¹ Pali iyo ine nshita imfumu ya Babiloni, ishina lyaiko ni Merodaki Baladani mwana Baladani, yalyumfwile ifyo imfumu Hesekia yalwele nefyo yapolele. Kanshi nao Melodakia epakutumina Hesekia kalata, abikapo nefyabupe. ² Hesekia nao atemwa, asekelela ne nkombe, ashilanga fyonse ifyali mumatala yakwe, silfere, golide, nefyanunka ubusaka, amafuta ayasuma, ing'anda yafyanso fyakwe elyo nafyonse ifyali mu ng'anda yakutulilamo ifyuma mwi sano lyakwe na mu calo cakwe conse tamwashele nelyo kamo eko Hesekia talangile inkombe. ³ Elyo Esaya kasesema aya ku mfumu Hesekia nokumwipusha ati, ''Nifinshi balya bantu bacisosa, kabili nikwisa bafumine?'' Hesekia nao ayasuka ati, ''Bafumine ukutali ku calo ca ku Babiloni.'' ⁴ Kasesema Esaya aipusha ati, ''Nifinshi bacimona mu ng'anda yobe uyamwisano?'' Hesekia ayasuka ati, ''Nabamona fyonse ifyamwisano lyandi. Tapashele nangu cimo pacuma natutile mumatala ico nshibalangile.'' ⁵ Esaya epakweba Hesekia ati, ''Umfwa kuno ishiwi Yawe umwine wafita alekweba. ⁶ Inshita ileisa ilyo ifintu fyonse mju ng'anda yobe iyesano, nafyonse ifyo ifikolwe fyenu fyatutile ukushinta ilelo fili nokusendwa ku Babiloni. Ala takwakashale nangu kamo, ifyasosa Yawe. ⁷ Kabili napali abamulupwa bobe, abamubili nomulopa obe, abo waifyalila wemwine, bakasendapo bamo nokuyabacita bamutungwi abakubombela imfumu hya ku Babiloni kwisano lyakwe.'' ⁸ Hesekia epakwiluka ukuti panshita akakokola pano calo, kanshi ena akulaikalilafye ku matwi tondolo, nao epakwasuka Esaya ati, ''Ishiwi lyakwa Yawe ilyo walanda lisuma.