¹ ''Imba, iwe wemwanakashi ing'umba, weushafyalapo; aula mukusekelela nokwimba kukubilikisha, iwe weushatala aumfwapo ubukali bwa bufyashi. pantu abana bawalekeleshiwa bafula ukucila abana ba mwanakashi uwaupwa,'' efyasosa Yawe. ² Kusha itenti lyobe nokulifungulula lifume kunse; lefya intambo shobe nokukosha impopo shobe. ³ Pantu ukapongolwela kukuboko kwa kukulyo nokwa kukuso, nabamubufyashi bakakonka inko nokunkana ikala mu misumba iyafibolya. ⁴ Witina pantu tawakalengwe insoni, nangu ukunenuka pantu tawakasebane; ukabala insoni sha bwaice bobe nokusebana kwa kulekeleshiwa obe. ⁵ Pantu kalenga obe emulume obe; Yawe umwine wamabumba eshina lyakwe. Uwamushilo uwakwa Israele emulubushi obe; eetwa Lesa uwa pano isonde lyonse. ⁶ Pantu Yawe akwitile ukubwela ngo mukashi uwalekeleshiwa kabili uwabulanda mu mupashi, ngo mwanakashi uwaupilwe umwaice nokumukana,'' efyasosa Lesa obe. ⁷ ''Panshita iinono nalikulekeleshe, lelo kubukulu bwa nkumbu nkakubwesha. ⁸ Mubwingi bwa bukali nafishile icinso candi kuli iwe pa nshita ntali; lelo ku cipangano ca cishinka nkakubelela uluse efyasosa Yawe, uukakupususha. ⁹ Pantu cili nga menshi ya pali Noah kuli ine: nga filya nalapile ukuti amenshi yapali Noah tayakatale ayapita nakabili pa sonde, eico nalapile ukuti nshakabe nobukali pali iwe nangu ukukwebaula. ¹⁰ Pantu impili shikawa notupili tukatenkana, lelo icikuku ca kutemwa kwandi tacakafume pali iwe, nangu cipangano ca mutende tacakatenkane efyasosa Yawe, uwakwata uluse pali imwe. ¹¹ Wewacushiwa, wewalulwa kucipupu kabili uushansansamushiwa, mona, ndekula amabwe yobe mu nkanda, kabili nkabika umufula obe pamo na Safari. ¹² Nkapanga insonshi shobe kuli Rubi ne mpongolo shobe ku mabwe ayabeka, ne mipika ya cikulwa ku mabwe ayasuma. ¹³ Elyo abana bobe bonse bakasambilishiwa kuli Yawe; no mutende wabana bobe ukakula. ¹⁴ Mubulungami emo ukeshibikilwa, ukaba ukutali ukufuma kumutitikisha, pantu tawakatine; ukufuma ku cakutinya, pantu tacakapalame kuli iwe. ¹⁵ Lolesha, umo nga akabifya, takafume kuli ine, onse uwabika amafya pali iwe akawila mu kucimfiwa. ¹⁶ Mona, nalipanga kafula, uuputa pa mulilo wamalasha no kupanga icanso nge milomo yakwe, kabili nine napanga umonaushi kukonaula. ¹⁷ Takuli icanso icikapangwa pali iwe icikacimfya; kabili ukasusha bonse abakubifya. Ubu ebupingushi bwa babomfi bakwa Yawe, nobololoke bwabo ukufuma kuli ine ubu ebukombe bwakwa Yawe.