¹ Ingabe sesicale kutibonga futsi? Asitidzingi tincwadzi tekusincoma kini nobe letivela kini, njengalabanye bantfu, kambe vele? ² Nine cobo lwenu niyincwadzi yekusincoma, lebhalwe etinhlitiyweni tetfu, yatiwa futsi ifundvwe bantfu bonkhe. ³ Nibonakalisa kutsi niyincwadzi levela kuKhristu, leyetfulwa ngitsi. Lengabhalwanga nge inki kodvwa ngaMoya waNkulunkulu lophilako. Lengakabhalwa etibhelekeceni tematje, kodvwa etibhelekeceni tetinhlitiyo tebantfu. ⁴ Futsi ngiso lesi sibindzi lesinaso ngaye Khristu phambi kwaNkulunkulu. ⁵ Asisibo labanelikhono ngekwetfu kwekutsi singadzimate sitsi kukhona lokuvela kitsi. Kunaloko, likhono letfu livela kuNkulunkulu. ⁶ NguNkulunkulu lowasenta sakhona kuba tikhonti tesivumelwano lesisha. Lesi sivumelwano lesingesiso sencwadzi kodvwa saMoya. Ngobe incwadzi iyabulala, kodvwa Moya uniketa kuphila. ⁷ lenkonzo leyaletsa kufa - ibhalwe ngekucindzetela tinhlavu ematjeni - yefika ngenkhatimulo kangangekutsi emadvodzana aka Israyeli ehluleka kubuka ngco buso baMose. Loko kwentiwa kukhatimula kwebuso bakhe, inkhatimulo leyayitawunyamalala. ⁸ Inekhatimulo lenkhulu kanganani ke lenkonzo leyentiwa nguMoya? ⁹ Ngobe uma inkonzo lebulalako yayinenkhatimulo, kakhulu kangakanani ke lenkonzo yekulunga iyawuhlala itinte enkhatimulweni! ¹⁰ Ngobe ngeliciniso, loko lokwake kwentiwa kwaba nenkhatimulo akusenayo manje , ngenca yenkhatimulo lese iyinkhulu kwedlula leyako. ¹¹ Ngobe uma loko lokwedlulako kwaba nenkhatimulo , kakhulu kangakanani ke inkhatimulo yaloko lokukhona siphelane. ¹² Njengoba ke sinalelo tsemba, sinesibindzi. ¹³ Asifanani naMose, lowabufihla buso bakhe ngendvwangu kute kutsi emadvodzana aka Israyeli angakhoni kubuka ngco kuphela kwaleyo nkhatimulo leyayedlula. ¹⁴ Kodvwa tingcondvo tabo tativalekile. Ngoba kute kube ngulamuhla, uma bafundza sivumelwano lesidzala, yona leyo ndvwangu ihlala ikhona. Ayikasuswa, ngoba kukuKhristu kuphela lapho isuswa khona. ¹⁵ Kodvwa ngisho nalamuhla, nakufundvwa Mose, lendvwangu yembonya tinhlitiyo tabo. ¹⁶ Kodvwa ngesikhatsi umuntfu aphendvukela eNkhosini, lendvwangu iyesuswa. ¹⁷ INkhosi inguMoya. Lapho Moya weNkhosi ukhona, kukhona inkhululeko. ¹⁸ Manje ke sonkhe, ngebuso lobungakembonywa, sibona inkhatimulo yeNkhosi. Siguculelwa kuyifuta yona leyo nkhatimulo sisuka kulinye lizinga lenkhatimulo siye kulelinye, njengoba kuvela eNkhosini, lenguMoya.