¹ Mu mwaka walenga ikumi na cine konse konse uwa kuteka kwa mfumu Yeroboamu mwana Nebati, Abiyamu atendeke ukuteka Yuda. ² Atekele imyaka itatu mu Yerusalemu. Ishina lyakwa nyina ali ni maaka. Ali umwana mwanakashi wakwa Abishalomu. ³ Aendele mu membu shonse isha kwa wishi isho acitile ku numa; No mutima wakwe onse tawali kuli Yawe Lesa wakwe ngo mutima wakwa Dabidi, icikolwe, wali. ⁴ Leelo pamulandu wakwa Dabidi, Yawe Lesa wakwe amupele ulwenge mu Yerusalemu pa kwimya umwana wakwe umwaume pa numa mukukosha Yerusalemu. ⁵ Lesa acitile ici pantu Dabidi acitile ifya lungama mu menso yakwa Lesa; Mu nshiku shakwe shonse sha bumi bwakwe, talekele ukucita fyonse ifyo ba mukonkomeshe ena, kano fye mu mulandu wakwa Uria umwina Hiti. ⁶ Nomba kwali inkondo pakati kakwa Reoboamu na Yeroboamu inshiku shonse isha bumi bwakwa Abiyamu. ⁷ Elyo pamilandu imbi iyakwa Abiyamu, fyonse ifyo acitile, bushe tafyalembwa mu citabo ca milandu yasha mfumu shakwa Yuda? Pali inkondo pakati kakwa Abiyamu na Yeroboamu. ⁸ Abiyamu aleele pamo ne fikolwe fyakwe, kabili bamushikile mu musumba wakwa Dabidi. Asa umwana wakwe umwaume ewali imfumu pepunda lyakwe. ⁹ Mu mwaka walenga amakumi ya bili Yeroboamu imfumu ya Israeli, Asa atendeke ukuteka pali Yuda. ¹⁰ Atekele imyaka amakumi yane na umo mu Yerusalemu. Nakulu ali ni Maaka, umwana mwanakashi wakwa Abishalomu. ¹¹ Asa alecita ifya lungama mu menso yakwa Yawe, nga Dabidi, icikolwe cakwe, alecita. ¹² Afumishe bucilende mu calo kabili afumishe ifilubi ifyo ifikolwe fya citile. ¹³ Afumishe na Maaka, na kulu, pali buna mfumu, pantu ali pangile akalubi kabunani ukufuma ku cimuti caimikwa ica Ashera. Asa ali citemene nokuya coca mu mupokapoka wa Kidrone. ¹⁴ Leelo incende sha pamulu tashafumishiwe. Eico umutima wakwa Asa wali kuli Yawe inshiku shakwe shonse. ¹⁵ Aletele ifipe ifyo wishi apatwile mu ng'anda yakwa Yawe, ne fipe fya kwe ifyo apatwile ifya pangilwe na silbere na golide ne fipe fimbi. ¹⁶ Kwali inkondo pakati kakwa Asa na Baasha imfumu yakwa Israeli, mu nshiku shabo shonse. ¹⁷ Baasha imfumu yakwa Israeli, alwishishe Yuda noku kula Rama, ukuti umuntu nangu umo ekasuminisha uli onse ukufuma nangu ukwingila mu calo cakwa Asa imfumu yakwa Yuda. ¹⁸ Elyo Asa abulile silbere na golide yonse iya shele mu cipao mu ng'anda yakwa Yawe, ne cipao ca ng'anda ya mfumu. Nokubika mu minwe ya babomfi bakwe nokutuma kuli Beni Hadadi mwana Tabrimone mwana Heseyone, imfumu yaku Aramu, uwa leikala mu Damasika. Atile, ¹⁹ ''Leka pabe icipangano pakati ka ine na iwe, nga filya cali pakati kakwa tata na ba wiso. Mona, nintuma icabupe kuli iwe silbere na golide. Toba icipangano wapangene na Baasha imfumu ya Israeli pakuti afume pali ine.'' ²⁰ Beni Hdadi aumfwile ku mfumu Asa nokutuma abakalamba ba bashilika bakwe, noku lwisha imisumba yakwa Israeli. Balwishishe Iyone, Dani, Abele Bete Maaka na Kinerete onse, pamo ne calo conse ica kwa Nafutali. ²¹ Caishileba ngefyo fine ilyo Baasha aumfwile, alekele ukukula Rama nokubwelela ku Tirsa. ²² Elyo imfumu Asa yaitile abena Yuda bonse. Tashilepo nangu umo. Basendele amabwe ne mbao sha ku Rama nefyo Baasha alekulila umusumba. Elyo imfumu Asa yaile kulilako Geba wakwa Benjamini na Misipa. ²³ Ne milandu yonse iya shalako iyakwa Asa, na bumpalume bwakwe, na fyonse ifyo acitile, ne misumba yonse akulile, bushe talembwa mwibuku lya milandu yakwa Yuda? Leelo mu nshiku shabukote ali lwele amakasa. ²⁴ Leelo Asa alele pamo ne fikolwe fyakwe kabili ashikilwe pamo nabo mu musumba wakwa dabidi wishi. Yehoshafati umwana umwaume wakwe ewali imfumu pe punda lyakwe. ²⁵ Nadabu umwana wakwe umwaume wakwa Yeroboamu atendeke ukuteka pali Israeli mu mwaka wa cibili uwa kwa Asa imfumu yakwa Yuda; atekele Israeli pa myaka ibili. ²⁶ Acitile ifya bipa mu menso yakwa Yawe nokwenda mu nshila shakwa wishi, na mu lubembu lwakwe, ulo alengele Israeli ukubembuka. ²⁷ Baashi umwana wakwa Ahiya uwa mu ng'anda yakwa Isakari, Apangile Nadabu; Baasha ali mwipeye mu Gibetone, uwa ba Pelishiti. Pantu Nadabu na Israeli onse bale sansa ukufika ku Gibetone. ²⁸ Umwaka wa citatu kuli Asa imfumu yakwa Yuda, Baasha aipeye Nadabu nokuba imfumu pe punda lyakwe. ²⁹ Ilyo atendeke fye ukuteka Baasha aipeye bonse aba mu ng'anda yakwa Yeroboamu. Tashilepo nangu umo uwa mweo mu mfyalwa yakwa Yeroboamu; muli iyi nshila aonawile imfyalwa ya bufumu, nga fintu yawe alandile ku mubomfi wakwe Ahiya umwina Shilo, ³⁰ pa mulandu wa membu shakwa Yeroboamu isho abembwike ne sho alengele Israeli ukubembuka, pantu akalifya Yawe, Lesa wakwa Israeli, ukufulwa. ³¹ Imilandu imbi iya shalako iyakwa Nadabu, na fyonse ifyo acitile, bushe tafyalembwa mwibuku lya mulandu yashamfumu sha kwa Israeli? ³² Kwali inkondo pakati kakwa Asa na Baasha imfumu yakwa Israeli mu nshiku shabo shonse. ³³ Mu mwaka wa citatu kuli Asa imfumu yakwa Yuda, Baasha mwana Ahiya atendeke ukuteka pali Israeli mu Tisa kabili atekele imyaka amakumi yabili na ine. ³⁴ Kabili acitile ifyabipa mu menso yakwa Yawe no kwenda mu nshila shakwa Yeroboamu na mulubembu lwakwe ulo alengele Israeli ukubembuka.