¹ Lelo nomba ifi efyo Yawe alasosa, uyo uwamibumbile, Yakobo, na uyo uwamipangile, mwe ba Israel: ''Mwilaumfwa umwenso, apo nalimilubula; nalimitile pa shina lyenu, muli bandi. ² Ilyo mukapita mu menshi, nkaba naimwe; nelyo mukapula mu mimana, tayakamibishe nakalya. Ilyo mukenda ukupula mu mulilo tawakamoce, nefimbili mbili tafyakamonaule nakalya. ³ Pantu nine Yawe Lesa wenu, umo uwamushilo wakwa Israel, umupashi wenu. Nalimipela Egypt nga malipilo yakufuta yenu, Kushi na Seba ngefya kukabushanya ne mwe. ⁴ Apo wali wamisha nokucindamisha mu menso yandi, nalikutemwa; eico nkapela abantu abakukabulamo iwe, na bantu bambi abakukabulamo umweo obe. ⁵ Mwilaba nomwenso, apo naba na imwe; nkafumya abana benu ukufuma ku kabanga, nokumilonganya ukufuma ku masamba. ⁶ Ine nkeba aba kukapinda kakuso nati, ''Balekeni babwelelemo.'' Nabakukapinda kakukulyo nkabeba nati, ''Mwibalesha ukuya iyoo.'' Bwesesheni kuno abana bandi abaume ababa ku fyalo fyakutali, babwesesheni kuno abana bandi abanakashi ababa konsefye. ⁷ Bonse abetilwa peshina lyandi, bonse abo napangile napangile kubucindami bwandi, abo nalengele nokubumba. ⁸ Iteni abantu bandi, bese ku cilye. Abo bantu balikwata amenso ayakumwenako, nomba tabamona, balikwata amatwi ayakumfwilako, nomba tabomfwa. ⁹ Longanikeni abantu ba mitundu yonse ku cilye, babe pamo ne mishobo yonse. Nibani pali bena abasobelapo libela ifyakuntanshi? Nibani abasobelapo kabela ifilecitika pali nomba? Aleni nabaletepo bakambone nabo abakushininkisha ukuti balalungika. Uleke abantu bomfweko nokusumina basumine ukuti cacine.' ¹⁰ Yawe asosa ati, ''Mwe bena Israeli, nimwe bakambone bandi, nimwe nasala ukuba ababomfi bandi, epakuti imwe mulenjishiba nokulacetekela, muleshininkisha nokuti ninefye Lesa. Takwabako Lesa umbi, kanofye ine neka, takwatala akuba Lesa naumbi uwantangilile, nakuntanshi kwine takwakatale akuba naumbi nakalya. ¹¹ Ine wine, nine Yawe, kabili takwaba umupusushi naumbi ukucila pali ine. ¹² Nine Yawe newasosa ifili nokucitika, nine wine napususha kabili nine nasalanganya imbila. Tkwatala akuba Lesa naumbi uwingacitapo ifi. Imwe nimwebene bakambone bandi ukuti nine Lesa, ifyasosa Yawe. ¹³ Ekufumafye kukale, nine Lesa, teti pabe nangu umo uwingafyombotoka, teti kufye nelyo umo uwingalula ifintu ifyo ine ncitile?'' ¹⁴ 'Lesa wamushilo uwakwa Israeli, Yawe kalubula wesu, aleti nati, ''Pamulandu wakupususha imwe, ine nkatuma ifita, fikesa sansa umusumba wa Babiloni, nokusansamuka kwabena Kaludea konse kukaluka imisowa. ¹⁵ Ine ndi Yawe, Lesa wenu uwamushilo, nine nabumba mwena Israeli, kabili ndi mfumu yenu iyamuteka.'' ¹⁶ Ifi ifyasosa Yawe ukuti, ''Nalicitile umusebo muli bemba, nao wali ninshila yapitile mu menshi ayamaka. ¹⁷ Emo twatwele nebumba lyafita ifyalulunkene ifyendela pamaceleta napali bakabalwe. Fyatotobele panshi nokunwena, awe nokwima tefyakwimanapo, fyanishiminina nga filya fishima inyali. ¹⁸ ''Imwe mwilaibukisha ifyacitike kale, mwilatontonkanya pafyapita. ¹⁹ Bikisheni amano ku fintu ifipya kufyo ine nalacita. Nokutampa nafitampa ukulacitika, bushe imwe tamulefimona iyoo? Ine nalapanga umusebo uwakulalanya amatololo pakati, nokucitamo mu ciswebebe imilonga ya menshi. ²⁰ Nenama shine ishampanga shakulantotela, bamumbwe bakulancidika, pamopene ne mbuni, pantu nalateyanya amenshi pamatololo, nokucitamo mu ciswebebe imilonga ya menshi, pakuti balenwamo abantu bandi abo nasala, ²¹ aba ebantu abo ine naibumbila nemwine, kabili ebakulanumbanya. ²² Yawe aletila ati, ''Iwe we Yakobo, awe kwena tene upepa iyoo, we Israeli tene waposako amano nakalya. ²³ Tamundetela mpanga sha malambo ishakungocela, amalambo yenu tamuyalosha kukucindika ine. Imitulo yacabunga iyo ine namulomba, aye teyakucila amaka yenu, kabili ine nhsamutendusha ukulamulomba lomba ububani. ²⁴ Imwe tamuposa ndalama shenu pakunshitilamo ububani, kabili tamufikapo ukulansansamusha namafuta yanama shamalambo yenu. Imwe mwakoselelafye ukulancusha kubufi bwenu, nokulamfisha kumukoshi kumilandu iyo mucita. ²⁵ Ine wine, nine Lesa uufua bumpula mafunde, neco ncitila ifyo, nico efyo ine mfwaya ukucita. Nshakebukishe ifyabubifi fyenu. ²⁶ Aleni natuteke nemwe icilye, soseni umulandu wenu. Londololeni umulandu wenu, pakuti munshinine ukuti imwe nimwe mulungika. ²⁷ Icikolwe cenu icantashi icalibifishe, abamwimininako nabobene balibifye kuli ine. ²⁸ Nipamulandu uyu nkasebanishisha bashimapepo benu. Kabili nkakukanda iwe we Yakobo, nokuleka usebane we Israeli.''