¹ Abantu bonse abena Yuda babulile Usia, uwali ne myaka ikumi limo na mutanda, no kumubika imfumu ukupyana wishi Amasia. ² Ni ena uwakulile Elati cipya cipya, no kubwesesha ku bena Yuda. Panuma yaifyo imfumu yalile pamo ne fikolwe fyaiko. ³ Usia ali ne myaka ikumi limo na mutanda ilyo ayambile ukuteka. Atekele pa myaka amakumi yasano na ibili mu Yerusalemu. Ishina lya kwa nyina ali ni Yekolia; afumine ku Yerusalemu. ⁴ Acitile icalungama ku menso yakwa Yawe, ukukonka mu cakumwenako cakwa wishi; Amasia, mucili conse. ⁵ Ali muntu uwalefwaya Lesa mu nshiku shakwa Sekaria, uwamusambilishe ukucindika Lesa. Lyonse ilyo alelomba Yawe, Lesa alemulenga ukucimfya. ⁶ Usia alifumine no kuyalwa na ba Filisiti. Alibongolwele amalinga ya musumba wa Gati, Yabine, na Ashidod; alikulile imisumba mulya mu calo ca Ashidod na mu ba Filisiti. ⁷ Lesa alimwafwile pa ba Filisiti, pa bena Arabu abaikele mu Gubali, na ku bena Meani. ⁸ Abena Amoni bapele imisonko kuli Usia, no lulumbi lwakwe lwasalangene, ukufikafye na ku kwingila mu Egupto, pamulandu wakuti alekwatilakofye amaka ⁹ Ukulundapo, Usia alikulile impungu mu Yerusalemu pa mpongolo ya pa cifutu, pa mpongolo yapa mupoka poka, napa cinshoko ce linga, no kufikoshako. ¹⁰ Akulile impungu mu matololo no kwimba ifishima fya menshi ifingi, pantu alikwete ifitekwa mwisamba lya mpili no mwabatama. Alikwete abalimi nabakubomba mu myangashi mu calo ca mpili mu mabala aya funda, pantu alitemenwe ubulimi. ¹¹ Ukulundapo, Usia alikwete abashilika ba nkondo abaleya ku bulwi mu mabumba ayatantikwe mu mpendwa shabo ishalependwa na Yeiel, kalemba, na Maseia, umukalamba waba shilka, uwaletungulula aba ni Hanania, umo pali ba cilolo ba mfumu. ¹² Impendwa yonse iya ntungulushi sha ndupwa ishaletungulula amalamba ya bulwi yali amakana yabili ne myanda mutanda. ¹³ Muminwe yabo mwali abashilika bankondo amakana imyanda itatu na makana cine lubali, ne myanda isano abalelwa ubulwi na maka ya bulamba ku kwafwa imfumu ku balwani. ¹⁴ Usiah alibapekanishishe- abashilika ba nkondo-inkwela, amafumo, ifimpompo, amalaya ya fyela, amata, na mabwe yakusukusa. ¹⁵ Mu Yerusalemu alikulilemo ifyakulwilako ifyapangilwe nabantu abacenjela ukufibika pa mpungu napa fifutu fya fishinko ukulasa imifwi na mabwe ayakalamba. ululumbi lwakwe lwasalanganine ku ncende shakutali, pantu alyafwile apakalamba eico aishileba uwa maka nganshi. ¹⁶ Lelo ilyo Usia aishileba uwamaka, umutima wakwe wali nakatutumushi icalengele ukucte fya mutwele mukuwa; abifishe kuli Yawe, Lesa wakwe, ukuti aingile mu ng'anda yakwa Yawe ku koca ububani pa cipailo ca bubani. ¹⁷ Asaria, shimapepo, aingile panuma yakwe, anba shimapepo amakumi cine konse konse abakwa Yawe, bali na ena, bali abaume abashipa. ¹⁸ Baile kuli Usia imfumu, no kutila kuli ena, ''Te cobe, Usia, ukoca ububani kuli Yawe, lelo mulimo waba shimapepo, abana baume bakwa Aaron, abashilishiwa ku koca ububani. Fumapo pa ncende ya mushilo, pantu naubifya kabili tawacindikwe na Yawe Lesa.'' ¹⁹ Elyo Usia aishilekalipa. Ninshi naikata ne cakocelako ububani muminwe yakwe ukuti oce. Ilyo ali nakalipila ba shimapepo, ifibashi fyafulwime pa mpumi yakwe mu menso ya ba shimapepo mu ng'anda yakwa Yawe, lubali ne cipailo ca bubani. ²⁰ Asaria shimapepo mukalamba naba shimapepo bonse balimuloleshe, kabili, moneni, ayalwike uwafibashi pa mpumi yakwe. Balimufumishe mulya bwangu bwangu. Na mucine aliswangene ukufuma, pamulandu wakuti Yawe alimupumine. ²¹ Usia, imfumu, ali uwafibashi ukufika napa bushiku afwile elyo aikele eka mu ng'anda iyaibela pantu ali wafibashi, nokutila aliputulwako ukufuma ku ng'anda yakwa Yawe. Yotamu, umwana wakwe umwaume, alipa ng'anda yabu fumu kabili atekele abantu ba mu calo. ²² Imilandu imbi iikumine Usia ukufumafye kukutampa mpaka naku mpela, fyalilembwa na kasesema Esaya umwana mwaume wakwa Amos. ²³ Eco Usia alele ne fikolwe fyakwe; bamushikile ne fikolwe fyakwe mu mpanga yakushikamo ba shamfumu, pantu baletila, ''Wafibashi.'' Yotamu, umwana wakwe umwaume, aishileba imfumu mu cifulo cakwe.