¹ Ubonyene akapunda abasambiri bakwe teni na bamwabo babiri, akabapa amaka pa mizimu yibibi, iyakuti bayifumyemo, nu kuchizga inthenda yiliyonsi ni vyakufoka vyonsi. ² Amazina aga basambiri bakwe teni na bamwabo babiri aga. Uwakwamba, uSimoni, wo akwitwa ukuti uPeturo, nu Andreya umuzuna wakwe; Jakobo umwana wa Zebediya, nu Yohane umuzuna wakwe; ³ nu Filipu, nu Batulumeyu; uTomasi, nu Mateyu uwakusontchesya umusonkho; nu Jakobo umwana wa alifeyu, nu tadeyu; ⁴ uSimoni uwa ku Kenani, nu Yudasi usikariyoti, uyonyene wo akamupereka uYesu. ⁵ Teni na bamwabo babiri aba, uYesu akabatuma. Akabachenjezga akati, mutakajende kunzira iya banthu aba kunzi, na muchikaya icha basamariya mutinjiremo. ⁶ Kwene nkhaninkhani muye ku mberere zgo zisobereye izga munyumba iya Israyeli; ⁷ ubonyene Po mukubuka, mupharazge ukuti, 'Ubufumu ubwakumwanya wapalamira.' ⁸ Mubachizge bo balwaye, munyamusyeso abakufwa, mubazelufye abamawumbombo, mufumyemo ivibanda. Mukapochelera app bwelere, name mutwaleso ukwa bwelere. ⁹ Mutayisendere ndalama izga golide, pamo izga siliva, pamo nizga mapepala awe mu tuvikwama twinyu utwa ndalama. ¹⁰ pamo ni thumba ilya chakulya icha paulendo, pamo na malaya gabiri aga mukasi, pamo ni sapato, pamo ni ndisa, pakuti uwa mbombo akwenera ukupochera ichakulya chakwe. ¹¹ Mu chigaba chonsi na muchikaya cho mwinjiramo, mulondore uwene wo wakwenelera, Po mwikale umonyene mpaka Po mukwinzu kufumamo. ¹² Po mukwinjira munyumba, mubalamuche aba munyumba. ¹³ Nanthi inyumbiyo yakwenelera, umutende winyu winze pa nyumba iyonye. Nanthi te yakwenelera, umutende winyu inthi wubabwelere. ¹⁴ Wonsi wo atakwinza kubapochelera imwe, pamo na wo atakwivwa amazgu ginyu, pakufuma munyumba iyo pamo muchikaya icho, mukung'unthe nthukumbwi ku vinama vyinyu. ¹⁵ Nadi po nkhubabuzga, ukuti isiku ilya kweruzga, umulandu uwa Sodomu na Gomora wulichepa kulusya akaya ako. ¹⁶ Yen'ya, inthi imbatume ngati meet mberere pakasi pa bachimbwi, chifukwa chakwe muchenjere ngati njoka, mubeso mwe bawunenesyo ngati nkhunda. ¹⁷ Kwene muchenjere na banthu! Pakuti bakwinzu kubatwala ku basongo aba milandu, inthi binze babakome mu masinagogi gabo. ¹⁸ Bakwinzu kubasendera ku basongo nkhani na ku mafumu chifukwa chiine, kuti Mube wukaboni bwabo na kubanthu aba kunzi. ¹⁹ Kwene paliponsi po bangabatwala imwe, mutabe na maghanighani ukuti inthi nene bulibuli pamo inthi nene ichoni, pakuti cho mukwinzu kunena inthi muchipochelere inyengo iyonye. ²⁰ Pakuti uwakunena te mwemwe, kwene Umuzimu uwa Baba winyu wo akunena muimwe. ²¹ Kweneso umukamu akwinzu kupereka umukamu wakwe kumfwa, nu baba umwana wakwe. Abana inthi binze babanyamuchire abapapi babo, po inthi binze babatwale kumfwa. ²² Abanthu bonsi inthi binze bababenje chifukwa chizina lyane. Uwene wo apilira ukufika paumaliro, wo akwinzu kuponosyeka. ²³ nanthi babayimvya muchigaba icho, muchimbilire muchigaba chinji, po nadi nkhunena niimwe, mute mwinze muyimale imizinda iya Israyeli ukufichira po umwana wa munthu po akwinza. ²⁴ Wo akusambira atangachila umusambizi wakwe, pamo umuzga atangachila ubwana wakwe. ²⁵ Chakukwanira ukuti wo akusambira ayanane nu musambizi wakwe, nu muzga ukuti ayanane nu bwana wakwe. Waje abanthu bamupunda umwenecho wa nyumba ukuti uBulezebule, asi inthi binze bapunde abamunyumba yakwe ukulusya apa! ²⁶ Chifukwa chakwe mutabanyire abene, chifukwa pate ichinthu ichakuchikupichira ukuti chite chinze chivumbukwe, pamo ichinthu ichakuvwama ukuti chite chinze chimanyikwe. ²⁷ Cho nkhubabuzga imwe muchisi, muchinene pawuzelu,na Cho mukuchivwa mumakutwi, muchilalichire pamusonje uwa nyumba. ²⁸ Po mutanyile wo akugoga umubiri kwene umoyo atangawugoga. Kwene nkhaninkhani, mumunyile uwene wo angagoga umoyo nu mubiri ukuya mu gehena. ²⁹ Nomba impheta zibiri, asi bakuzikazga na kandalama koka ko kate na maka? Pate nanthi yimo yo yingagwa pansi ukwambura ukuti uBaba winyu amanye. ³⁰ Napo lingaba lisisi ilya mumatwe ginyu gonsi, lyakuberenjeka. ³¹ Uwonyene ukunyira awe . Imwe mwe bakuzirwa ukulusya impheta izginji. ³² Po aliwonsi wo akuzomera panthanzi izga banthu ukuti ali poka niine, ine name nkhwinzu kumuzomera ukuti ali poka niine panthanzi izga Baba wane wo ali kumwanya. ³³ Kwene aliwonsi wo akunkhana panthanzi izga banthu, name nkhwinzu kumukana panthanzi izga Baba wane wo ali kumwanya. ³⁴ Mutaghanaghane ukuti nkhinza ukubika umutende pa chalo icha pansi, nthakinza ukubikapo umutende pa chalo icha pansi awe, kwene lupanga. ³⁵ Nkhinza ukulekanisya umunthu nu baba wakwe, nu mwana umwanthanda nu mama wakwe, nu mwanthanda uwakusendwa nu nyinavyala wakwe. ³⁶ Na balwani aba munthu bakwinzu kuba aba munyumba yakwe. ³⁷ Uwene wo akutemwa ubaba wakwe olo umama wakwe ukulusya ine, atanenereye ine; uwene wo akutemwa umwana wakwe umwanavuli olo umwana wakwe umwanthanda ukulusya ine, atanenereye ine. ³⁸ Uwene wo atakunyamula imphinjika yakwe nukundandata pisinda lyane, te wakwenelera kuine. ³⁹ Wo akwanza ukuponosya umoyo wakwe, po akuwutaga. Na wo akutaga umoyo wakwe ichifukwa chiine, wo akwinzu kuwaga. ⁴⁰ Uwene wo akubapochelera imwe ko kuti akumphochelera ine, na wo akumphochelera ine, ko kuti amupochelera wo akanthumizga ine. ⁴¹ Wo akupochelera umuneneri pi zina ilya muneneri, akwinzu kupochelera imphoto iya muneneri. Wo akupochelera umunthu wo muzelu, akwinzu kupochelera imphoto iya munthu wo muzelu. ⁴² Aliwonsi wo akupereka ku banthu abansi aba, ulupindi ulwa minzi agakukatala ukuti ang'were chifukwa chakuti musambiri, Nadi apanye nkhubabuzga, imphoto yakwe yite yitajichepo nalumo."