¹ Sivile umbiko kutsi kukhona bugwadla emkhatsini wenu, kuneluhlobo lobugwadla lolungakavumeleki ngisho emkhatsini wemahedeni; Indvodza ilala nemfati weyise ² .Nikhukhumele! Akufanele yini kutsi ngabe niyalila?Loyo lowente loku kufanele asuswe emkhatsisini wenu. ³ Ngoba noma ngingekho emtimbeni, ngikhona ngamoya. Sengivele ngikwendlulisele kwehlulela kuloyo lowente loko, njengekungatsi ngikhona. ⁴ Nanihlangene ngelibito leNkhosi yetfu Jesu mine nginani ngamoya, nemandla eNkhosi yetfu Jesu akhona, ⁵ Loyo muntfu mlahleleni kuSathane kuko kubhujiswa kwenyama, khona lapho umoya wakhe utosindziswa ngelilanga leNkhosi. ⁶ Kutikhukhumeta kwenu akusiko kahle. Anati yini kutsi imvubelo lencane ikhukhumalisa umkhama wonkhe? ⁷ Tihlambululeni ngekwenu emvubelweni lendzala khona lapho nitoba yinhlama lensha, lengenambiliso. Ngoba Khristu, imvu yeliPhasika, selinikelwe. ⁸ Ngako ke asigubheni umkhosi, hhayi ngemvubelo lendzala, imvubelo yemikhuba lemibi. Ngaphandle, asigubheni ngesinkhwa lesingenambiliso lesikungatentisi neliciniso. ⁹ Nginibhalele encwadzini kutsi ningatimbandzakanyi nebantfu labagwadlako. ¹⁰ Angisho bantfu labagwadlako balelive, nalabaticabangela bona, tigebengu, laba khonta tithico, njengoba kusuka kubo kungafuneka ususwe lapha emhlabeni. ¹¹ Kodvwa nyalo ngiyanibhalela kutsi ningahlanganyeli nemuntfu lobitwa ngekutsi ngumzalwane kodvwa aphila ngebugwadla, loyo lonemhobholo, noma lokhonta tithico, lohlukumeta ngekukhuluma, noma sidzakwa, noma sigebengu. Ningadli nekudla nemuntfu lonjalo. ¹² Ngingakwenta kanjani kutsi ngingenele kwehlulela labo labangaphandle kwelibandla? Kunaloko, akukafanele yini nehlulele labo labangekhatsi ebandleni? ¹³ Kodvwa Nkulunkulu utawehlulela labo laba ngaphandle. ''Susani umuntfu lomubi emkhatsini wenu''.