¹ Muli ubo bushiku imfumu Asuelusi alifililwe ukusendama utulo. Kanshi epakweba abakumuletela icitabo camilandu, umo balemba ifinkankala ifyacitika mu bufumu bwakwe, pakuti babelengele imfumu. ² Awe basanga apo balembele ifyo Modekai asokolwele batungwi ba mfumu babili, Bigitani na Tereshi abalelonda pa mwinshi, abalefwaya ukwipaya imfumu Asuelusi. ³ Elyo imfumu yaipusha ati, ''Uyu wine Modekai, bupulami nshi kabili bacindami nshi apokelapo pali ivci?'' Aba ba mfumu bayasuka abati, ''Taba nangu cimo ico bamucitila.'' ⁴ Imfumu nayo aiti, ''Ngo uli mulubansa lwe sano lya mfumu nani?'' Ilyo linefye Hamani ninshi elyo aingila mu lubansa lwa kunse ye sano lya mfumu, alefwaya ukulanda ne mfumu pakukulika Modekai ku cimuti ico amupekanishishe. ⁵ Ababomfi ba mfumu bayasuka abati, ''Moneni Hamani naiminina mu lubansa.'' Imfumu naypo aiti, ''Lekeni engile.'' ⁶ Kanshi Hamani aingila, elyo imfumu hyamwipusha ukuti, ''Kuliko umuntu umo ndefwaya ukucindika, bushe kuti namucitila nshi?'' Elyo Hamani mumutima wakwe aleti, ''Ninani uo imfumu ingacindika ukucila pali ine?'' ⁷ Hamani epakweba imfumu ati, ''Uyo muntu imfumu ilefwaya ukucindika, ⁸ leteni ifyakufwala fyabufumu ifyo imfumu yafwalapo na kabalwe imfumu yaninapo, na ku mutwe wakwe kube ingala yabufumu. ⁹ Elyo bulenipo umo pa balashi ba mfumu abacindamishi nganshi eo mupeele insalu na kabalwe. Uyu mulashi afwike uyu muntu imfumu ilefwaya ukucindika, umuteke na pali kabalwe no kumutandasha mu lubansa lonse ulwa musumba, no kubilikisha kuli bonse pa cinso cakwe ukuti, 'Moneni ifi efyo imfumu icitila umuntu uo ilefwaya ukucindika.'' ¹⁰ Elyo imfumu yaeba Hamani ati, ''Endesha, bula ifyakufwala na kabalwe, ngefyo usosele, efyo ucitile Modekai umu Yuda ulya ekala pa mpongolo ya mfumu. Wishapo ne cimo pafyo ulandile.'' ¹¹ Hamani epakuyabula ifyakufwala na kabalwe, afwika Modekai, amuteka na pali kabalwe, amutandasha na mu lubansa lwa musumba no kubilikisha kuli bonse pa cinso cakwe ati, ''Moneni ifi efyo imfumu icitila umuntu uo ilefwaya ukucindika.'' ¹² Elyo Modekai abwelela ku mpongolo ya mfumu lelo Hamani bwangu bwangu aya ku ng'anda ku mwakwe, aleloosha kabili nafimba na ku mutwe. ¹³ Elyo Hamani ashimikila umukashi wakwe Sereshi na banankwe bonse fyonsefye ifyamucitikile. Bampandamano wakwe na bakashi bakwe epakumweba abati, ''Nga ni Modekai ulya ufwaya ukuwisha, elyo nga mu Yuda, ninshi tawakamucimfye. Icine cine ukawa pa cinso cakwe.'' ¹⁴ Bacili balelanda nankwe, bamutungwi ba mfumu bafika mukwangufyanya batwala Hamani ku mitebeto iyo Esta apekenye.