¹ Batsandzekayo, njengaloku sinato letetsembiso, asitihlambulule kuko konkhe lokusenta singcole emitimbeni yetfu nasemoyeni. Asifunisise bungcwele ekwesabeni Nkulunkulu. ² Sivuleleni tinhlitiyo tenu! kute umuntfu lesimonile. Kute nalesimlimatile nobe ke samphamba. ³ Akusiko kutsi ngisho loku ngobe ngicondze kunilahla ngelicala. Ngoba phela bese ngivele ngishilo kutsi nisetinhlitiyweni tetfu, kangangekutsi singafa lapha nifa khona nekuphila lapha niphila khona. ⁴ Nginesibindzi lesikhulu ngani, futsi ngiyatigcabha ngani. Ngigcwele indvudvuto. Ngichichima intfokoto nakuto tonkhe tinhlupheko ⁵ Nasifika eMasedoniya, imitimba yetfu ayikutfolanga kuphumula. esikhundleni, Saba sekuhluphekeni ngayo yonkhe indlela ngekuphikiswa kubangephandle nekwesatjiswa ngulabangekhatsi. ⁶ Kodvwa Nkulunkulu, lodvudvuta labadzangele, wasidvudvuta ngekufika kwaThithu. ⁷ Akubanga kufika kwakhe nje kuphela lasidvudvuta ngako Nkulunkulu. Kwaba nangendvudvuto labeyitfole kini Thithu. Wasitjela ngelutsandvo, lusizi, nangendlela lenibeke tinhlitiyo tenu kimi ngayo. Loko ke kwangenta ngatfokota nakakhulu. ⁸ Naloku incwadzi yami yanidzabukisa nje, angitisoli ngaloko. Kodvwa ngatisola nangibona kutsi lencwadzi yami inidzabukisile, lite kwaba kwesikhashana nje. ⁹ Nyalo ngiyatfokota, Hhayi ngenca yekudzatjukiswa, kodvwa ngenca yekutsi kudzabuka kwenu kwaniletsela kuphendvuka. Nadzabuka kudzabuka kwebuNkulunkulu, ngako anilahlekelwanga lutfo ngenca yetfu. ¹⁰ Ngobe kudzabuka kwebunkulunkulu kuletsa kuphendvuka lokuphelelisa kusindziswa ngaphandle kwekujabha. Kudzabuka kwasemhlabeni , noko, kuletsa kufa. ¹¹ Bukani ke kutimisela lokukhulu lokudzabuka kwebunkulunkulu lokukwentile kini. Kutimisela lokukhulu lokwakukini kubuvetile bumsulwa benu. Maye kwaba kukhulu kutfoba kwenu, kwesaba kwenu, kulangatelela kwenu, lugcozi lwenu, nekulangatelela kwenu kubona kutsi bulungiswa kumele benteke! Kuko konkhe nibonakalise kuba msulwa kulendzaba. ¹² Naloku nganibhalela, Anginibhalelanga ngenca yalona bekente kabi, hhayi futsi ngenca yalona lowoniwa, kodvwa khona kutawutsi inshisekelo leninayo ngatsi yatiwe ngini emehlweni kwaNkulunkulu. ¹³ Nguko loko ke lokwente kutsi sikhutsateke. Kwengetetela ekudvudvutekeni kwetfu, saphindze sakhutsatwa nakutfokota kwaThithu, ngoba umoya wakhe naniwuvuselele nine nonkhe. ¹⁴ Ngobe njengobe ngatigabatisa ngani kuye, angibanga ngulotseleka emahloni. Lokungatange kutsi, njengobe konkhe lesase sikukhulume kini kuliciniso, kutigabatisa kwetfu ngani kuThithu kwabonakala kuliciniso. ¹⁵ Lutsandvo lwakhe kini luba lukhulu nakakhumbula kulalela kwenu nonkhe, indlela lenamemukela ngayo ngekwesaba nekutfutfumela. ¹⁶ Ngatfokota ngoba nganginesibindzi lesiphelele ngani.