¹ ''Iwe pundishafye, wicilikila ishiwi, ikatisha ishiwi nge penga. Ebelapo abantu bambi pafyakusanguka fyabo, nakuba ng'anda yakwa Yakobo kufyabubifi fyabo. ² Kwena balampepa inshiku shonse, kabili bamoneka abafwaishe ukumona ifyo ine naba. Bacita ifi nga bantu abacita ifyalungama, kwati bantu abashasula ifipope fya kwa Lesa wabo balampapata ukuti ine ne Lesa wabo ndebapalama, nokulabapela ifyebo ifyalolamo. ³ Abantu batila abti, ''Mulandu nshi ifwe ilyo tuleka ukulya Yawe taposako amano? Nga cinshi cilenga ukuti nelyo twaicefya no kucula ena tasakamanako?'' Nomba ine ne Yawe ndabasuka nati, 'Ilyo muleka ukulya, mucishinkafye umwine mukonkelelafye ifyakumusansamusha mwebene, kabili elyo mupelesha nababomfi benu bonse imilimo iyakosa. ⁴ Ilyo muleka ukulya ninshi mulekela ukulatintana, no lubuli pefye, nokulaumana. Ukuleka ukulya ukwa uyu musango, bushe imwe mutila kuti kwalenga ukuti ine naumfwa mu mulu imipapatile yenu, batini? ⁵ Bushe uyu e musango wakuleka ukulya untu nasala? Ubushiku bumo bushe kuti ebo umuntu aicefyamo? Bushe bushiku bwakontamafye nge tete, nokusendama pa nsalu shabulanda ne mito? Bushe ici eco mwita ukuleka ukulya? Bushe ubushiku bwamusango uyu ebo Yawe engasekelela? ⁶ ''Buhse teuyu musango wakuleka ukulya uo ine mfwaya? Ukukakula abafyengwa iminyololo, ukukakula inshinga namakoli, ukuleka abo mufyengelesha, nokufumyapo umutitikisha onse pakuti baleikalila. ⁷ Abali ne nsala mulebapelako icakulya, mulesekelela mu myenu abalanda abashikwete kwakwikala. Mulefwikako na bantu abo mulemona ukuti balisapula, kabili mwilakana nakulaafwako abantu benu. ⁸ Awe ninshi lyena mucikuku candi cikabengeshima pali imwe nge mibengele yakasuba akaletula, nefilonda fyenu fikalapolafye bwangu. Imicitile yenu iyalolamo ikalamutangilila, nobucindami bwa kwa Yawe bukalamucingililako nakunuma yenu. ⁹ Lyena mukalati nga mwanjita ne Yawe namwasuka. Mukalati nga mwakuta mutule, awe naine nkalamwasuka nati ndi pano. ''Nga mwaleka umucinshi, mwaleka nokusontana iminwe, mwaleka nokulanda ifibi pabanenu, ¹⁰ nga mwalapelako abali ne nsala icakulya, nokutulanyako ababusu awe ninshi imfifi iyo mwabamo ikasanguka ulubuto, ulukabalika nga akasuba akali pakati ka mutwe. ¹¹ Lyena ninshi ne Yawe nkalamutungulula lyonsefye, nokulamwikusha ifintu ifisuma mu mpanga iyabula amenshi. Lyena ine nkalamukosha nokulamusunga bwino. Mukaba nge bala ilitapililwa bwino, mukaba nga akamfuku mfuku ka menshi akashikama. ¹² Mukalabukulula ifibo;lya fyakale, mukalakula mu mifula yakale nakale. Bakalamwita ukuti nibakakulula wa fibumba ifyabongolweke, nibakulula wa mayanda ayabongolweke.'' Icilambu ca kucindika ubushiku bwe Sabata.'' ¹³ Yawe aletila ati, ''Ngamwalacindika ubushiku bwe Sabata, mwaleka nokulacitamo ifyabunonshi nga mwalamona ubushiku bwa ndi ubwamushilo ukuti ebwakusansamukamo, nokubucindika ngo bushiku bwa kwa Yawe icine cine, nga mwalabucindika pakukana laendamo icende ende, tamulebombamo milimo nangu ukulapumamo ilyashi lyabuwele wele. ¹⁴ ''Awe ninshi lyena mukalakwata insansa isha kuli Yawe kabili nkamusansabalika, nkaleka abantu bakalemucindika isonde lyonse, mukalailemena icalo ico napele Yakobo icikolwe cenu. Nine ne Yawe nalanda pakanwa kandi.''