¹ Ngako-ke, njengoba sinalenkonzo, nanjengoba semukeliswe bubele, asidzangali. ² Kunaloko, sitilahlile tindlela letifihliwe naletihlazisayo. Asihambi ngebucili, futsi asilifulatselisi livi laNkulunkulu. Ngekukhuluma liciniso, sitincoma kunembeza wabo bonkhe phambi kwaNkulunkulu ³ Kodvwa nangabe livangeli letfu lifihlekile, lifihleke kuphela kulabo lababhubhako. ⁴ Kulabo, Nkulunkulu walomhlaba uphuphutsekise tingcondvo tabo letingakholwa. Ngenca yaloko, abakhoni kubona kukhanya kwelivangeli lenkhatimulo yaKhristu, longumfanekiso waNkulunkulu. ⁵ Ngoba asitishumayeli tsine, kodvwa Khristu Jesu njengeNkhosi, nanatsi njengetikhonti tenu ngenca yaJesu. ⁶ Ngoba Nkulunkulu nguye lowatsi, "Kukhanya kuyawukhanya ebumnyameni." Ukhanyisile etinhlitiyweni tetfu, kusipha kukhanya kwekwati inkhatimulo yaNkulunkulu ebukhoneni baKhristu ⁷ Kodvwa sinalengcebo etitjeni telibumba, kute kukhanye kutsi lamandla lamakhulu ngalokwedlulele ngewaNkulunkulu akusiwo etfu. ⁸ Siyacindzetelwa ngetindlela tonkhe, kodvwa asiphelelwa ngemandla. Siyacakeka kodvwa asidzangali. ⁹ Siyahlushwa kodvwa asidzelwa; sishaywa siwiswe phansi kodvwa asibhujiswa; ¹⁰ setfwele imihla ngemihla emtimbeni wetfu kufa kwaKhristu , kuze kutsi nekuphila kwaJesu kwembulwe nako emtimbeni wetfu. ¹¹ Ngoba tsine lesiphilako sinikelwa njalo njalo ekufeni ngenca yaJesu, kuze kutsi kuphila kwaJesu kubonakaliswe kulenyama yetfu lefako. ¹² Ngako ke kufa kusemsebentini, kodvwa kuphila kusemsebentini kini. ¹³ Kodvwa sinamoya munye wekukholwa njengaloku kubhaliwe: " Ngakholwa, ngako ngakhuluma." Siyakholwa futsi, bese futsi siyakhuluma, ¹⁴ ngobe siyati kutsi loyo lowavusa iNkhosi Jesu uyawusivusa naye Jesu asiletse kanye nani ebukhoneni bakhe. ¹⁵ Ngoba konkhe kungenca yenu, kuze lomusa loseloku ufinyelela kubantfu ungenta kutsi kubonga kukhule kube ludvumo kuNkulunkulu. ¹⁶ Ngako ke asidzangali . Naloku lingephandle letfu lishabalala, lingekhatsi lentiwa busha imihla ngemihla. ¹⁷ Ngobe Letinhlupheko tesikhashana, letimalula tisilungiselela inkhatimulo lenesisindvo yaphakadze leyengca tonkhe tilinganiso. ¹⁸ Ngobe tsine asikabheki tintfo letibonwako, kodvwa tintfo letingabonwa. Tintfo letibonwako titesikhashana, kodvwa letintfo letingabonwa titaphakadze.