¹ Ukacimona iwe Arieli, iwe Arieli we musumba uo David akulilemo insakwe. Lekeni papitepo umwaka umo nangu ibiili, pakuti ne shikunkulu shikalamba ne shinono shipwe ukupita. ² Ninshi Lesa aisa kukunoaula umusumba uwitwa Arieli, kukaba imisowa nokucibinta ifilamba, elintu no musumba wine ukaluka ubulamba. ³ Ni Lesa eukesa tantika ifita fyakwe pakulibila umusumba, eukesa ushinga nokusansa eukausansa. ⁴ Nomba iwe we Yerusalemu ukatelenteshiwa, ukulanda ninshi uuli panshi, ukufuma mu mushili ishiwi lyobe panonofye ukaba ngo mulungulwa uuleyakashako ukalandapo fimo pa nshita uuli mu mushili, uuletusaila pakulanda pa nshita uli mulufukutwa. ⁵ Iwe Yerusalemu, abalwani bobe bonse abakusansa bakolulwa ngo lukungu, ne fita fyabo ifikali fikolulwa nge misungu. Elyo iwe ukwabula nokwenekela. ⁶ Ukapulikilwafye icibulukutu icamaka, ne cinkukuma, ne congo icikalamba fyatula kuli Yawe umwine wafita pakwisa kukupusushako. Akatuma ne cimwela, nakankungwe nolubingu lwa mulilo ulwakocafye icoce oce. ⁷ Ifita fya bantu bamishobo yonse ifiwililila umusumba wa Arieli, kumo kwine ne fyanso fyabo ifya nkondo, nefipe fyabo fine fimbi, emukuti fyonsefye, fikongoloka nge ciloto, nangu nge cimonwa ca munshita yabushiku. ⁸ Cikaba ngo muntu uulelle utulo ulwakufwa ulushile, elyo mutulo alota ukuti nomba alelyepo icakulya, elyo cilya abuka mutulo, asanga ukuti ali neyakuluka umulopa. Nangu cikaba ngo muntu uulefwaya ukufwa ku cilaka, elyo mutulo alota ukuti nomba alenwa amenshi, elyo cilya aisa santamuka mutulo kabaili asanga ukuti kumukoshi kucili nakuma kucilaka. Efyo cikaba ku bantu aba mishobo yonse abalongana ukuwililila kulupili lwa Sioni. ⁹ Aleni mutine kabili mupepe. Aleni ipofwishenifye mwilamona. Mulekolwafye lelo tekumwangashi! Muletansukafye, nangu mushinwinepo bwalwa ubwa lumisha! ¹⁰ Pantu Yawe nalenga ukuti imwe muleshipula, pakuti mupone mutulo twine twine. Bakasesema alibashibatika amenso, na bakamona babo Lesa alibafimba amenso. ¹¹ Umulolele ifimonwa fyonse ifyo kasesema amona, imwe cakulakana ukumwebako. Umulolele ifimonwa imwe cikaba kwati ni kalata uwapetwa. Uwaisalwa bwino bwino nge shimbi. ¹² Nga wamutwala ku muntu umo uwaishiba ukubelenga ukuti akubelengeleko, uyo muntu kuti ayakwebafye ati, ''Awe ine nafilwa, pantu kalata alikomenenwa ne shimbi.'' Nga wamutwala ku muntu umo uushaishiba kubelenga, ena kuti ayakwebafye ati, ''Awe ine nshaishiba kubelenga.'' ¹³ Yawe aletila ati, ''Aba bantu bena batila abati balampepa, kanshi bancindikafye patunwa twabo, lelo imitima yabo yataluka nganshi kuli ine. Ifyebo fyabantunse nefishilano fyabo, efyo bebukidshafye ku mutwe, bena epepo lyabo. ¹⁴ Kanshi ine nakulabapapusha ilyo nakulakonkanya ukubalimuna. Abakwatapo amano balesanguka ifibuba, nobucenjeshi bwabo tabwalebombapo busuma nelyo kamo.'' ¹⁵ Bakacimona abantu abesha ukulafisa Yawe ilyo bapangwa ukucita. Ifyo bapanga ukucita, bena baficitilafye mu mfifi mubimfisolo, nokutontonkanya ukuti takwaba nelyo umo uubamona, nangu uwishiba ifyo balecita. ¹⁶ Bena fyonse bafiloshafye mumbi mumbi. Bushe pa ubumba inongo ne bumba line, icacindamo cinshi? Bushe icintu ico umo apanga, kuti ecalaeba umuntu uwacipanga aciti, ''Ala tewe wampanga.'' Nangu bushe kuti inongo eyaleeba uwaibumba aiti, ''Iwe, awe tawaishiba kantu.'' ¹⁷ Abantu balsosa ukuti apaba iteshi, teti pakokole ukuba ibala, napali ibala teti pakokole ukuba iteshi. Bushe Lebanoni takalulwe ukuba ibala ilyafunda? ¹⁸ Ilyo ubo bushiku bukafika, bankoma matwi bakalaumfwako uko bakalabelenga icitabo cimo, ne mpofu isho pamenso pafita fititi nasho shikalolesha. ¹⁹ Abantu abafye nabalanda bakalashukila nakabili insansa isho Yawe Lesa wamushilo wakwa Israeli apela abantu. ²⁰ Abankalwe bakaloba, abasalula Lesa nabo tabakekalilile iyoo, nabonse abasekelela mukucita ifyabubifi bakonaulwa nabo nokuloba. ²¹ Lesa akalofya bonse ababepesha abanabo imilandu, akalofya nabalya bonse abalesha ukulimuna bampula mafunde, nabalya bonse ababepa ubufi pakufyengelesha abantu abakaele pamilandu yabo iyalungama. ²² Kanshi nomba elyo Yawe alanda palwa ba ng'anda yakwa Yakobo, Lesa uwalubwile Abramu, aletila ati, ''Mwe bakwa Yakobo, awe tamwakasebane nakabili iyoo, tamwakalefunika amenso nakabili kulwa nsoni iyoo. ²³ Pantu mukalamona abana benu abo ine nkalamupela, mukalacindika ishina lyandi. Elyo mulashininkisha ukuti kanshi nine Lesa wamushilo wakwa Yakobo, mukalacindika ne Lesa wakwa Israeli mukulankwatila nakatina. ²⁴ Abalubantika bakalakwata amano, na bantu abailishanya apo shicela nabobene bakalaumfwa insansa ilyo bakalafundwako.''