¹ Yawe nasosa ukuti, ''Bakacimona abana abatalama. Abo abacitafye ifyo ine nshabeba ukucita, kabili bacita ifipangano ifishilingene nobufwayo bwa mupashi wandi, ecilenga nokuti balelunda ububifi pa bubifi. ² Bena babutukila ku Egypti pakuti balebafwako, elyo ukwabula nokuti baletala banjipusha nakalya. Bafwaya icalo ca Egypti eco cilebapokololako, emulandu wine babutukila kuli Farao imfumu ya cilya calo. ³ Ala Farao akabalenga ukusebana, nokubutukila ku Egypti pakuti akalebafwako nakokwine kukafulungana. ⁴ Pantu nangu inkombe shabo shikile kale ku musumba wa Sioni, nokufika nabafika ku Hanesi mu calo ca Egypti. ⁵ Kwena abena Yuda bonse bakekatwa insoni pakucetekela umuntu wa bantuabula incito kuli bena, uushingabafwa nangu ukubatulako kanofye ukubaletela insoni nomusebanya. ⁶ Pafiswango fya mumatololo ya Negebu, ine ne Lesa wabo ndesobelapo aya mashiwi ayakutila, ''Inkombe shilapitana mu calo umwafula ifiswango, mulya mwaikala inkalamo ishilume ne shikota, umwaba ne nsoka ishikali na fishimwe shimwe ifipupuka. Shilya nkombe shilasendela ifyuma pali ba mpunda napa ngamila napo ifyabupe fyamutengo, ifyakutwalila umushobo wa bantu uushakabanonkeshe nelyo cimo. ⁷ Ifyo icalo ca Egypti cibafwilishako, awe fintufye ifyabuwele wele. Kanshi nomba ishina lye shobo ilya nainika Egypti lishina lya Rahabu mundyafye. ⁸ Lesa alinjebele ine ukuti nembe mu citabo cimo imisango ya bantu, epakuti cibe ecikambone cape icakubashinina. ⁹ Pantu abantu balatalamina Yawe lyonse, balabepa ubufi, balakana nokumfwa ifyo Yawe alebafunda. ¹⁰ Balalesha bakamona ukubalondolwela ifimonwa. Beba bakasesema abati, ''Imwe mwilatweba fintu ifyacishinka ifitucena iyoo, muletwebafye ifyakutusansamusha. Lekeni fyebene tulecita ifyo tuleimwena ukuti ifyalolamo. ¹¹ Ala imwe fumenifye mu nshila, mwilatucinga iyoo. Ifyo mwilatukomya palwa kwa Lesa wa mushilo ukwa Israeli.'' ¹² Llelo uwamushilo uwakwa Israeli ena aletila ati, ''Pamulandu wakuti imwe mulasula ifyo ine mweba, nokwikala mwaikalilafye umucusha nobucenjeshi, ¹³ ala imwe mwalikwata umulandu. Nobububi buli pali imwe ngeli ilinga ilitali, ilyaba nomulale ukutula pamulu ukwisafikafye na panshi, kabili ilyatundama, mukapulikilwafye nalibongoloka. ¹⁴ Likasansaikafye lyonse kwati ninongo ye bumba, icakuti tapakashale icinga icikulu nelyo cimo icingalinga nokulaapwilapo umulilo, nangu ukutapilako amenshi mu cishima.'' ¹⁵ Imfumu Yawe, uwamushilo uwakwa Israelio, alesosa ukuti mukubwelela kuli ine emo mukapusukila. Nga mwatekanya nokucetekela, lyena ninshi mwakulakwata amaka. Nomba imwe mulakana. ¹⁶ Mwatile, ''Tukafulumuka abalwani besu pali bakabalwe balubilo.'' Ee, mulalungika, akufulumukenifye. Mulatontonkanya ukuti bakabalwe benu balubilo, cisuma, nomba abakumusupila bakamucila imwe ulubilo. ¹⁷ Imwe abantu benu ikana limo bakulafulumuka ilyo babatinya ku mulwani wenu umo mpo, nabalwani benu basanofye bakamukunkunika imwe bonse ulubilo, mukasuke amushala ngo mulongoti uwaba pamulu wa lupili, ngo uluunga lweka ulwakulapepeeluka pakapili.'' ¹⁸ Nangu cakulaba ifyuo, Yawe ena akulamulolela imwe pakuti alemupala. Ena alefwaya ukulamubelelako uluse pantu pefye Yawe e Lesa uucita ifyalolamo. Ala ishuko lisangwafye mukucetekela Yawe. Yawe alikwatisha uluse kabili mulungami. ¹⁹ Elyo nao Esaya akonkenyepo ati, ''Imwe mwebena Sioni, mwe baikala mu Yerusalemu, tamwakalelila ifilamba nakabili iyoo. Yawe akaba noluse nga mwakuta mutule. Ilyo akomfwa lyena akamwasuka. ²⁰ Kwena nangu Yawe amulenge ukupita mumacushi na mafya nga filya mulya nokunwa cilabushiku, nomba kafundisha akalabapo pakumufunda. Takalefisama iyoo, nemwe ninshi nomba mukalamushimpamo na menso. ²¹ Nga mwalapumba mu nshila, nokulalola kukulyo nangu kukuso, mukalaumfwa ishiwi lyakwe lyamweba aliti, ''Ala inshila ino kuno, eyo mukonke,'' ²² Utulubi twenu tulya utwaengelelwako silfere natulya utwaegelelwako golide, mukatubula nokuyatuposa nga filya baposa ubusali mukatila nokuti, ''Kabiyeni uko mwe finangwamwe.'' ²³ Nalyonsefye ilyo mukalabyala imbuto mumabala yenu, Yawe akalaleta imfula iyakushimesha nokushikusha ifikalamenamo, namo mukalafuma ifisabo ifine fine. ne ng'ombe shenu shakalakwata incende ishingi umwakuti shikalelila umulemfwe. ²⁴ Bacilume wa ng'ombe shenu nabapunda benu, shilya nama muliminako amabala, shikalalya icani icawamisha nga nshi kabili icafulisha nganshi. ²⁵ Ubushiku imisumba ya malinga yaba lwani benu iakapokwa nokwipaululamo abantu abaikalamo, elyo mu mpli shonse na mutupili tonse mukatumuka imilonga ya menshi. ²⁶ Umwenshi ukabalika nga akasuba, akasuba nako kakabalikisha nako ukucilamo. Ulubuto lwakako lukaba kwati lwa cine lubali elwabalikila capamo cakasuba kamo kene. Ifi fyonse fikacitika ilyo Yawe akakakila nokundapa ifilonda ifyo aletela abantu bakwe.'' Yawe alalimuna icalo ca Asiria. ²⁷ Kabili Esaya atile ati, ''Mwamona, amaka yakwa Yawe nobucindami bwakwe, filya filemonekela apatali. Umulilo ne cunshi efilelanga icipyu cakwe. Ilyo ukulalanda, amashiwi yakwe yakulabilima ngo mulilo uuleoca. ²⁸ Pakwisa Lesa natuma umwela uuleisa nge lyenshi lya menshi ayakuti yafika namumukoshi. Nao alekumbulukla imishobo yabena fyalo ngo kusenga kwakulupe, akabakobeka ne ntambo iyakubafulunganya nga filya bakaka impunda. ²⁹ ''Lelo imwe bantu bakwa Lesa, awe imwe mukalasansamuka, mukalaimba ne nyimbo nga shilya shine mwimba mu nshita yabushiku, ilyo kuba inshikunkulu mwakulasansamuka nga balya abantu benda umulongo ninshi nabamitolilo balelila pa ntanshi pakuya kulupili lwakwa Yawe, icilibwe cakwa Israeli. ³⁰ Yawe akaleka abantu bonse bomfwe ishiwi lyakwe ilyakatama, akaleka bomfwe apapela necipyu cakwe mukaba ulubingu lwa mulilo, nokupanta ne mfula yacitalawe, ne mfula yamabwe. ³¹ Abena Asiria bakulaikankilafye ku mwenso ilyo bakomfwa kwi shiwi lyakwa Yawe nokumfwisha apapela ubukali bwakwa Yawe. ³² Lyonse ilyo Yawe akalabalimuna, abantu bakwe nabo elyo bakalisha insombo nokulisha amasense ni Yawe umwine ewalaisalwisha abena Asiria. ³³ Ala nikale bapekanya icininkwa ca mulilo umwakocela imfumu ya Asiria, mumukanda uwashika kabili uukulu, ne nkuni shaisulamo mpa. Ni Yawe eukesaputamo umupu wakwe uwaluma nga maluti uulebilima mukutimuna umulilo.