¹ Po uYesu akati amara ukubabuzga abasambiri bakwe teni na bamwabo babiri, akanyamuka ukufuma kura, akajenda ukuyu kubasambizga nu kupharazga muchikaya chabo. ² Po nomba uYohane, pakwivwa mundende ivya mbombo iya Khristu, akatumizga abasambiri bakwe amazwi ³ po akati kwa wuyo, "Ka uwakwinza mwemwe, pamo tulindilire uwunji?" ⁴ Po uYesu akazgora nukunena nabo, "Munyamuche muye munene nu Yohane vyo mwavivwa na vyo mwavyen'ya. ⁵ Bo batakwen'ya inthi bapochelere ukwen'ya kwabo, na bakulemare inthi bajende, abamawumbombo banozgeka, na bo batakwivwa bakwivwa, na bakufwa bopenye banyamuka, na kubanthu bo bakavu kopenyene inthi kupharazikwe ubuthenga ubwinza. ⁶ Wakukondwa wo atakwagamo akanthu akakukalarizga mwiine." ⁷ Po abene Po bakanyamukaga, uYesu akambu kunena na banthu abinji ivya kwa Yohane, Ka mukaya ku chimbalangwa ka mukaya mwen'yachi- ka litete ilyakuyingana ni mphepo? ⁸ Choni cho mukaya mwachen'ya- umunthu uwakuzwara ivyakuzwara ivyakupeperuka-peperuka? abakuzwara ivyakupeperuka-peperuka bali munyumba izga mafumu. ⁹ Chifukwa wuli cho mukajenda? Pakuyu kwen'ya umuneneri? Nadi, nkhubabuzga, uwene wakulusya nu muneneri. ¹⁰ Uwene wo wowuyo wo kulembesile ukuti, 'Yen'ya, ine need mwenecho ne nkhutuma ithenga lyane panthanzi pako, lyo likwinzu kuyan'ya inzira yako panthanzi pako.' ¹¹ Nadi apa nkhubabuzga imwe mwe banthu, pakasi pa bo bali ukupapwa nu banthanda atanyamusilepo umunthu umukulu uwakulusya uYohane um'babatizi. Kwene umunthu wo munsi mu wufumu uwa kumwanya, wo mukulu ukumulusya uwene. ¹² Po ukwambira amasiku aga Yohane m'babatizi ukufichira pa nyengo iyi, uwufumu uwakumwanya wakulwilira, bo balimbichira abo inthi bawupoche namaka. ¹³ Pakuti vyonsi vyo abaneneri bakalemba na malango, bakanenera mpaka mu nyengo iya Yohane; ¹⁴ nanthi mukwanza ukuti muzomerezge ichi, uwene wo Eliya uwakumulindilira ukuti wo akatinji akwinza. ¹⁵ Uwene wo ali na makutwi, ayivwe. ¹⁶ Ningayanisya nichoni abakupapwa aba nyengo izi? Ubonyene bakuyanana bulo na bana bo bali mu misika, abonyene bo bakupundilizga bulo ku bamwabo ¹⁷ bakuti, 'Tukabalizizga ivitoliro, kwene mutakimba awe. Tukalira bulo, imwe po mutakalira.' ¹⁸ Pakuti uYohane akinza uwamburu kulya, atakang'wera, abene po bakatinji, 'Ali ni chibanda.' ¹⁹ Umwana wa munthu akinza uwakulya, po akang'wera, po abene bakatinji, 'Yen'yi, umunthu uwa kulyakulya nu kung'werang'wera ivinyo, mubwezi uwa bakusontchesya musonkho na banthu abakwananga!' vite nimbombo, amahara inthi gayezgeche agakulungama ni mbombo zgakwe. ²⁰ Aponyene po akamba kunyoza imizi iyo mo vikachitichira ivyinji ivya mbombo izga maka gakwe, ichifukwa ichakuti yitang'anamusile awe. ²¹ "Soka kuiwe, Korazini! Soka kuiwe, Betesayida! Chifukwa ngati ivya maka vyo vyachitika muimwe nge vyanguchitika mu Turo na mu Sidoni, nge bang'anamusile amoyo gabo kale mu guniya na mwitoyi. ²² Ubonyene nkhubabuzga, isiku ilya kweruzga umulandu wawo uwa Turo na Sidoni wukwinzu kuchepa ukulusya winyu. ²³ Po iwe, Kapernawo, bakwinzu kukukwezga ukufichira kwibingo? Ukwinzu kwisika ukufichira ku chalo icha banthu abakufwa. Chifukwa ivyamaka vyo vyachitika muiwe nge vyanguchitika mu Sodomu, uwonyene ichigaba icho nge chikaye ukufichira pa nyengo iyi. ²⁴ Kweneso nkhubabuzga imwe ukuti isiku ilya kweruzga umulandu uwa Sodomu wukwinzu kuchepa nu wako." ²⁵ Inyengo iyonye uYesu akazgora akati, "Nkhuzomerezan'ya niimwe , baBaba, imfumu iya kumwanya ni chalu icha pansi, chifukwa mwazgika ivinthu ivi ku bamahara na bakumanya, po mwavinenera mu bana. ²⁶ Enya, Baba, chifukwa ichi chikayanana nu Kwanza kwinyu. ²⁷ Ivinthu vyonsi vyaperecheka kuine nu Baba; Po pate wo akumumanya ichete umwana kwene uBaba, nesi wo abamanyire ichete abababa, kwene umwana, na aliwonsi wo umwana akwanza ukuti amuvumbulire. ²⁸ Mwinze kuine, mwe mwabomba imbombo iyakulisya ni yakupyola, Po ine nkhwinzu kubatasya. ²⁹ Nyamuli igoli lyane, po musambire kuine, chifukwa ne wakufwasa nu kuyichefya mu moyo wane, po mukwinzu kwaga ukutuzga mu moyo ginyu. ³⁰ Pakuti goli lyane lyakutontha, nu katundu wane apepusile."