutfola sizathu sekubajezisa, ngoba bonkhe bantfu bebadvumisa Nkulunkulu ngalakwentile. ²² Lendvodza lekwakwenteke kuyo lommangaliso wekuphiliswa bekangetulu kwemashumi lamane umnyaka budzala. ²³ Emva kwekuba sebakhululiwe, boPhetro na Johane beta kubantfu bakubo babika konkhe lokwashiwo baPhristi nemalunga kubo. ²⁴ Uma bakuva loku, baphakamisa emavi ngenhloso yinye kuNkulunkulu batsi, ''Nkhosi, wenta emazulu nemhlaba nelwandle nako konkhe lokukuwo. ²⁵ Wakhuluma ngaMoya Longcwele ngemlomo ngemgcotjwa wakho, babe wetfu Davide, 'Kuya ngani betive basonge futsi nalabantfu bacabange tintfo letinganamsebenti?' ²⁶ Watsi, 'emakhosi emhlaba atilungiselele kanyekanye, kanye nebabusi bahlangana kanyekanye kumelana neNkhosi bamelana kanye naKhristu wakhe.' ²⁷ Nembala boHerodi na Phontiyusi Pilatu kanye nebetive nebantfu baka Israyeli, bahlanga kanye kanye kulelidolobha bamelana nenceku yakho lengcwele Jesu, lowayigcoba. ²⁸ Bahlangana kanye kanye kutokwenta konkhe sandla kanye neluhlelo lwakho letakuncuma kadzeni kungakenteki. ²⁹ Nyalo Nkhosi, buka letecwayiso tabo bese unika tinceku takho kutsi tikhulume livi lakho ngesibindzi. ³⁰ Yelula sandla sakho utophilisa futsi utosinika tibonakaliso nemimangaliso ngeligama lenceku yakho lengcwele Jesu.'' ³¹ Emva kwekuba sebathandazile, lendzawo lebebakuyo yanyakatiswa, bagcwaliswa ngaMoya Longcwele babese bakhuluma livi laNkulunkulu ngesibindzi. ³² Lenombolo lenkhulu yalabo labakholwa bebamoya munye futsi banhlitiyo yinye. Kute lowatsi noma ngayini layayisesandleni sakhe yakhe, kepha bahlanganyela tintfo tonkhe. ³³ Ngemandla lamakhulu baPhostoli bamemetela bufakazi ngekuvuka kweNkhosi Jesu nemusa lomkhulu bewusetikwabo. ³⁴ Kwababete umuntfu emkhatsisini wabo labeswele, ngoba bonkhe labanemapulazi noma tindlu batitsengisa baletsa lemali yaletintfo labatitsengisile ³⁵ bayibeka etinyaweni tebaphostoli, kwabese kuyahlukaniselwa kuwonkhe muntfu ngangekwetidzingo tabo. ³⁶ Josefa, le baphostoli bamubita nga Bhanabasi (lokusho kutsi Indvodzana yekukhutsata), labengumLevi, indvodza yase Siphrosi, ³⁷ watsengisa insimi yakhe waletsa lemali wayibeka etinyaweni tebaphostoli.