¹ Mine, Pawula, matfupha ngiyanincenga, ngekutfobeka nangebumnene baKhristu. Ngibutsakatsaka nangisemkhatsini wenu, kodvwa nginemandla nangikhashane nani. ² Ngincenga kini kutsi, nase ngisemkhatsini wenu, anginawudzinga kutsi ngibe nemandla nekutetsemba ngesibindzi. Kodvwa ngicabanga kutsi kutawudzingeka ngibe nemandla nangimelana nalabo labacabanga kutsi siphila ngekwenyama. ³ Ngobe naloku sihamba enyameni, asilwi imphi njengekwenyama. ⁴ Ngobe tikhali lesilwa ngato akusito tikhali tenyama. Kunaloko, tingemandla aNkulunkulu ekubhubhisa tincaba letinemandla. Letishabalalisa konkhe kuphikisana lokwedukisako. ⁵ Siphindze futsi sidzilite konkhe lokuphakeme lokuphakamela kumelana nekwati Nkulunkulu. Sitsatsa konkhe kucabanga sikutfumbele ekulaleleni Khristu. ⁶ Futsi sitilungiselela kujezisa sokhe sento sekungalaleli, masinyane nje nangabe kulalela kwenu sekuphelelisiwe. ⁷ Bhekani naku lokucace bha phambi kwenu. Nangabe kukhona locinisekile kutsi uwaKhristu, akatikhumbute loyo kutsi njengaloku awaKhristu nje, natsi ke. ⁸ Ngobe ngisho nobe ngingulotigabatisa kakhudlwana ngalamagunya etfu, lesawaphiwa yiNkhosi kute kutsi sinakhe kunekutsi sinibhubhise, ngete ngaba nemahloni. ⁹ Angifuni kutsi kuvele shengatsi ngiyanesabisa ngetincwadzi tami. ¹⁰ Ngobe labanye bantfu batsi, "Tincwadzi takhe atidlali futsi tinemandla, kodvwa nase umbona ubutsakatsaka. Emagama akasiwo nalongawalalela." ¹¹ Kufanele labo bantfu bacaphele kutsi loko lesinguko emavini etincwadzi tetfu nasingekho nguloko lesitawuba ngiko ngetento nase silapho. ¹² Tsine asitihlanganisi nobe siticatsanise nalabo labatidvumisa bona. Kodvwa nangabe batikala bona lomunye ngalomunye baphindze baticatsanise ngabodvwana, abanako kubonisisa. ¹³ Tsine, lokungenani, angeke sitigabatise ngetulu kwaloko lesikuphiwe. Esikhundleni saloko, sitatigabatisa kuphela kuloko Nkulunkulu lasitfume kukwenta, leyo mikhawulo lehamba ite ifike ngisho lapho kini. ¹⁴ Ngobe nasifika kini sasingakedlulisi kutfunywa kwetfu. Saba bekucala kuhamba site sifike kini ngelivangeli laKhristu. ¹⁵ Asikatigabatisi ngalokwedlula lokungukona kufanele ngekusebenta kwalabanye. Esikhundleni saloko, litsemba letfu lisekutsini njengobe kukholwa kwenu kuchubeka kukhula , umsebenti wetfu emkhatsini wenu utawukwandza kakhulu. ¹⁶ Setsemba loku, ngukhona sitoshumayela livangeli nakuletinye tifundza letingale kwenu. Singeke sitigabatise ngemsebenti lowentiwe endzaweni yalomunye. ¹⁷ "Kodvwa loyo lotigabatisako, akatigabatise eNkhosini." ¹⁸ Ngobe akusiye lotincomako lovunyiwe. Kodvwa nguloyo iNkhosi lemncomako.