¹ Ngiyafisa kutsi ningibeketelele nami kulobulima. Kodvwa vele ningibeketele nami! ² Nginemona ngani! Nginemona lobunebuNkulunkulu ngani, njengobe nganetsembisa emshadweni endvodzeni yinye. Nganitsembisa kuniveta niyintfombi ntfo ku Khristu. ³ Kodvwa nginekwesaba kutsi kungenteka, njengobe inyoka yakhohlisa Eva ngebucili, imicabango yenu kungenteka iphambuke kulokucinisekile nangekutinikela ngalokuhlantekile ku Kristu. ⁴ Ngoba ake sitsi kufika umuntfu amemetele lomunye Khristu kunaloyo lesimushumayelako. Nome asitsi nemukele umoya lowehlukile kunaloyo leniwemukele. Nome asitsi nemukele lelehlukile livangeli kunaleli lenalemukela. Niyatibeketelela letintfo ngalokuphelele! ⁵ Ngiyacabanga kutsi angisuye lomncane kulabo lababitwa ngekutsi ngulabakhulu- baphostoli. ⁶ Nome ngingaka ceceshwa ekukhulumeni, angisuye longakaceceshwa elwatini. Ngato tonkhe tindlela nato tonkhe tintfo sikwentile loku kutsi kwateke kini. ⁷ Ngonile yini ngekutitfoba kuze nine niphakame? Ngoba mine ngashumayela livangeli laNkulunkulu mahhala kini. ⁸ Ngatsatsa kulamanye emabandla ngekwemukela umnikelo kubo kuze nginikhonte. ⁹ Nangisenani benginesidzingo, angizange ngibe umtfwalo nakumunye wenu. Tidzingo tami tahlangabetwa bazalwane labachamuka eMacedonia. Kuko konkhe ngitilondvolotile kutsi ngingabi ngumtfwalo kini, futsi ngitawuchubeka ngente njalo. ¹⁰ Njengobe liciniso laKhristu likimi, lokutibonga kwami ngeke kutfuliswe endzaweni yase Akhaya. ¹¹ Leni? Ngobe anginitsandzi? Ngu Nkulunkulu lowatiko. ¹² Futsi loku lengikwentako ngitawuchubeka ngikwente, kuze kutsi ngingabaniki litfuba labo labafuna litfuba lekutsi batfolakale banjengatsi kuletintfo labatibonga ngato. ¹³ Loluhlobo lwebantfu babaphostoli bemanga netisebenti letibakhohlisi. Bativeta kungatsi baba phostoli ba Khristu. ¹⁴ Loku akumangalisi, ngobe naSathane utiveta ayingelosi yekukhanya. ¹⁵ Akumangalisi uma netikhonti takhe titiveta titikhonti tekulunga. Siphetfo sabo lesibi kutawube kuyimisebenti yabo lebafanele. ¹⁶ Ngiyasho futsi: Akubete locabanga kutsi ngisilima, kepha uma ningemukela njengesilima ngitotibonga kancane. ¹⁷ Lelengikushoko ngikusho ngekutibonga lokucinisekile- angikhulumi njengobe na Nkulunkulu abengakhuluma-ngikusho njenge silima. ¹⁸ Njengobe labanyenti bantfu batibonga ngekwenyama, nami ke ngitawutibonga. ¹⁹ Nitibeketelela ngentfokoto tilima. Nihlakaniphile nani! ²⁰ Ngoba nibeketelela nemuntfu noma asanitigcilata, noma anidla, noma anentisa intfo leningayitsandzi, noma atibona ancono kunani, nome anishaye esihlatsini. ²¹ Ngitawutsi kubelihlazo letfu kutsi besibutsakatsaka kukwenta loko. Uma umuntfu atibonga - ngikhulumisa kwesilima-nami ngitawutibonga kakhulu. ²² BangemaHebheru yini? Ngingilo. Bangema Israeli yini? Ngingilo. Basitukulwane sa Abrahama? Ngingiso. ²³ Batikhonti yini ta Khristu? ( Ngikhuluma ngatsi angikho engcondvweni) Ngingiso ngalokwecile. Ngibe ngiso ngisho nasekusebenteni kamatima, ekuboshweni kanyenti , ngashaywa ngalokwecile, nekubhekana netingoti letinyenti tekufa. ²⁴ Kuma Juda ngemukela kasihlanu ' emashumi lamane yemivimba kukhishwa munye.' ²⁵ Katsatfu ngishaywa ngetindvuku. Ngake ngashaywa ngematje. Katsatfu ngiphihlikelwa ngumkhumbi. Ngicitse busuku nemini ekhatsi nelwandle. ²⁶ Kanyenti ngihamba, engotini yemifula, engotini yetigebengu, engotini yebantfu bakitsi, engotini yabetive, engotini yasedolobheni, engotini yase hlane, engotini ye lwandle, engotini yebazalwane labedukisako. ²⁷ Ngisebentile kalukhuni nangetitfukutfuku, kanyenti ngingabutfoli butfongo, ekulambeni nasekomeni, nasekuzileni, emakhateni nasebungcunwini. ²⁸ Ngetulu kwako konkhe, ngicindzetelwa ngumtfwalo wekukhatsalela onkhe emabandla. ²⁹ Ngubani lobutsakatsaka, ngingesiye lobutsakatsaka? Ngubani lowentiwe kutsi akhubeke, ngingete ngasha? ³⁰ Uma ngingatibonga, ngitawutibonga ngaloko lokukhomba butsatsaka bami. ³¹ Nkulunkulu na Babe weNkhosi Jesu, lodvunyiswa njalonjalo, uyati kutsi angicambi manga! ³² EDamaseku , lombusi ngaphansi kwe Nkhosi Arethasi abegadze lidolobha lase Damaseku kuze bangibophe. ³³ Kodvwa ngehliswa ngelibhakede ngelifasitelo elubondzeni, ngaphunyuka esandleni sakhe.