¹ Abana baume ba bakasesema batile kuli Elisha abati, ''Moneni incende ino twikalamo yalitucepela sana ifwe bonse. ² Lekeni ifwe tuleya ku Yodani, nokuti cila muntu tuleya tema ifimuti cimo cimo kulya, no kwisa kula pancende umwakuti tuleikala.'' Elisha na ayaswike, ''Kuti mwaya.'' ³ Elyo umo pali bena atile, ''Kutimwaya pamo nababomfi benu.'' Elisha ayaswike, ''Nalaya.'' ⁴ Nomba aile nabo, kabili elyo baishile ku Yodani, nabo batampile ukutema ifimuti. ⁵ Nomba ilyo umuntu umo aletema umuti wakwe, nesembe lyaponene mu menshi, nao alabilikisha no kutila, ''Iyee, shikulu wandi, isembe lyakwashima!'' ⁶ Elyo umuntu wakwa Lesa atile, ''Nipisa lyaponena?'' Naulya muntu alilangile Elisha pancende lyaponene. Apopene aputwile icimuti, aciposele pamenshi, nokulenga isembe ukwelela. ⁷ Elisha atile, ''Libule.'' Nao umuntu atambike ukuboko kwakwe no kulipoka. ⁸ Nomba imfumu ya Aramu yatendeke ukulwa na Israeli. Kabili yapandene amano nababomfi bakwe, atila, ''Pankambi yandi ikaba kabili ni ncende ilya.'' ⁹ Elyo muntu wakwa Lesa amutumine ku mfumu ya Israeli, no kutila, ''Ucenjele wipita kuncende ilya, pantu eko abena Siria baleya.'' ¹⁰ Imfumu ya Israeli yatumineko bamo kuncende uko umuntu wakwa Lesa alandilepo nokumusoka. ukucila pamuku umo na ibili, elyo imfumu yaile kulya, ali na balonda. ¹¹ Awe imfumu ya ku Siria yalifulilwe pali iyi misokelwe, kabili yaitile babomfi baiko nayo yatile kuli bena aiti, ''Tamwanjebele ninani pali ifwe uwaba kulubali lwa mfumu ya bena Israeli?'' ¹² Elyo umo pababomfi bakwe atile, ''Tapali nangu umo, kano shikulu, imfumu, pantu ni Elisha kasesema uwaba mu Israeli eweba imfumu yaku Israeli amashiwi mulanda mu muputule wenu uwa kusendamamo!'' ¹³ Eico imfumu yatile, ''Kabiyeni no kuyamona uko Elisha ali pakuti ntume abaume abakuya mwikata.'' Imfumu nayo yaebelwe ukuti, ''Mona ali ku Dotani.'' ¹⁴ Elyo imfumu yatumine ku Dotani, bakabalwe na maceleta ne bumba ilikalamba ilyankondo lya bashilika. Baishile ubushiku no kushinguluka umusumba. ¹⁵ Elyo umubomfi wa muntu wakwa Lesa aimine ulucelo celo nokuya panse, amwene ibumba lya bashilika ilikalamba ilyabashilika lishingulwike umusumba na bakabalwe na maceleta yankondo. Umubomfi wakwe atile, ''Iyee, mweshikulu! twalacita shani?'' ¹⁶ Elyo Elisha ayaswike, ''Witina, pantu abali kuli ifwe bengi ukucila bali kuli bena. ¹⁷ Na Elisha apepele atile, ''Yawe, namilomba ukuti mumwiswile amenso yakwe pakuti amone.'' Nao Yawe aliswilile amenso yamubomfi wakwe, alimwene. Moneni mpili monse mwaiswile bakabalwe na maceleta yankondo aya mulilo ukushinguluka Elisha! ¹⁸ Elyo abena Samaria baishile tentemuka nokuya ena, Elisha apepele kuli Yawe atile, ''Lekeni aba bantu bapofule, efyo nalomba kuli iwe, apopene bonse bapofwile, ukulingana nefyo Elisha alombele. ¹⁹ Elyo Elisha aebele abena Samaria, ''Iyi tenshila, kabili tekuli uno musumba, nkonkeni, nalamutwala ku muntu uo imwe mulefwaya.'' Nomba abatwele ku Samaria. ²⁰ Nomba ilyo acili aleya alefika ku Samaria, Elisha atile, ''Yawe, isuleni amenso ya aba bantu pakuti bamone. Na Yawe abeswilile amenso yabo nabo batampile ukumona, moneni, bonse bali pakati kamusumba wa bena Samaria. ²¹ Imfumu yabena Israeli yatile kuli Elisha, Elyo abamwene, ''Tata wandi, bushe mbepaye? Bushe mbepaye?'' ²² Elisha ayankwile, ''Iwe taufwile ukubepaya. Bushe abantu abo waikata bunkole kulupanga nobuta bobe ebo wipaye? Bapele umukate na menshi balya no kunwa, nga balya no kunwa, noku baleka baye kuli shikulwibo.'' ²³ Kabili imfumu yapekenye ifyakulya ifingi kuli bene, nabo elyo bonse balile no kunwa, nokuleka baye. Kabili babwelelemo kuli ba shikulwibo. Kabili ifipondo fyabena Siria abashilika tafyatalile afibwelela panshita itali mu caalo cabena Israeli. ²⁴ Ilyo papitile ici Beni Hadadi imfumu yaku Siria alongenye bonse abashilika bankondo no yaimina abena Samaria nokuya bashinga. ²⁵ Kwaponene icipowe icikalamba mu Samaria. Moneni, balibashingile mpaka umutwe wa mpunda walashitwa mundalama sha silfere cine konse konse, nendupi shibili shamatotoli yankunda shalashitwa mu ma silfere yasano. ²⁶ Ilyo imfumu ya ku Israeli yalepita oa cibumba, umwanakashi umo amulilile kuli yena, ati, ''Mpususheni, we shikulu wandi, we mfumu.'' ²⁷ Nayo yatile, ''Nga Yawe tangafwile, ni kuli cinshi ine ningakupusushisha?'' Bushe ni kupuminapo ingano nangu ku cakukaminamo imyangashi nelyo amafuta?'' ²⁸ Kabili imfumu yakonkenyepo, ''Nga cinshi cilekucusha?'' Nao ayaswike ati, ''Uyu mwanakashi atile kuli ine ati, impela umwana obe umwaume tumulye leelo, no mwana wandi umwaume tukamulya mailo.'' ²⁹ Efyo twaipike umwana wandi umwaume nokumulya na ine natile ubushiku bwakonkelepo, ''Leta umwana obe umwaume pakuti tumulye leelo alifishile umwana wakwe.'' ³⁰ Awe ilyo imfumu yaumfwile fye amashiwi ya mwanakashi, ilyo line imfumu yalepwile ifyakufwala fyaiko nelyo nomba yalepila pa cibumba, na bantu baloleshe nokumona, insamu eshali pamubili waiko. ³¹ Elyo kabili yatile, efyo Lesa ancitile nokucilapo, nga cakuti umutwe wakwa Elisha umwana umwaume mwana Shafati tawapululwe buno bushiku.'' ³² Nomba Elisha aikele mung'anda yakwe, nabakalamba baikele pamo nankwe. Elyo imfumu yatumine umuntu ukufuma pacinso cakwe, nomba ilyo inkombe shaishile kuli Elisha, nao atile kubakalamba, ''Namumona ifyo uyu mwana umwaume mwana kepaya atumine ukuti ine mputulwe umutwe? Mona, ilyo inkombe yalafika fye, mwisaleko icibi, nokutitikisha kucibi panuma yakwe. Bushe inshindo shakwa shikulu wakwe tashili kunuma yakwe?'' ³³ Ilyo acili alelanda nabo, moneni, inkombe yalifikile kuli ena. Ne mfumu yatile, ''Moneni, ububu ubu bufimine kuli Yawe. Nga cinshi ico ndelolela pantu Yawe tali naine?''