¹ Ngesikhatsi ngifika kini, bazalwane, Angifikanga ngenkhulumo yemavi enhlakanipho njengobe ngamemetela emaciniso lafihlakele ngaNkulunkulu. ² Ngoba ngakhetsa kungati lutfo ngesikhatsi nginani ngaphandle kwa Jesu Khristu, naye abetselwe. ³ Benginani ebutsakatsakeni, kanye nasekwesabeni, nasekuchachateleni lokukhulu. ⁴ Umlayeto nekumemetela bekungasiwo emavi ekugcizelela enhlakanipho. Esikhundleni, abenekubonakalisa kwaMoya nekwemandla, ⁵ kute kukholwa kwenu kungabi sekwatini kwebantfu, kodvwa emandleni aNkulunkulu. ⁶ Nyalo sikhuluma inhlakanipho kulaba khulile, kodvwa hhayi inhlakanipho yalomhlaba, noba yebabusi balesikhatsi, labedlulako. ⁷ Esikhundleni saloko, sikhuluma inhlakanipho yaNkulunkulu leliciniso lebeli fihliwe, inhlakanipho yaNkulunkulu lokwaba yintfo yekucala Nkulunkulu layenta ngaphambi kwetikhatsi tenkhatimulo yetfu. ⁸ Kute ngisho munye kulababusi banyalo labaku condza loku, ngoba ibe bayakucondza, ngabe abatange bayibetsele Inkhosi yenkatimulo. ⁹ Kodvwa njengobe kwakubhaliwe, ''Kute liso lelibonile, noma indlebe levile, kute nenhlitiyo yemuntfu leke yacabanga kutsi Nkulunkulu ubalungisele ini labo labamutsandzako''- ¹⁰ Ngoba Nkulunkulu sokuvetile loku kitsi ngaMoya. Ngoba Moya uphenya yonkhe intfo, nalokuse kujuleni kwetintfo taNkulunkulu. ¹¹ Ngoba ngubani lowati imicabango yemuntfu ngaphandle kwemoya wemuntfu longekhatsi kuye? Ngakoke lokunye, kute lowati ekujuleni kwetintfo taNkulunkulu ngaphandle kwaMoya waNkulunkulu. ¹² Kodvwa asizange semukela umoyo waseveni kodvwa uMoya lovela kuNkulunkulu, khona sitewukwati letintfo lesinikwe nguNkulunkulu tona mahhala. ¹³ Sikhuluma ngaletintfo ngemavi lesingakafundziswa yinhlakanipho yemuntfu kepha ngeyaMoya, sihumusha tintfo taka moya kubantfu baka moya. ¹⁴ Umuntfu longekho emoyeni akatimukeli letintfo taMoya waNkulunkulu, ngoba kubulima kuye. Akakwati yena ngoba tihlolisiseka ngamoya. ¹⁵ Loyo wakamoya uhlulela tonkhe tintfo, kepha akana wehlulelwa ngulabanye. ¹⁶ ''Ngoba ngubani longati ingcondvo yeNkhosi, kute ateyitjela kutsi yente ini?''