¹ Nyalo Moya ukhuluma ngalokusebaleni kutsi ngetikhatsi tekugcina labanye bayawuhlubuka ekukholweni, balandzele imimoya ledukisako netimfundziso temadimoni. ² Bantfu labatentisako bayawufundzisa emanga, ngobe bonembeza babo bashiswe luphawu. ³ Bayawuvimbela kushada futsi batjele bantfu kutsi abazile kudla lokutsite, kudla lokwadalwa nguNkulunkulu lekufanele kutsi labakholwako bakwemukele ngekubonga, njengobe babantfu labalatiko liciniso lonkhe. ⁴ Ngobe konkhe lokudaliwe nguNkulunkulu kulungile. kuko konkhe lokwemukelwa ngekubonga kute lokufanele kwaliwa. ⁵ Ngobe konkhe kungcweliswe ngelivi laNkulunkulu nangemthandazo. ⁶ Uma wendlulisa lomlayeto kubazalwane, utawuba sisebenti saKhristu lesincomekako. Nawe utakondleka emoyeni ngemavi ekukholwa nangenfundziso yeliciniso nalobambelele kuyo. ⁷ Kepha ungahambisani netinganekwane tetalukati letingakalungi. Tetayete wena kumesaba Nkulunkulu. ⁸ Ngobe kwetayeta umtimba kwelula imisipha kunenzuzo kwesikhashana nje, kodvwa kumesaba Nkulunkulu kunenzuzo etitfweni letinyenti, ngobe kucuketse setsembiso semphilo yamanje kanye nesemphilo letako. ⁹ Lelivi letsembekile, lifanele kwemukelwa ngibo bonkhe. ¹⁰ Ngenca yaloku sitikhandla kakhulu, ngobe sibeke litsemba letfu kuNkulunkulu lophilako, longuSimakadze wabo bonkhe bantfu, ikakhulu walabo labakholwako. ¹¹ Yala ufundzise ngaletintfo. ¹² Ungavumi kutsi busha bakho budzeleleke kubantfu. kodvwa bani sibonelo kulabakholwako; ube sibonelo ngekukhuluma, nangesimilo, nangelutsandvo, nangekukholwa. ¹³ Ngite ngibuye, tinikele kufundzela bantfu umbhalo, ubayele, ubafundzise. ¹⁴ Ungasiyekeleli lesipho lesikuwe, lowaniketwa sona ngesi phrofetho, ngesikhatsi baholi belibandla bakubeka tandla. ¹⁵ Khutsala kakhulu kuloku. yiba kuko, kute inchubekela phambili yakho itobonakala kubo bonkhe bantfu. ¹⁶ Uticaphele wena nekufundzisa kwakho, cubeka kuletintfo leti. Ngobe ngekwenta njalo, utawutisindzisa wena futsi nalabo labakulalele.