¹ Ungayikhahli indvodza lendzala, kodvwa uyiyale kube shangatsi uyala uyihlo; labadvuna labasebancane ubaphatse shengatsi bomnakenu. ² Labasikati labadzala ubaphatse shengatsi uphetse bonyoko, nalabasikati labasebancane ubaphatse shengatsi uphetse bodzadzewenu, ubemsulwa kubo bonkhe. ³ Ubatise bafelokati, lababafelokati sibili. ⁴ Nangabe umfelokati anebantfwana nome batukulu, abacale bakhombise inhlonipho yabo emakhaya kubo, babuyisele kubonga kwabo kulabo lababakhulisile, ngobe nguloko lokuhle emehlweni aNkulunkulu. ⁵ Kodvwa lowo longumfelokati sibili, longasenabani, litsemba lakhe lonkhe sewulibeke kuNkulunkulu. uthandaza busuku nemini acela lusito kuNkulunkulu. ⁶ Kodvwa ufelokati lotinikele etinkhanukweni ufile aphila. ⁷ Bayale ngaloku, kuze bangasoleki. ⁸ Kepha nangabe umuntfu anganakekeli tihlobo takhe, ikakhulu labo lababendlu yakhe sewukulahlile kukholwa, futsi loko kwenta kwakhe kubi kakhulu kunekwemuntfu longakholwa. ⁹ Umfelokati, loneminyaka lengetulu kwa-60, ungambhalisa, nangabe abeshade kanye. ¹⁰ Kufanele atiwe ngentento takhe letinhle, njengemuntfu lowake wondla wakhulisa bantfwana, waphatsa kahle tihambi, wageza tinyawo talabangcwele, wasita labahluphekile, futsi kufanele abe ngulabetimisele kwenta lokuhle nome ngayiphi indlela. ¹¹ kodvwa bafelokati labasebancane ungababhalisi, ngoba nangabe tinkhanuko tabo tenyama setibenta basuke kuKhristu, babese bafisa kwendza. ¹² Ngaleyo ndlela batifaka ekwehlulelweni ngekuphambuka esitsembisweni sabo sekucala. ¹³ Ngetulu kwaloko bafundza buvila ngekutfunga imiti, bangagcini ngebuvila kuphela, kodvwa babuye bahlebe, bangene kulokungesiko kwabo, bakhulume nalokungakafaneli. ¹⁴ Ngifisa kutsi bafelokati labasebancane bendze, batale bantfwana, baphatse imindeni yabo, kuze sitsa singetulitfola litfuba lekunyembenya labakholwako. ¹⁵ Vele, labanye sebaphambukile, balandzela sathane. ¹⁶ Nangabe kukhona umfati lokholwako lonebafelokati labatihlobo, akabasite; lingetfweswa umtfwalo libandla, khona litekusita labo labaswele ngempela. ¹⁷ Baholi belibandla labaphetse kahle bafanele kubongwa ngalokuphindziwe, ikakhulu labo labasebenta ngekushumayela nangekufundzisa. ¹⁸ Empeleni umbhalo utsi, ''ungayifaki sifonyo inkhabi nayibhulako'' uphindze utsi ''sisebenti sifanelwe liholo laso.'' ¹⁹ Ungakwemukeli kubekwa licala kwemholi welibandla ngaphandle kwekutsi kube nabofakazi lababili nobe labatsatfu. ²⁰ Labo labonako ubasole ubekhute embikwabo bonkhe, khona nalabo labanye batewuhlala ngekwesaba. ²¹ Ngiyakuyalisisa, embikwaNkulunkulu, naKhristu Jesu, netingelosi letikhetsiwe, kutsi lemiyalo lekhetsiwe, kutsi lemiyalo uyigcine ngebucotfo ungavuni muntfu. ²² Ungasheshi kubeka tandla kunome ngukubani, futsi ungabambisani nemuntfu etonweni takhe, tigcine umusulwa. ²³ Yekela kunatsa emanti odvwa, ubosale unatsa nelitsantana leliwayini ngenca yesisu sakho nalokugula lokuvame kukuhlupha. ²⁴ Tono talabanye bantfu tisebaleni, tiyabendvulela tibaholela ekwehlulelweni. Kodvwa talabanye tiyabalandzela tibonakala kamuva. ²⁵ Kanjalo tento letinhle tisebaleni, naleto letingakabonakali angeke tihlale tifihlakele.