¹ Yindlela umuntfu lekumele asitsatse ngayo, njengetisebenti taKhristu nebaphatsi bemaciniso lafihlakele aNkulunkhulu. ² Manje baphatsi kumele bakhandzakale batsembekile. ³ Kodvwa kimi kuyintfo lencane kutsi ngehlulelwe ngini nome yinkantolo yebantfu. Ngoba angitehluleli nanami. ⁴ Angati lutfo ngelicala lelibekwe mine, kepha loko akusho kutsi ngilungile. lowehlulela mine yinkhosi . ⁵ Ngako ke ungehliseli ngekwehlulela ngaphambi kwesikhatsi, ngaphambi kwekube inkhosi ibuye. Itawuletsa ekukhanyeni tintfo letifihlakele tebumnyama phindze ivete tinjongo tenhlitiyo. Bese ngamunye utfola kudvunyiswa kwakhe ku Nkulunkulu. ⁶ Nyalo, bazalwane, ngisebentisa lemigomo kimi naku Apholosi ngenca yenu, kute kutsi ngakitsi ningafundza bumcoka balenkhulumo,'' Ningahambi nece kuloku lokubhaliwe.'' ⁷ Ngoba ngubani lobona umehluko emkhatsini kwakho nalabanye? Yini lonayo longakayitfoli? Nangabe uyitfolile, udvwaliswa yini wente ngatsi awukayitfoli? ⁸ Senivele ninako konkhe leningahle nikufune! Seninjingile! Senitente emakhosi ngaphandle kwetfu! Imphela, ngiyafisa ngatsi ngabe ningemakhosi sibili, kumbe singabusa natsi kanye nani. ⁹ Ngoba ngicabanga kutsi Nkulunkulu ubeke tsine baphostoli kutsi sibe bekugcina eludvwendvweni sifanane nebantfu labagwetjwe intsambo. Sentiwe saba ngumbukiso eveni lonkhe, etingilosini, nakubantfu. ¹⁰ Sitilima ngengca yaKhristu, kodvwa nine nihlakaniphile kuKhristu. Tsine sibutsakatsaka ngenca yaKhristu, kepha nine ninemandla. Nine niyahlonipheka, kepha tsine siyanyembenywa. ¹¹ Kuze kube ngulelihora lanyalo siyalamba, some, asinatimphahla kahle, sishaywe, site emakhaya. ¹² Sisebenta kametima, sisebente ngetandla tetfu. Sitsi sihletjwa sibe sibusisa. Sitsi sitingelelwa kuhlushwa, siyacinisela. ¹³ Sitsi sinyembenywa, sikhulume kahle. Kute kube ngulamuhla sentiwa tibi temhlaba, nekungcola kwentintfo tonkhe, kute kube ngunyalo. ¹⁴ Angibhali loku kuze ngitonidlisa emahloni, kodvwa kutonicwayisa njengebantfwabami lengibatsandzako. ¹⁵ Noma ngabe ningaba nebaluleki labangu 10000 ku-Khristu, nite boyihlo labanyenti. Ngako-ke ngaba nguyihlo ku-Khristu Jesu ngeliVangeli. ¹⁶ Ngako-ke ngiyanincenga kutsi nibe balingisi bami. ¹⁷ Ngiko nganitfumelela Thimothi, umtfwanami lengimtsandzako futsi lotsembeke eNkhosini. Utanikhumbuta ngetindlela tami enkhosini, njengoba ngitifundzisa yonkhe ndzawo nakuwo onkhe emabandla. ¹⁸ Nyalo labanye benu sebakhukhumele, benta ngatsi angeke ngiseta kini. ¹⁹ Kodvwa ngitakuta kini kudze madvutane, na iNkhosi ivuma. Ngako ke ngeke ngati nje emavi kuphela alabo labakhukhumele, kodvwa nemandla abo ngitawabona. ²⁰ Ngoba umbuso waNkulunkulu awuyi ngemagama, kodvwa uya ngemandla. ²¹ Nifunani? Ngite kini ngendvuku, nome ngite ngelutsandvo nangemoya lomnene?