¹ Sifuna kutsi nati, bazalwane, ngemusa Nkulunkulu lawuphe emabandla aseMasedoniya. ² Ngesikhatsi sekuvivinywa lokumatima, kuchichima kwenjabulo yabo kanye nekweswela lokukhulu kwabangela lenkhulu ingcebo yekwephana. ³ Ngobe ngiyafakaza kutsi banikela kangangekukhona kwabo, nangetulu kwemandla abo, nagekutincumela kwabo ⁴ ngekushesha basincenga kutsi sibanike litfuba lekuhlanganyela kulenkonzo yebantfu labangcwele baNkulunkulu. ⁵ Loku akwentekanga njengobe sasibhekile, kodvwa batinikela bona kucala eNkhosini nakitsi ngekwentsandvo yaNkulunkulu. ⁶ Ngako sacela Thithu, labese avele awucalile lomsebenti, kutsi acedzele kini lomsebenti wemusa. ⁷ Kodvwa nine nenta kahle kuko konkhe- ekukholweni, ekukhulumeni, elwatini, ekukhutsaleni konkhe, nasekusitsandzeni. Ngako ke cinisekisani futsi kutsi nenta kahle kakhulu nakulesento semusa. ⁸ Ngisho loku hhayi njengemyalo. Kunaloko, ngikusho loku kute ngivivinye kwetsembeka kwelutsandvo lwenu ngekulucatsanisa nekushisekela kwalabanye bantfu. ⁹ Ngobe niyawati umusa weNkhosi yetfu Jesu Khristu. Lekwatsi noma abecebile, ngenca yenu waba ngulophuyile, kute kutsi ngebuphuya bakhe nine nentiwe nibe tinjinga. ¹⁰ Kulendzaba ngitaninika seluleko lesitanisita. ngemnyaka lophelile, anicalanga nje kuphela kwenta lokutsite, kodvwa nafisa kukwenta. ¹¹ Manje ke cedzelani. Nanjengoba nje kwakunenshisekelo nesifiso sekwenta kusho kutsi ke, kufezeni, ngawo onkhe emandla enu. ¹² Ngobe uma ninenshisekelo yekwenta lesento, kuyintfo lenhle naleyemukelekako. Kumele kuye ngaloko umuntfu lanako, hhayi ngalanganako. ¹³ Ngobe lomsebenti awusiwo wekutsi labanye baphunyutwe nine netfwale matima. Kunaloko, kumele kube nekulingana. ¹⁴ Lokutsi ninakunyenti kulesikhatsi kutawuhlangabeta lesidzingo sabo. Loku kukwekutsi futsi kuchichima labanako kuhlangabete sidzingo senu, kwekute kube nekulingana. ¹⁵ Kunjengobe kubhaliwe: " Loyo bekanakunyenti akukho lokwasala, naloyo labekanakuncane akeswelanga lutfo." ¹⁶ Kodvwa akabongwe Nkulunkulu, Lokufake enhlitiyweni yaThithu lokukhatsalela kunaka lokufanana naloko lenginako nami ngani. ¹⁷ Ngobe akemukelanga kumcela kwetfu nje kuphela, kodvwa abevele akukhatsalele kakhulu loko. Ute lapho kini ngekutitsandzela yena. ¹⁸ Simtfumele kini nalomunye umzalwane lodvumisekako emabandleni onkhe ngobe umsebenti wakhe kumemetela livangeli. ¹⁹ Kungesiko loko kuphela, kodvwa futsi wakhetfwa ngemabandla kutsi ahambe natsi sisenta lomsebenti wemusa. Loko kukwekuyihlonipha iNkhosi lucobo neyekwekushisekela kwetfu kusita. ²⁰ Sibalekela kutsi kubete litfuba lekutsi sisolwe nobe ngubani ngalomsebenti wekwephana lesiwentako. ²¹ Siyacaphela kwenta loko lokuhloniphekile, hhayi phambi kweNkhosi kuphela, kodvwa naphambi kwebantfu. ²² Sitfumele lomunye umzalwane futsi kanye nabo. Simhlolile ngetindlela letinyenti samkhandza kutsi ukhutsele emisebentini leminyenti. Nyalo ke sewunenshisekelo lenkhulu ngenca yesibindzi lanaso ngani. ²³ NgaThithu ke, ungumlingani wami nesisebenti senu kanye nami. Banaketfu ke bona, batfunyelwe ngemabandla. Bahloniphekile kuKhristu. ²⁴ Bakhombiseni lutsandvo, nikhombise kulamabandla sizatfu sekutibonga kwetfu ngani.