¹ Macondzana nenkonzo leyentelwa bantfu baNkulunkulu labangcwele, akukabaluleki kimi kutsi nginibhalele. ² Ngiyasati sifiso senu, lengangitigabatisa ngaso kubaseMasedoniya. Ngabatjela kutsi baseAkhaya base bavele balungele kusukela ngemnyaka lophelile. Lokukhutsatela kwenu kubafake umdlandla linengi labo. ³ Nyalo ngitfumele bazalwane kuze kutsi kutigabatisa kwetfu ngani kungabi lite, nanekutsi nitolungela. njengobe ngangishito. ⁴ Ngaphandle kwaloko, uma ngingake ngifike nebaseMasedoniya bakhandze kutsi anikalungeli, ngingadliwa mahloni - angisayiphatsi ke yenu - lokubanesibindzi lesingaka ngani. ⁵ Ngiko ngicabange kutsi kubalulekile kutsi ngicele labazalwane kutsi bete kini kutewulungiselelwa ngaphambili ngalesipho lenasetsembisa. Loku kwentelwa kutsi sitfolakale sime ngemumo njengesibusiso, hhayi njengentfo lesigongonyo. ⁶ Lengishoko ngunaku: Loyo lohlanyela kancane uyawuvuna kancane, naloyo lohlanyela anenhloso yekubusiswa uyawuvuna naye sibusiso. ⁷ Akube nguloyo naloyo anikele njengaloko latihlelele kona enhlitiyweni yakhe, angenti ngekudzebesela nobe ngekucindzetelwa, ngobe Nkulunkulu umtsandza lonikela ngekutfokota. ⁸ Futsi Nkulunkulu unemandla ekwenta kutsi umusa uchichime kini, kute kutsi, njalo nje, etintfweni tonkhe, nibe nako konkhe lenikudzingako. Kutawuba nje khona nitawudlanga kuyo yonkhe imisebenti lemihle. ⁹ Kunjengaloku kubhaliwe: "Wenetisa ngengcebo yaKhe wapha labamphofu. Kulunga kwaKhe kuhlala phakadze." ¹⁰ Yena lonika imbewu umlimi lohlanyelako nesinkhwa sekudla utawuninika futsi aphindzaphindze imbewu yenu yekuhlanyela. Utawukwandzisa sivuno sekulunga kwenu. ¹¹ Nitawunotsiswa ngetindlela tonkhe khona nitokwephana. Loko kuyawuletsa kubongwa kwaNkulunkulu ngatsi. ¹² Ngekwenta lenkonzo ayihlangabeti nje kuphela tidzingo tabantfu baNkulunkulu labangcwele, kodvwa iphindze ichichime emisebentini leminyenti yekubonga Nkulunkulu. ¹³ Ngenca yekuvivinywa niphase ngalenkonzo, nitawukhatimulisa Nkulunkulu ngekulalela kwekuvuma livangeli laKhristu. Nitawuphindze nikhatimulise Nkulunkulu ngalokwephana ngalesipho senu kubo nakubo bonkhe. ¹⁴ Bayanilangatelela, futsi bayanithantazela. Loku bakwenta ngenca yawo loyo musa lomkhulu lokini. ¹⁵ Shangatsi kubonga kungaba kwaNkulunkulu ngenca yesipho saKhe lesingachazeki!