¹ Ngase ngiyatincumela ngekwami kutsi ngingeti futsi kini ngesimo sebuhlungu. ² Uma nganivisa buhlungu, bengingatfokotiswa ngubani ngaphandle kwaloyo lengimlimatile? ³ Ngabhala njengoba ngenta kuze kutsi nangita kini ngingalinyatwa ngulabo lebekufanele bangente ngitfokote. Nginesibindzi ngani nonkhe kutsi injabulo yami iyafana naleyo leninayo nani nonkhe. ⁴ Ngobe nganibhalela ngiselusizini, ebuhlungwini benhlitiyo, nase tinyembetini letinyenti. Ngangingafuni kunivisa buhlungu, Kunaloko, ngangifuna nikwati kujula kwelutsandvo lenginalo ngani. ⁵ Nakukhona lovise buhlungu, akevisi mine kuphela, kodvwa kulokunye - hhayi kabi - nani nonkhe. ⁶ Lokujeziswa kwaloyo muntfu linyenti kwenele. ⁷ Ngako nyalo kunekumjezisa, mtsetseleleni nimdvudvute. Yentani loko kute angenganywa lusizi lolunyenti. ⁸ Ngako nginikhutsata kutsi nilucinisekise ngalokusobala lutsandvo lenimtsandza ngalo. ⁹ Ngiso ke lesizatfu ngabhala, kute ngitonivivinya ngati nekutsi niyalalela kuko konkhe. ¹⁰ Uma nitsetselela nobe ngubani, nami ngiyamtsetselela loyo. Lengikutsetselele - nakukhona lengikutsetselele - kutsetselelwe ngenca yenu ebukhoneni baKhristu. ¹¹ Loko sikwentela kutsi Sathane angasiyengi. Njengobe asisibo labangawati emacebo akhe. ¹² INkhosi yangivulela umnyango nangifika edolobheni leThrowasi kutsi ngishumayele livangeli laKhristu lapho. ¹³ Ngangingenako kuphumula emoyeni wami ngobe phela angimkhandzanga umzalwane wami Thithu lapho. Ngako ngabashiya ngachubekela eMasedoniya. ¹⁴ Kodvwa akabongwe Nkulunkulu, losihola njalo ngaKhristu eludvwendvweni lekuncoba. Ngatsi uvakalisa liphunga lelimnandzi lekumati Yena etindzaweni tonkhe. ¹⁵ Ngobe kuNkulunkulu siliphunga lelimnandzi laKhristu, emkhatsini walabo labasindziswako nasemkhatsini walabo lababhubhako. ¹⁶ Kulabo lababhubhako, kuliphunga lekusuka ekufeni kuya ekufeni. Kulabo labasindziswako, kuliphunga lekusuka ekuphileni kuya ekuphileni. Ngubani ke lofanelekile nguletintfo? ¹⁷ Ngobe asifanani nalabantfu labanyenti labatsengisa livi laNkulunkulu ngenzuzo. Kunaloko, nganembeza lomhlophe, sikhuluma sikuKhristu, njengobe sitfunywe nguNkulunkulu, ekuboneni kwemehlo akhe Nkulunkulu.