¹ Nanami, bazalwane, angikhonanga kukhuluma kini njengebantfu bakomoya, kepha njengakubantfu benyama, njengakubantfwana labancane kuKhristu. ² Nganondla ngelubisi, hhayi kudla lokucinile, ngoba benisengakakulungeli lokucinile; nanyalo nisengakakulungeli. ³ Phela solo nisebantfu benyama. Ngoba lapho umona nekucabana kusemkhatsini wenu, aniphili ngekwenyama na, futsi anihambi ngekwemazinga ebantfu na? ⁴ Ngoba uma umuntfu atsi, ''Ngilandzela Pawula,'' nalomunye atsi, ''Ngilandzela Apholosi? ⁵ Ngubani Apholosi? Ngubani Pawula? Tisebenti lenikholwe ngato, njengaloku iNkhosi ibanike imisebenti kumunye nangamunye . ⁶ Ngahlanyela wase Apholosi uyanisela, kepha Nkulunkulu wakhulisa. ⁷ Ngako ke, kute lolutfo kulohlanyelako noma loniselako. Kepha nguNkulunkulu loniketa lokukhula. ⁸ Nyalo loyo lohlanyelako naloyo loniselako bamunye, nguloyo utawutfola umholo ngekwemsebenti wakhe. ⁹ Ngoba sitisebenti taNkulunkulu. Nine niyingadze yaNkulunkulu, sakhiwo saNkulunkulu. ¹⁰ Ngekwemusa waNkulunkulu lowaniketwa kimi njengamakhi losezingeni lelisetulu, ngabeka sisekelo kantsi lomunye wakha kuso. ¹¹ Ngoba kute longabeka lesinye sisekelo ngaphandle kwaleso lese sibekiwe, lesingu, Jesu Khristu. ¹² Nangabe kukhona lowakha kulesisekelo ngeligolide, lisiliva, ngematje ladulile, ngesigodvo, ngetjani noma ngetinhlanga, ¹³ umsebenti wakhe utawuvetwa, ngoba kukhanya kutakuveta. Ngoba kutawuvetwa emlilweni. Umlilo utawuvivinya bunjalo belizinga laloko naloko umuntfu lakwentile. ¹⁴ Nangabe umsebenti wanoma ngubani uma, utawemukela umvuzo; ¹⁵ kepha uma umsebenti wanoma ngubani usha uphela, utawulahlekelwa ngumvuzo, kepha yena matfupha utawusindziswa, kodvwa kubengatsi ubaleke emlilweni. ¹⁶ Anati yini kutsi nilithempeli laNkulunkulu nekutsi Moya waNkulunkulu uphila kini? ¹⁷ Uma kunalobhubhisa lithempeli laNkulunkulu, Nkulunkulu utambhubhisa loyo muntfu. Ngoba lithempeli laNkulunkulu lingcwele, nani ninjalo. ¹⁸ Akubete lotiyengako. Uma emkhatsini wenu kukhona locabanga kutsi uhlakaniphile kulesikhatsi, akabe ''silima'' kute atewuhlakanipha. ¹⁹ Ngoba buhlakaniphi balomhlaba bubulima kuNkulunkulu. Ngoba kubhaliwe, "Ubamba labahlakaniphile ebucilini babo.'' ²⁰ Kantsi futsi, ''INkhosi iyati kutsi kucabanga kwalabahlakaniphile akunamsebenti.'' ²¹ Ngalesizatfu lesi, akubebete lotikhukhumeta kubantfu. Tonkhe tintfo ngetenu, ²² noma Pawula, noma Apholosi, Khefasi, noma lomhlaba, noma imphilo, noma kufa, noma tintfo letikhona, noma tintfo letitako. Tonkhe tintfo ngetenu, ²³ kani nine nibaKhristu, naKhristu waNkulunkulu.