¹ Bonkhe labangaphansi kwelijoko lekuba tisebenti ludvumo lonkhe abalunike baphatsi babo, kuze phela lingahlambalateki libito laNkulunkulu nemfundziso yakhe yonkhe. ² Tigcila letinebaphatsi labakholwako kufanele kutsi tingabedzeleli ngeligunya lekutsi babazalwane. Kodvwa kumele tisebente kancono, ngobe labo labasitakala ngekusebenta kwato ngulabatsandzekako labakholwako. ubofundzisa uyale ngalokusebaleni ngaletintfo. ³ Nangabe kukhona lofundzisa lokunye lokungavumelani nemavi laphilile eNkhosi yetfu Jesu Khristu, nemfundziso lenekumesaba Nkulunkulu, ⁴ Uyatikhukhumeta, akati lutfo, uguliswa yimibuto nekuphikisana lokuveta umona, nembango nekuhlambalata, nekucabanga lokubi. ⁵ Nemsindvo wembango longapheli webantfu labanengcondvo leyonakele, futsi labemukwe neliciniso, bacabanga kutsi kwesaba Nkulunkulu yindlela yenzuzo. ⁶ Vele kuyinzuzo lenkhulu kwesaba Nkulunkulu kanye nekwenetiseka. ⁷ Ngobe kute leseta nako la mhlabeni, futsi kute lesiyawuhamba nako. ⁸ Kunaloko, nasinekudla nekwekwembatsa aseneliseke. ⁹ Kodvwa labo labafisa bunjinga bawela ekulingweni, naselugibeni. Bawela nasetinkhanukweni letinyenti tebulima, naletiyingoti letigcumukelisa bantfu ekufeni nasekubhujisweni. ¹⁰ Phela kutsandza imali kuyimphandze yako konkhe lokubi. labanye ngekuyifisa kwabo badukile, bakhwesha ekukholweni, batigwaza ngemijunju lebuhlungu lenyenti. ¹¹ Kodvwa wena, muntfu waNkulunkulu, kubalekele loko. Funisisa kulunga, nekwesaba Nkulunkulu, nekukholwa, nelutsandvo, nekubeketela, nebumnene. ¹² Yilwa kulwa lokuhle kwekukholwa, kute uzuze kuphila lokuphakadze lowabitelwa kuko, wavuma kuvuma lokuhle embikwabofakazi labanyenti. ¹³ Ngikuyala embikwaNkulunkulu, loniketa kuphila kuko konkhe, nasembikwaKhristu Jesu lowavuma kuvuma lokuhle embikwaPhonthiyasi Philatu, ¹⁴ Kutsi ugcine lomyalo, ungenabala, ungasoleki kute kube sikhatsi sekubonakala kweNkhosi yetfu Jesu Khristu. ¹⁵ Ngesikhatsi sakhe Jesu utawubonakaliswa nguSomandla lokunguye yedvwa, lobusisekile, iNkhosi yemakhosi neMbusi webabusi. ¹⁶ Nguye yedvwa longabhubhi lohlala ekukhanyeni lokungasondzeleki kuko, longazange asabonwe ngumuntfu, nalongeke abonwe ngumuntfu. kuye akubeludvumo nemandla aphakadze Ameni. ¹⁷ Yala labacebile kule live lamanje kutsi bangatikhukhumeti, bangabeki nematsemba abo kulomcebo lophelako, kodvwa bawabeke kuNkulunkulu losipha konkhe ngalokuphelele, kute sitfokote ngako. ¹⁸ Ubatjele kutsi bente lokuhle, bacebe emisebentini lemihle, babelane, baphane. ¹⁹ Ngaloko batibekele sisekelo lesihle, sesikhatsi lesitako, khona batawunamatsela ekuphileni lokungiko sibili ²⁰ Ye Thimothi, londvolota loko lophatsiswe kona. ugweme kukhuluma lokulite nekuphikisana lokutsiwa lwati kubekungasilo, ²¹ Ngobe labanye batsi ngekumemetela loko balahlekelwa ngumgomo wekukholwa. umusa awube nani.