¹ Natile, ''Nomba umfweni, imwe mwe ntungulushi shakwa Israel: Tecisuma kuli imwe ukwishiba umulinganya? ² Imwe mwebapata ubusuma nokutemwa ububi, mwe basusula inkanda shabo, umubili wabo ukufuma ku mafupa yabo. ³ Imwe mwebalya umubili wa bantu bandi, nokususula inkanda shabo, ukutobaula amafupa yabo, nokuyaputaula mutupimfya, nge nama mumpoto, kwati ninama ili mukati kacipiko. ⁴ Elyo imwe mwebakatungulula mukalilila kuli Yawe, lelo takamwasuke. Akafisa icinso cakwe ukufuma kuli imwe pali ilya nshita, pantu mwatitile ifyabipa.'' ⁵ Yawe asosa ifi, ''Pali imwe bakasesema mwe batungulula abantu bandi kukuluba, nga umo abapelapo fimo kukulya, bakabile, 'Umutende.' Lelo nangu tabikile nangu kamo mutunwa twabo, baimisha abene ku nkondo pali ena. ⁶ Napali ico, cikaba ubushiku kuli imwe ukwabula icimonwa kuli imwe; kukaba imfifi pakuti mwikabuka imbuko. Nakasuba kakawila pali bakasesema, nakasuba kakaba imfifi pali bena. ⁷ Abamona ifimonwa bakalengwa insoni, nababuka imbuko bakasebana. Bonse bakafimba pamilomo shabo, pantu takwakabe ubwasuko ukufuma kuli Lesa. ⁸ Lelo ine, ninjisulamo umupashi wakwa Yawe, kabili ninjisulamo umulinganya na maka, kukulanda kuli Yakobo ubupulumushi bwakwe, nakuli Israel palubembu lwakwe. ⁹ Nomba umfweni kuli ici, imwe mwe ntungulushi sha mu ng'anda ya kwa Israel, imwe mwe bapata umulinganya, no kupondamika conse icamulinganya. ¹⁰ Mwakula Sione kumulopa na Yerusalemu ku mampulu. ¹¹ Intungulushi shenu shipingwila kumafisa kanwa, bashimapepo benu basambilisha pa mutengo, nabakasesema benu bacitila imbuko pa ndalama. Lelo mwashintilila pali Yawe nokutila, ''Bushe Yawe tali pamo naifwe? Takuli ububi ubukesa pali ifwe.'' ¹² Eico, pamulandu wa imwe, Sioni akaba ibala, Yerusalemu akaba umupili wa fitantala, na kapili ke tempele kakaba pa ncende iyasansama.