¹ Awe Yosefu afililwe ukuisunga pali bonse aba bomfi abaiminine pali ena. Abilikishe ati, ''Umuntu onse afumepo ukunsha.'' Eco umubomfi nangu umo taimininepo ilyo Yosefu aisokolwele kuli ba munyina. ² Alilile umusowa, abena Egypti balyumfwile, ne ng'anda yakwa Farao yalyumfwile palwa ici. ³ Yosefu atile kuli ba munyina. ''Nine Yosefu. Bushe batata bacili abomi?'' Bamunyina balifililwe ukuti benga mwasuka, pantu bali sungwike mu cinso cakwe. ⁴ Elyo Yosefu atile kuli ba munyina, ''Iseni mupalame kuli nebo, napapata.'' Balipaleme. Atile, ''Nine Yosefu munyinenwe, untu mwashitishe mu Egypti. ⁵ Mwilunguluka nangu ukuifulilwa mwebene ico imwe mwalinshitishe kuno, pantu Lesa atumine ine ukumutangilila ukusunga ubumi. ⁶ Pantu imyaka ibili iyi icipowe cali mu calo kabili kushele naimbi imyaka isano iyo mushakabe ukulima nokulobolola. ⁷ Lesa atumine ine ukumutangilila ku kusungilila imwe nga ba kushala mwisonde, no kumusunga aba no mweo kwi pusukilo ilikalamba. ⁸ Eco nomba teimwe mwantumine kuno leelo ni Lesa, elyo alincita ukuba wishi kuli Farao, cibinda wa ng'anda yakwe yonse, nakateka wa calo conse ica Egypti. ⁹ Angufyanyeni munine nokuya kuli tata nokuyatila kuli ena, ''Ifi efyo umwana wenu Yosefu atila, ''Lesa alincita cibinda wa Egypti yonse. Tentemukileni kuli ine, mwikokola. ¹⁰ Mukekala mu calo ca Gosheni, mukaba mupepi naine, imwe na bana benu nabana ba bana benu, ne mikuni yenu ne ng'ombe shenu, nefikwatwa fyenu fyonse. ¹¹ Ine nkalamubakilila, pantu kucili naimbi imyaka isano iya cipowe, epakuti imwe ta mwishileba mu bupina, imwe, na bang'anda yenu, ne fikwatwa fyenu fyonse. ¹² Moneni amenso yenu yaloleshe, na menso yakwa munyinane Benjamini, ukuti akanwa kandi kalelanda kuli imwe. ¹³ Mukebe tata ubukata bwandi bonse mu Egypti nafyonse ifyo mu mwene. Mwangufyanye no kutentemusha tata kuno.'' ¹⁴ Akumbete munyina Benjamine mumukoshi no kulila, na Benjamini alilile pa mukoshi wakwe. ¹⁵ Afyompele bamunyina bonse nokulila pali bena, panuma ya ifyo ba munyina balandile na ena. ¹⁶ Ilyashi ili lyashimikwe mu ng'anda yakwa Farao: ''bamunyina Yosefu nabesa.'' Casekeshe Farao naba bomfi bakwe apakalamba. ¹⁷ Farao atile kuli Yosefu, ''Utile kuli ba munonko, ''Mucite ifi: Twikeni inama shenu nokuya ku calo ca Kenani. ¹⁸ Kasendeni shinwe naba ng'anda yenu no kwisa kuli ine. Ine nkapela kuli imwe icisuma ica mucalo ca Egypti, naimwe mukalya amafuta yamuli ici calo.'' ¹⁹ Nomba mwapelwa icipope, ''Citeni ici, sendeni amaceleta ukufuma mu calo ca Egypti aya bana benu naya bakashi benu. Mukasende shinwe nokwisa. ²⁰ Mwisakamikwa pa fipe fyenu, pantu icisuma ca mu calo conse ica Egypti cenu.'' ²¹ Abana abaume ba kwa Israeli bacitile ifyo. Yosefu abapele amaceleta, ukulingana ne cipope cakwa Farao, abapele nefingafwaikwa pa lwendo. ²² Kuli bena bonse apele cila muntu insalu shaku fwala, leelo kuli benjamini apele imyanda itatu iya Silfere ne nsalu shakufwala shisano. ²³ Ifyakwa wishi atumine ifi: ba punda ukumi limo abasendele fintu ifisuma ifya mu Egypti; naba punda abakota ikumi limo abasendele ing'ano, ne mikate, nafimbi ifya kwa wishi ifyapalwendo. ²⁴ Eico atumine bamunyina ukuya nabo balile. Atile kuli bena, ''mumone ukuti tamulebikana ifikansa munshila.'' ²⁵ Nabo baninike ukufuma mu Egypti no kwisa ku calo ca Kenani, kuli Yakobo, shibo. ²⁶ Bamwebele ukutila, ''Yosefu acili umumi, kabili ni kateka wa calo conse ica Egypti.'' Umutima wakwe wali sungwike. Pantu tasuminishe ifyo ba mwebele. ²⁷ Nabo ba mwebele yonse amashiwi yakwa Yosefu ayo alandile kuli bena. Ilyo Yakobo amwene amaceleta ayo Yosefu atumine ku kumusenda, umupashi wakwa Yakobo shibo wa puputwike. ²⁸ Israeli atile, ''Nacilinga. Yosefu umwana wandi umwaume acili no mweo. Ine ndeya no kumumona ilyo nshila fwa.''